Tetelonome 28:1-68
28 “Pea kapau ʼe kotou fakalogo ki te leʼo ʼo Sehova tokotou ʼAtua, ʼo kotou tokakaga fakalelei ʼo mulimuli ki ʼana fakatotonu fuli ʼae ʼe au foaki atu kia koutou ʼi te ʼaho nei, ʼe mahino ia, ʼe hikihiki anai koutou e Sehova tokotou ʼAtua, ʼi te ʼu puleʼaga fuli ʼo te kele.+
2 ʼE kotou maʼu anai te ʼu tapuakina fuli ʼaeni pea ʼe tapuakiʼi lahi anai koutou,+ koteʼuhi ʼe kotou fakalogo tuʼumaʼu pe ki te leʼo ʼo Sehova tokotou ʼAtua:
3 “ ʼE tapuakina anai koutou ʼi te kolo, pea ʼe tapuakina anai koutou ʼi te gaueʼaga.+
4 “ ʼE tapuakina anai ʼakotou fanau+ pea mo te fua ʼo ʼakotou gaueʼaga pea mo te ʼu ʼuhi ʼo takotou faga manu, te ʼu ʼuhi ʼo ʼakotou pipi mo te ʼu ʼuhi ʼo ʼakotou ovi.+
5 “ ʼE tapuakina anai koutou he ʼe fonu pe anai takotou kato+ pea mo te ipu ʼae ʼe kotou natu ai te falena.+
6 “ ʼE tapuakina anai koutou ʼi te ʼu gaue fuli ʼae ʼe kotou fai.
7 “ ʼE tuku atu anai e Sehova te malo ʼi ʼokotou fili, ʼae ʼe ʼomai ʼo tauʼi koutou.+ ʼE natou ʼomai anai ʼi he ala ʼe tahi ʼo ʼohofi koutou, kae ʼe natou feholaki anai ʼi ʼokotou muʼa ia ala kehekehe ʼe fitu.+
8 ʼE fakatotonu anai e Sehova ke fakafonu ʼokotou fale tanakiʼaga meʼa+ pea ʼe tapuakina anai koutou ʼi te ʼu meʼa fuli ʼae ka kotou fai. ʼE ina tapuakiʼi moʼoni anai koutou ʼi te fenua ʼae ʼe foaki atu e Sehova tokotou ʼAtua.
9 ʼE fakaliliu anai koutou e Sehova ko tana hahaʼi maʼoniʼoni,+ ohage pe ko tana fakapapauʼi atu kia koutou,+ he ʼe kotou taupau tuʼumaʼu pe anai te ʼu fakatotonu ʼa Sehova tokotou ʼAtua, pea mo haʼele ʼi ʼona ala.
10 ʼE tonu anai ke tokagaʼi e te hahaʼi fuli ʼo te kele neʼe fakahigoaʼi koutou ki te huafa ʼo Sehova,+ pea ʼe natou matataku anai ia koutou.+
11 “ ʼE lahi anai te ʼu fanau ʼae ka foaki atu e Sehova, ʼo feia mo te faga manu pea ʼe toe lahi anai te ʼu fua ʼo takotou gaueʼaga,+ ʼi te fenua ʼae neʼe fakapapau e Sehova ki ʼakotou kui ke ina foaki atu.+
12 ʼE avahi anai e Sehova te lagi, ohage ko te avahi e he tagata he fale ʼe tanaki ai he ʼu meʼa lelei, ke to ai te ʼua ʼi tokotou fenua ʼi tona temi totonu,+ pea ke tapuakiʼi ai koutou ʼi te ʼu meʼa fuli ʼae ʼe kotou fai. ʼE kotou foaki anai he ʼu meʼa ki ni puleʼaga ʼe kaugamalie, kae ʼe mole kotou kole anai he ʼu meʼa kia natou.+
13 ʼE hikihiki anai koutou e Sehova ʼi ʼihi age hahaʼi pea ʼe mole ina tuku anai ke natou puleʼi koutou. ʼE kotou maʼoluga age anai+ ʼi ʼihi hahaʼi kae ʼe mole kotou malalo anai, mo kapau ʼe kotou fakalogo tuʼumaʼu pe ki te ʼu fakatotonu ʼa Sehova tokotou ʼAtua, ʼae ʼe au foaki atu kia koutou ʼi te ʼaho nei ke kotou mulimuli ki ai pea mo maʼuliʼi.
