Iche Biblias iyhaj toj pajche, malhyej (ep hote) Scío de San Miguel wet Reina-Valera (en español edición de 1909), toj ichumyenlhi nʼolhomet infierno toj ihi iyhaj versículos (Salmo 16:10 [15:10, Scío de San Miguel]; Apóstoles Lhenhay 2:27 a). Wujpe wichi imatitche toj infierno hope tʼat itaj toj wichi toj niʼisa ihi lewhay toj yʼinhen, malhyej toj ihi nʼopeyak toj ikapha. Mat Biblia lechufwenyajitʼa tajtso.

Toj ihi articulona natetshanla:

•  ¿Ha hope infierno lhip toj nʼothate wichi hopkhilak lepʼaltsenyaj ihi pajlaʼtha tiyajʼattsiy?

•  ¿Atsi toj hope nʼotechʼaynek toj yome hinʼu toj hiwʼen mʼayek wet Lázaro?

•  ¿Ha matche toj elh toj ihi infierno hop toj atofwehla Dios?

•  ¿Ha iche pʼante elh toj tapil toj talho infierno?

•  Textos bíblicos toj yomeje infierno, wok nʼopʼitseyhay lewʼet

•  Griego wet Hebreo lhomtes toj Biblia ichumyenlhi pʼante

•  Infierno lechufwenyaj laka historia

 Kha. Iche Biblias iyhaj toj pajche toj ichumyenlhi nʼolhomet «infierno» toj ithate Hebreo lhomtes Seol wet Griego lhomtes Hades. Nʼolhomtesna yome nʼopʼitseyhay lewʼet. Biblia inʼalit toj wichi toj yʼinhen toj ihi nʼopʼitseyhay lewʼet ilayhihichetʼa, nemhit iche.

•   Wichi toj yʼinhen toj ihoho nʼopʼitseyhay lewʼet mʼak ihanhiyejtʼa wet letelaythayaj ihihitʼa. «Tsi lhip tä lehoye tä häpe honhat tä nʼopʼitseyhay lewʼet, ihichetʼa nʼochumyaj, wok nʼotichunhayaj, wok nʼotäfwnhayaj, wok nʼohanyhayaj» (Eclesiastés 9:10). Infierno ihichetʼa nʼopʼaltsenyaj. Biblia yome toj yok: «Mat häp wichi tä niʼisa, häp tä is chik nʼäfwelhen. Is chik yok tam tä ihi honhat tä atojchä tä nʼopʼitseyhay lewʼet [«infierno», La Biblia del Oso]» (Salmo 31:17 [31:18, La Biblia del Oso]; 115:17).

•   Hinʼu tʼilek hope tʼat lechʼisukyaj toj tamenej, hopkhitʼa toj itaj hipʼo. Dios ifwenho pʼante hinʼu toj ichun, Adán, che nichʼahuyaye Dios yʼinhila tʼat (Génesis 2:17). Ihichetʼa pʼante lewhay che Dios ifwenho toj tiyajiyela infierno wet lepʼaltsenyaj ihi. Toj paj , Adán iwo lechʼisukyaja wet Dios ifwenho pʼante mʼak toj ihiyeja: «Tsi ahonhat tʼat wet lewelanla honhata» (Génesis 3:19). Adán nemhit iche. Che Dios ithate infierno, ifwenihotʼa pