Taniela 6:1-28
6 Neʼe fakatotonu leva e Taliusi ke fakanofo he kau pule taki* ʼe toko 120 ʼi te puleʼaga katoa.+
2 Neʼe pule kia natou ni tagata maʼu tuʼulaga ʼe toko tolu, pea neʼe kau ai ia Taniela.+ Neʼe natou sivi te gaue ʼa te kau pule taki,+ ke ʼaua naʼa kakaʼi te hau.
3 Pea neʼe maʼoluga age ia Taniela ʼi te tahi ʼu tagata maʼu tuʼulaga pea mo te kau pule taki, he neʼe fakaofoofo tona ʼatamai.+ Pea neʼe fia fakanofo ia ia e te hau ke pule ki te puleʼaga katoa.
4 ʼI te temi ʼaia, neʼe kumi ai e te kau maʼu tuʼulaga pea mo te kau pule taki ni aluʼaga ke tukugakoviʼi ai ia Taniela. Neʼe natou fia valoki tana faʼahiga tokaga ki te puleʼaga. Kae neʼe mole natou maʼu he aluʼaga ke tukugakoviʼi ai ia ia. Neʼe mole maʼu he agakaka ia Taniela he neʼe tuha mo te falala. ʼEi, neʼe mole maʼu ia ia he hala peʼe ko he agakaka.
5 Koia neʼe feuiʼaki e te ʼu tagata ʼaia: “ ʼE mole tou maʼu anai he aluʼaga ke tukugakoviʼi ai ia Taniela. Kae ʼe tonu ke tou kumi he aluʼaga ʼe ʼi ai hona pikipikiga mo te lao ʼo tona ʼAtua.”+
6 Neʼe olo fakatahi leva te kau maʼu tuʼulaga pea mo te kau pule taki ki te hau, ʼo ui age ki ai: “Hau ko Taliusi, ke ke maʼuli ʼo heʼe gata.
7 Neʼe felogoi fuli te kau maʼu tuʼulaga ʼo te puleʼaga, mo te kau minisi, mo te kau pule taki, mo te kau faitokoni ʼa te hau pea mo te ʼu kovana. Pea ʼe matou kole atu ke ke tohi te fakatotonu ʼaeni pea ke ke fakamaʼua ke mulimuli ki ai te hahaʼi fuli: Siʼomatou hau, ʼe tonu anai ke faikole ʼateaina pe te hahaʼi kia koe lolotoga ʼaho ʼe 30. Kapau ʼe faikole he tahi ki he tahi age ʼatua, peʼe ki he tahi age tagata, ʼe li anai ki te luo ʼo te ʼu laione.+
8 Koia, siʼomatou hau, ʼofa pe ke ke fakamoʼoni ki te fakatotonu ʼaia ʼo ke tohi ai tou higoa.+ ʼE mole feala anai ke fetogi, ʼo mulimuli pe ki te lao ʼa te kau Metia mo te kau Pelesia, ʼae ʼe mole feala ke molehi.”+
9 Neʼe fakamoʼoni ai leva e te Hau ko Taliusi ia te fakatotonu ʼaia.
10 Neʼe iloʼi leva e Taniela kua fakamoʼoni e te hau te fakatotonu ʼaia. Koia neʼe foimo alu ai kio ia. Neʼe tuʼu tona koga fale ʼi te fuga fale pea neʼe ava te ʼu matapa fakamalama ʼae ʼe haga ki Selusalemi.+ Pea neʼe tuʼutuli ifo ai ʼo faikole pea mo fakavikiviki ki tona ʼAtua. Neʼe ina fai te faʼahi ʼaia tuʼa tolu ʼi te ʼaho, ohage pe ko tana fai mahani ʼi muʼa atu.
11 Neʼe hufi leva te fale ʼo Taniela e ʼona fili. Pea neʼe natou maʼu atu ia ia ʼe faikole ki tona ʼAtua pea mo kole mamahi ia tona manavaʼofa.
12 Neʼe natou olo leva ki te hau ʼo fakamanatuʼi age te tapu ʼae neʼe ina fai. Neʼe natou ui age: “Siʼomatou hau, kua ke fakamoʼoni ki te fakatotonu ʼaeni: ʼE tonu anai ke faikole ʼateaina pe te hahaʼi kia koe lolotoga ʼaho ʼe 30. Pea kapau ʼe faikole he tahi ki he tahi age ʼatua, peʼe ki he tahi age tagata, ʼe li anai ki te luo ʼo te ʼu laione.” Neʼe tali age e te hau: “ ʼEi, ʼe moʼoni te faʼahi ʼaia. ʼE mulimuli pe ki te lao ʼa te kau Metia mo te kau Pelesia, ʼae ʼe mole feala ke molehi.”+
13 Neʼe natou ui atu aipe ki te hau: “Siʼomatou hau, ʼe mole fakaʼapaʼapa kia koe ia Taniela, ʼae ʼe kau ʼi te kau popula ʼo Suta.+ Pea ʼe mole mulimuli ki te fakatotonu ʼae neʼe ke fakamoʼoni ki ai, he ʼe faikole tuʼa tolu ʼi te ʼaho.”+
14 Neʼe lotomamahi ʼaupito ai te hau ʼi tana logo ki te ʼu palalau ʼaia. Pea neʼe ina kumi he puleʼaki ke tokoni ai kia Taniela. Neʼe faiga malohi ke ina haofaki ia ia, ʼo kaku ki te to ʼo te laʼa.
