Kia Tito 3:1-15
3 Ke ke haga fakamanatuʼi age ke natou talagafua pea mo fakalogo ki te ʼu puleʼaga taki, mo te ʼu pule,+ pea ke natou nofo teuteu ki te fai ʼo te ʼu gaue lelei fuli,
2 ke ʼaua naʼa natou laukovi ki he tahi, mo fakatupu kē, mo faiga ke tuʼu tanatou manatu,+ kae ke natou agamalū ki te hahaʼi fuli.+
3 Koteʼuhi mo tatou foki, neʼe tou agavale ʼi te temi muʼa, mo talagataʼa, mo hehe, mo kaugana ki te ʼu holi mo te ʼu fakafiafia kehekehe, mo agakovi, mo maheka, mo aga fakalialia, pea mo fefehiʼaʼaki.
4 Kae ʼi te fakaha e te ʼAtua, totatou Fakamaʼuli,+ tana agaʼofa pea mo tona ʼofa ʼae ki te malamanei,
5 neʼe ina haofaki ai tatou, mole ʼuhi ko te ʼu gaue faitotonu ʼae neʼe tou fai,+ kae ʼuhi ko tona manavaʼofa.+ Neʼe ina haofaki tatou ʼi tana fakamaʼa tatou ʼo ina foaki mai te maʼuli+ pea mo fakafoʼou tatou ʼaki te laumalie maʼoniʼoni.+
6 Neʼe ina foaki lahi mai tona laumalie, ʼaki ia Sesu Kilisito* totatou Fakamaʼuli,+
7 ke tou maʼu ai te tofiʼa+ ʼo mulimuli ki te ʼamanaki ʼo te maʼuli heʼe gata,+ hili te tala ʼo tatatou faitotonu ia muʼa ʼo te ʼAtua ʼaki te ʼofa makehe ʼo ia ʼaia.+
8 Ko te ʼu palalau ʼaia ʼe tuha mo te falala, pea ʼe au loto ke ke fakamaʼuhigaʼi te ʼu meʼa ʼaia, ke feala ai kia natou ʼae ʼe tui ki te ʼAtua ke natou manatuʼi tuʼumaʼu ʼo fai he ʼu gaue lelei. Ko te ʼu meʼa ʼaia ʼe lelei pea mo ʼaoga ki te tagata.
9 Kae ke ke fakamamaʼo mai te ʼu fihi laulaunoa, mo te ʼu fekumi ʼo ʼuhiga mo te ʼu hologa pea mo te ʼu kē ʼo ʼuhiga mo te Lao, he ʼe mole hona fua mo hona ʼaoga.+
10 Kapau ʼe ʼi ai he tagata ʼe ina fakamafola he ʼu akonaki loi,+ fakatokaga ia ia. Kae kapau ʼe mole fia fakalogo ʼi tona ʼosi fakatokaga tuʼa lua,+ ʼaua naʼa ke toe fakatahi mo ia,+
11 he ʼe ko te taʼi tagata ʼaia kua fakamamaʼo mai te tui, mo agahala, pea mo ina fakatuʼā ia ia totonu.
12 Ka au fekauʼi atu anai ia Alatemaso peʼe ko Tisike,+ faiga malohi ke ke haʼu kia au ʼi Nikopoli, he neʼe au fakatotonu ke au nofo ʼi ai ʼi te temi momoko.
13 Faiga ke ke tokoni ki te faifolau ʼa Senasi, ʼae ʼe poto ʼi te Lao pea mo Apolose, ke mole puli he meʼa ia naua.+
14 Kae ke toe ako e ʼotatou tehina te fai tuʼumaʼu ʼo te ʼu gaue lelei moʼo tokoni ki te ʼu meʼa ʼae ʼe ʼaoga fakavilivili,+ ke fua lelei tuʼumaʼu tanatou gaue.+
15 ʼE ʼoʼofa atu ia natou fuli ʼae ʼe nonofo mo au. ʼOfa age kia natou ʼae ʼe tui pea mo ʼoʼofa kia matou.
Ke nofo mo koutou fuli te ʼofa makehe ʼo te ʼAtua.
Nota
^ Vakaʼi Te ʼu Kupu.