14 ʼE mole tonu anai ke kotou lituʼa ki te ʼu folafola fuli ʼae ʼe au foaki atu kia koutou ʼi te ʼaho nei, ʼo kotou olo ki te faʼahi mataʼu peʼe ki te faʼahi hema,+ ʼo muliʼi he tahi age ʼu ʼatua pea mo tauhi kia natou.+
15 “Kae kapau ʼe mole kotou fakalogo ki te leʼo ʼo Sehova tokotou ʼAtua, ʼo kotou tokakaga fakalelei ʼo maʼuliʼi ʼana fakatotonu fuli pea mo ʼana lekula ʼae ʼe au foaki atu kia koutou ʼi te ʼaho nei, ʼe hoko anai kia koutou te ʼu malaʼia fuli ʼaeni pea ʼe lahi anai ʼokotou malaʼia:+
16 “ ʼE kotou malaʼia anai ʼi te kolo, pea ʼe kotou malaʼia anai ʼi te gaueʼaga.+
17 “ ʼE kotou malaʼia anai ʼi te mole ʼi ai he meʼa ʼi takotou kato+ pea mo te natuʼaga falena.+
18 “ ʼE malaʼia anai ʼakotou fanau+ pea mo te ʼu fua ʼo takotou gaueʼaga, ʼo feia mo te ʼu ʼuhi ʼo takotou faga pipi pea mo takotou faga ovi.+
19 “ ʼE kotou malaʼia anai ʼi te ʼu meʼa fuli ʼae ka kotou fai.
20 “ ʼI te ʼu meʼa fuli ʼae ka kotou fai, ʼe hoko ai anai te malaʼia, mo te maveuveu pea mo te tautea, ʼuhi ko Sehova. Pea ʼe vave pe anai tokotou fakaʼauha mo tokotou pulihi, ʼuhi ko ʼakotou aga ʼae ʼe kovi pea mo takotou liʼaki ia ia.+
21 ʼE tuku anai e Sehova ke pipiki te mahaki ia koutou ʼo kaku ki tana fakaʼauha koutou ʼi te fenua ʼae ka kotou maʼu.+
22 ʼE tauteaʼi anai koutou e Sehova ʼaki te mahaki ʼae ko te fatafata vaivai, mo te fiva,+ mo te fufula, mo te vela,* mo te heleta,+ mo te maumauʼi ʼo te ʼu gaueʼaga ʼuhi ko he ʼu matagi vevela peʼe ko te mahaki.+ ʼE hoko anai kia koutou te ʼu meʼa ʼaia ʼo kaku ki takotou mamate.
23 ʼE liliu anai te lagi ko he kapa pea ʼe liliu anai te kele ko he ukamea.+
24 ʼE fakato anai e Sehova te ʼua ohage ko he ʼone mo he efu ʼi tokotou fenua ʼo kaku ki tokotou fakaʼauha.
25 ʼE mole tuku atu anai e Sehova kia koutou te malo ʼi ʼokotou fili.+ ʼE kotou olo anai ʼo ʼohofi ia natou ʼi he ala ʼe tahi, kae ʼe kotou feholaki anai ʼi ʼonatou muʼa ia ala kehekehe ʼe fitu. Pea ʼe kotou liliu anai ko he meʼa fakalialia ki te ʼu puleʼaga fuli ʼo te kele.+
26 Pea ʼe kai anai ʼokotou sino e te ʼu manulele fuli mo te ʼu manu fuli ʼo te kele, pea ʼe mole haʼu anai he tahi ʼo fakamatakuʼi natou.+
27 “ ʼE tauteaʼi anai koe e Sehova ʼaki te ʼu foʼi polo ʼae ʼe maʼu e te kau Esipito, mo te mahaki ʼae ko te mulito, mo te kama, pea mo te tahi ʼu faʼahiga mahaki kili, pea ʼe mole ke maʼu anai hona faitoʼo.
28 ʼE fakaliliu anai koe e Sehova ʼo ʼulu vale, mo kivi+ pea mo lotohoha.