15 Neʼe toe olo fakatahi leva te ʼu tagata ʼaia ki te hau, ʼo ui age ki ai: “Siʼomatou hau, ke ke manatuʼi ʼe mole feala ke fetogi he fakatotonu peʼe ko he tapu neʼe fakamoʼoni ki ai he hau, ʼo mulimuli pe ki te lao ʼa te kau Metia mo te kau Pelesia.”+
16 Neʼe fakatotonu leva e te hau ke ʼaumai ia Taniela, pea neʼe li ki te luo ʼo te ʼu laione.+ Pea neʼe ina ui age kia Taniela: “ ʼE haofaki anai koe e tou ʼAtua, ʼae ʼe ke tauhi tuʼumaʼu ki ai.”
17 Hili ʼaia, neʼe ʼaumai leva he foʼi maka ʼo pupunu ʼaki te luo. Neʼe fakailoga leva e te hau te foʼi maka ʼaia ʼaki tona mama pea mo te mama ʼo tana kau ʼaliki. Koia neʼe mole kei feala ai ke fetogi te tonu ʼae neʼe fai ʼo ʼuhiga mo Taniela.
18 Neʼe toe liliu leva te hau ki tona fale hau. Neʼe sesunio ʼi te po katoa ʼaia pea neʼe mole loto ki he faʼahiga fakafiafia.* Pea neʼe mole mamoe.
19 Neʼe tuʼu ake leva te hau ʼi te kua mafoa ʼo te ʼaho, pea neʼe alu fakavilivili ki te luo ʼo te ʼu laione.
20 Pea neʼe pauʼi kia Taniela ʼi tana fakaovi atu ki te luo, pea neʼe ha ʼi tona leʼo te mamahi ʼo tona loto. Neʼe ina ui age: “Taniela, ia koe ʼae ko te tagata faifekau ʼa te ʼAtua maʼuli. Neʼe lava haofaki koa koe mai te ʼu laione e tou ʼAtua ʼae ʼe ke tauhi tuʼumaʼu ki ai?”
21 Neʼe tali atu aipe e Taniela ki te hau: “Siʼoku hau, ke ke maʼuli ʼo heʼe gata.
22 Neʼe fekauʼi mai e toku ʼAtua tana ʼaselo pea neʼe ina mapunuʼi te gutu ʼo te ʼu laione.+ ʼE mole hoku lavea he ʼe ina iloʼi ʼe mole ʼi ai haku hala.+ Pea siʼoku hau, neʼe mole au fai he meʼa ʼe kovi kia koe.”
23 Neʼe fiafia ʼaupito ai te hau pea neʼe ina fakatotonu ke toho ake ia Taniela mai te luo. Neʼe toho ake leva ia Taniela mai ai, pea neʼe mole pe la hona lavea, he neʼe falala ki tona ʼAtua.+
24 Pea neʼe fakatotonu e te hau ke ʼaumai te ʼu tagata ʼae neʼe natou tukugakoviʼi ia* Taniela. Pea neʼe li natou ki te luo ʼo te ʼu laione, ʼo feia mo ʼonatou foha pea mo ʼonatou ʼohoana. Neʼe heʼeki natou kaku pe la ki te takele ʼo te luo kae kua ʼohofi natou ia e te ʼu laione ʼo fasifasi ai ʼonatou hui fuli.+
25 Neʼe faitohi leva ia te Hau ko Taliusi ki te hahaʼi ʼo te ʼu puleʼaga fuli mo te ʼu lea fuli ʼae neʼe nonofo ʼi te kele katoa.+ Koʼeni te logo ʼae neʼe ina tohi: “Ke lahi tokotou tokalelei!
26 Pea koʼeni taku fakatotonu: ʼE tonu ke manavasiʼi mo fakaʼapaʼapa te hahaʼi ʼo toku puleʼaga katoa ki te ʼAtua ʼo Taniela.+ ʼE ko ia te ʼAtua maʼuli pea ʼe maʼuli ʼo heʼe gata. ʼE mole maumauʼi anai tona puleʼaga ʼi he temi, pea ʼe tuʼu anai tana pule* ʼo talu ai.+
27 ʼE tokoni+ ki tana hahaʼi pea mo haofaki natou, pea ʼe ina fakahoko he ʼu fakailoga mo he ʼu gaue fakaofoofo ʼi te lagi mo te kele.+ ʼEi, ʼe ko ia ʼae neʼe ina haofaki ia Taniela mai te ʼu pasikuku ʼo te ʼu laione.”
28 Neʼe maʼuli fimalie ia Taniela ʼi te puleʼaga ʼo Taliusi+ pea mo te puleʼaga ʼo Siliusi, te tagata Pelesia.+
Nota
^ ʼI te lea ʼae neʼe ʼuluaki tohi ai, neʼe ko te higoa fakatuʼulaga, ko tona fakaʼuhiga “kau puipui ʼo te puleʼaga.” Pea ʼe talanoa ʼi heni ʼo ʼuhiga mo te ʼu kovana ʼo te ʼu potu fenua ʼo te Puleʼaga Papiloni.
^ Peʼe lagi “neʼe mole ina fakatotonu ke ʼomai te kau faimaholo.”
^ Peʼe “faifasituʼu kia.”
^ Peʼe “pule faʼitaliha.”
