Ko te Tohi-Tapu ʼe ko te folafola ʼa te ʼAtua neʼe tohi ke felogoi ai mo tatou fuli. ʼE fakaafe tatou ke tou ako ke tou iloʼi ai Ia ia ʼae neʼe ina tohi. (Soane 17:3; 2 Timoteo 3:16) ʼE fakaha ai e Sehova ʼAtua tana fakatuʼutuʼu ki te hahaʼi pea mo te kele ʼae ko tonatou nofoʼaga.—Senesi 3:15; Fakaha 21:3, 4.

ʼE mole ʼi ai he tahi age tohi ʼe ina lava fetogi te maʼuli ʼo he tahi. ʼE uga e te Tohi-Tapu ke fakaha te ʼofa pea mo te manavaʼofa ʼo Sehova. ʼE ina foaki mai he ʼamanaki ʼe feala ai ke tou katakiʼi ʼotatou fihifihia. Pea ʼe ina fakaha te ʼu meʼa fuli ʼae ʼi te malamanei ʼe mole alu tahi mo te finegalo ʼo te ʼAtua.—Pesalemo 119:105; Hepeleo 4:12; 1 Soane 2:15-17.

ʼI te kamata neʼe tohi te Tohi-Tapu ʼi te Fakahepeleo, mo te Fakaalamea pea mo te Fakakeleka, neʼe fakaliliu katoa peʼe fakakoga ia lea ʼe 3 000 tupu. ʼE makehe tona fakaliliu pea mo tona ta ʼi te Hisitolia. ʼE mole tou punamaʼuli ki te faʼahi ʼaia he neʼe fakakikite ʼi te Tohi-Tapu: “Ko te logo lelei ʼaeni ʼo te Puleʼaga [te logo maʼuhiga ʼi te Tohi-Tapu] ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.”—Mateo 24:14.

ʼE matou iloʼi ʼe maʼuhiga te Tohi-Tapu koia ko tamatou fakatuʼutuʼu ke maʼu he fakaliliu ʼe totonu mo alu tahi mo te ʼu ʼuluaki tohi taputapu, pea ke toe faigafua tona lau. ʼI te ʼu koga ʼaeni: “Te ʼu Pelesepeto ʼo Te Fakaliliu ʼo Te Tohi-Tapu,” mo “Te ʼu Agaaga ʼo Te Fakaliliu ʼAeni,” pea “Neʼe Puipui Feafeaʼi Te Tohi-Tapu ʼo Kaku Mai Ki Te Temi Nei?” ʼe fakamahino ai te ʼu manatu neʼe takimuʼa ʼi tamatou faifakaliliu.

ʼE fia maʼu e natou ʼae ʼe ʼoʼofa kia Sehova pea mo fia tauhi kia te ia he fakaliliu ʼo tana Folafola ʼe totonu mo faigafua tona lau. (1 Timoteo 2:4) Koia ʼe matou ta te Tohi-Tapu Fakaʼuvea ʼaeni te Fakaliliu ʼo Te Malama Foʼou he ʼe matou loto ke maʼu ʼi ni ʼatu lea kehekehe. Naʼi kau lautohi ʼae ʼe kotou kumi te ʼAtua ʼe matou faikole ke tokoni atu te Tohi-Tapu ʼaeni ke fua lelei ai ʼakotou faiga ke kotou ‘kumi ia te ʼAtua pea mo maʼu moʼoni.’—Gaue 17:27.