29 ʼE ke haʼele taufa anai kae kei fetapa, ohage pe ko te haʼele taufa ʼa he tagata kivi ʼi te fakapoʼuli,+ pea ʼe mole fua lelei anai he gaue ʼe ke fai. ʼE kakaʼi tuʼumaʼu pe anai koe pea mo kaihaʼa tuʼumaʼu anai te ʼu meʼa ʼae ʼe ke maʼu, pea ʼe mole he tahi ʼe ina haofaki anai koe.+
30 ʼE ke fakapapau ʼohoana anai mo he taʼahine, kae ʼe fakaʼalikiʼi anai ia ia. ʼE ke laga anai hou ʼapi, kae ʼe mole ke nofoʼi anai.+ ʼE ke to anai he gaueʼaga vite, kae ʼe mole ke fakaʼaogaʼi pe la ʼona ʼuluaki fua.+
31 ʼE matehi anai tau vitulo ʼi ʼou muʼa, kae ʼe mole ke kai anai ki ai. ʼE kaihaʼa anai tau asino ʼi ʼou muʼa, kae ʼe mole toe foaki atu anai. ʼE tuku anai ʼau ovi ki ʼou fili, pea ʼe mole he tahi ke ina haofaki koe.
32 ʼE ke sio mata anai ki te ʼave ʼo ʼou foha mo ʼou ʼofafine ki he tahi age hahaʼi,+ pea ʼe ke fakaʼamu tuʼumaʼu pe anai ke ke toe sio kia natou, kae ʼe mole ke lava fai anai he meʼa.
33 ʼE kai anai te ʼu fua ʼo tau gaueʼaga pea mo te ʼu fua fuli ʼo tau gaue e he hahaʼi ʼe mole ke iloʼi,+ pea ʼe kakaʼi mo fakamamahiʼi tuʼumaʼu anai koe.
34 ʼE ke ʼulu vale anai ʼuhi ko te ʼu meʼa ʼae ka ke sio ki ai.
35 “ ʼE tauteaʼi anai koutou e Sehova ʼo ina fakatupu ʼi ʼokotou tuli mo ʼokotou vaʼe he ʼu foʼi polo ʼe mamahi pea ʼe mole feala hona faitoʼo, ʼe mafola anai te mahaki ʼaia mai ʼokotou ʼalofi vaʼe ki ʼokotou ʼulu.
36 ʼE ʼave anai e Sehova ia te hau ʼae neʼe kotou fakanofo, ʼo feia mo koutou ki he puleʼaga neʼe mole kotou iloʼi mo ʼakotou kui,+ pea ʼe kotou tauhi ai anai ki he tahi ʼu ʼatua, ko he ʼu ʼatua neʼe fai ʼaki te ʼakau pea mo te maka.+
37 Pea ʼe kotou liliu anai ko he meʼa fakalialia ki te hahaʼi fuli ʼae ʼe ʼave anai koutou ki ai e Sehova pea ʼe natou fehihiʼa mo manukiʼi anai koutou.+
38 “ ʼE lahi anai te pulapula ʼae ka kotou nunusi, kae ʼe mole lahi anai te taʼukai ʼae ka kotou tanaki,+ koteʼuhi ʼe kai anai e te ʼu heʼe.
39 ʼE kotou to anai he ʼu gaueʼaga vite pea mo taupau, kae ʼe mole kotou inu anai he vino pea mo tanaki he meʼa,+ koteʼuhi ʼe kai fuli anai e te ʼugaga.
40 ʼE maʼu anai ʼi tokotou fenua katoa he ʼu fuʼu oliveto, kae ʼe mole kotou vali anai hakotou moʼi lolo, koteʼuhi ʼe maluluku anai te ʼu fuaʼi oliveto.
41 ʼE kotou maʼu anai he ʼu foha mo he ʼu ʼofafine, kae ʼe mole nonofo anai mo koutou, koteʼuhi ʼe ʼave popula anai natou.+
42 ʼE maumauʼi anai e he ʼu kiʼi manu* ʼakotou fuʼu ʼakau fuli pea mo te ʼu fua ʼo ʼakotou gaueʼaga.
43 Ko te kau matapule ʼae ʼe maʼuʼuli ʼi te lotolotoiga ʼo koutou ʼe ʼasili malolohi age anai ia koutou, kae ʼe kotou ʼasili vaivavai anai.
44 ʼE natou foaki atu anai he ʼu meʼa, kae ʼe mole kotou foaki anai he ʼu meʼa kia natou.+ ʼE natou maʼoluga age anai ia koutou pea ʼe kotou fakalogo anai kia natou.+
45 “ ʼE hoko moʼoni anai kia koutou te ʼu malaʼia fuli ʼaia+ pea ʼe lahi anai ʼokotou malaʼia ʼo kaku ki tokotou fakaʼauha,+ koteʼuhi neʼe mole kotou fakalogo ki te leʼo ʼo Sehova tokotou ʼAtua, ʼo kotou taupau ʼana fakatotonu mo ʼana lekula ʼae neʼe ina foaki atu.+
46 Pea ʼe hoko atu pe anai tokotou tauteaʼi mo tokotou hologa ʼaki te ʼu malaʼia ʼaia ohage ko he fakailoga mo he fakatokaga ʼo talu ai,+
47 koteʼuhi neʼe mole kotou tauhi kia Sehova tokotou ʼAtua ʼaki he lotofiafia ʼi te temi ʼae neʼe kotou maʼu lahi ai ia meʼa fuli.+
48 ʼE fekauʼi anai e Sehova ʼokotou fili ke natou tauʼi koutou, pea ʼe kotou tauhi anai kia natou+ kae ʼe kotou fia kakai,+ mo fia iinu, pea ʼe fakaʼofaʼofa anai ʼokotou mutuʼi meʼa mo kotou masisiva. ʼE ina hili anai he ʼakau ʼamo ukamea ki ʼokotou kia ʼo kaku ki tana fakaʼauha koutou.
49 “ ʼE uga anai e Sehova he puleʼaga ke ina tauʼi koutou, ko he puleʼaga mai te potu taupotu ʼo te kele,+ ʼe ina ʼohofi anai koutou ohage ko he akuila.+ Ko he puleʼaga ʼe mole kotou mahino anai ki tana lea,+
50 pea ko he puleʼaga ʼe agafekai, ʼe mole fakaʼapaʼapa anai ki te hahaʼi vaivavai peʼe lotomanavaʼofa ki te ʼu fanau.+
51 ʼE natou kai anai te ʼu ʼuhi ʼo takotou faga manu pea mo te ʼu fua ʼo ʼakotou gaueʼaga, ʼo kaku ki tokotou pulihi. ʼE mole natou tuku anai maʼa koutou he fulumeto, peʼe ko he vino foʼou, peʼe ko he lolo, peʼe ko he ʼuhiʼi pipi peʼe ko he ʼuhiʼi ovi, ʼo kaku ki tanatou haga ʼo pulihi koutou.+
52 ʼE natou ʼa takai anai koutou, ʼo mole feala ai hakotou mavae mai ʼokotou kolo* fuli ʼae ʼi tokotou fenua, ʼo kaku ki te holo ʼo ʼokotou kaupa maʼoluga mo malohi ʼae ʼe kotou falala ki ai. ʼEi, ʼe natou ʼa takai moʼoni anai koutou ʼi ʼokotou kolo fuli ʼae ʼi tokotou fenua ʼae neʼe foaki atu e Sehova tokotou ʼAtua.+
53 Pea ʼe kotou kai anai ʼakotou fanau, te sino ʼo ʼokotou foha mo ʼokotou ʼofafine+ ʼae neʼe foaki atu e Sehova tokotou ʼAtua, ʼuhi ko te ʼu faigataʼaʼia ʼae ʼe hoko anai ʼi tokotou ʼa takai e ʼokotou fili pea mo tanatou fakamamahiʼi koutou.
54 “ ʼE toe feia mo te tagata ʼo koutou ʼae ʼe aga fakaʼeteʼete mo pelepelegesi, ʼe mole lotomanavaʼofa anai ki tona tehina, peʼe ki tona ʼohoana ʼofaina, peʼe ki ʼona foha ʼae ʼe kei maʼuʼuli.
55 Pea ʼe mole ina vaevae anai mo natou te sino ʼo ʼona foha ʼae ka ina kai, he ʼe mole ina maʼu anai hana tahi meʼa kai, ʼuhi ko te ʼu faigataʼaʼia ʼae ʼe hoko anai ʼi ʼokotou kolo, ʼi tokotou ʼa takai e ʼokotou fili pea mo tanatou fakamamahiʼi koutou.+
56 Pea ko te fafine ʼo koutou ʼae ʼe aga fakaʼeteʼete mo pelepelegesi, ʼae neʼe mole pe la manatu ʼe lave anai ʼona vaʼe ki te kele,+ ʼe mole lotomanavaʼofa anai ki tona ʼohoana ʼofaina, peʼe ki tana tama, peʼe ki tana taʼahine,
57 koteʼuhi ʼe mole ina fia vaevae anai mo natou te sino ʼo hana tamasiʼi neʼe ina fanauʼi pea mo te ʼu meʼa fuli ʼae ʼe haʼu ki tuʼa ʼi tana ʼosi fanau. ʼE ina kai fakafufu anai te ʼu meʼa fuli ʼaia ʼuhi ko te ʼu faigataʼaʼia ʼae ka hoko ʼi ʼokotou kolo, ʼi tokotou ʼa takai e ʼokotou fili pea mo tanatou fakamamahiʼi koutou.
58 “Kapau ʼe mole kotou mulimuli fakalelei ki te ʼu folafola fuli ʼo te Lao ʼaeni ʼe tuʼu ʼi te tohi ʼaeni,+ pea kapau ʼe mole kotou manavasiʼi ki te huafa ʼo Sehova+ tokotou ʼAtua, te huafa taulekaleka mo fakamanavahe ʼaia,+
59 ʼe tauteaʼi anai koutou mo tokotou hologa e Sehova ʼaki he ʼu malaʼia fakamataku, mo lalahi pea mo fualoa,+ pea ʼaki he ʼu mahaki kovi mo fualoa.
60 ʼE ina tauteaʼi anai koutou ʼaki te ʼu mahaki fuli ʼae neʼe maʼu ʼi Esipito pea neʼe kotou matataku ai, pea ʼe pipiki moʼoni anai te ʼu mahaki ʼaia ia koutou.
61 Pea tahi ʼae meʼa, ʼe tauteaʼi anai koutou e Sehova ʼaki he ʼu mahaki mo he ʼu malaʼia ʼe mole tuʼu ʼi te tohi ʼo te Lao ʼaeni, ʼo kaku ki tokotou fakaʼauha.
62 Pea tatau aipe pe ʼe kua kotou kaugamalie ohage ko te ʼu fetuʼu ʼo te lagi,+ kae ʼe toe pe anai he tokosiʼi ia koutou,+ koteʼuhi neʼe mole kotou fakalogo ki te leʼo ʼo Sehova tokotou ʼAtua.
63 “Pea ʼe fiafia anai ia Sehova ʼi tana fakaʼauha ia koutou, ohage pe ko te fiafia ʼa Sehova ʼi te temi muʼa ʼi tana foaki atu he ʼu meʼa ʼe lelei pea mo fakahahaʼi koutou. Pea ʼe taʼaki anai koutou mai te kele ʼae ka kotou maʼu.
64 “Pea ʼe fakamavetevete anai koutou e Sehova ʼi te lotolotoiga ʼo te ʼu puleʼaga fuli, mai ʼae potu taupotu ʼo te kele ki ʼae potu taupotu,+ pea ʼe kotou tauhi ai anai ki he ʼu ʼatua neʼe fai ʼaki te ʼakau mo te maka, ʼae neʼe mole kotou iloʼi ʼo feia mo ʼakotou kui.+
65 ʼE mole kotou maʼuli tokalelei anai ʼi te ʼu puleʼaga ʼaia+ pea ʼe mole kotou maʼu anai he koga meʼa ke kotou malolo ai. ʼE tuku pe anai e Sehova ke kotou lotohoha,+ mo mata gaʼegaʼe pea mo lotovaivai.+
66 ʼE tuʼutamakiʼia anai ʼokotou maʼuli, pea ʼe kotou matataku anai ʼi te ʼaho mo te po. ʼE mole kotou iloʼi papau anai pe ʼe kotou maʼuʼuli anai.
67 ʼI te uhu, ʼe kotou ui anai: ‘Ke feia age la ko te afiafi ʼaeni!’ pea ʼi te afiafi, ʼe kotou ui anai: ‘Ke feia age la ko te uhu ʼaeni!’ ʼuhi ko te lahi ʼo takotou matataku pea mo te ʼu meʼa ʼae ka kotou sisio ki ai.
68 ʼE mahino ia, ʼe toe fakaliliu anai koutou e Sehova ki Esipito ʼi ni vaka, ko he folau neʼe au tala atu ʼe mole kotou toe fai anai. Pea ʼe kotou fakatau ai anai ia koutou ki ʼokotou fili ke kotou kaugana kia natou, kae ʼe mole he tahi ʼe ina fia totogi anai koutou.”
Nota
^ ʼI te Fakahepeleo, ʼe toe fakaʼuhiga ki he fiva.
^ Peʼe “kiʼi manu ʼe mumuhu.”
^ Hep. “matapa.”
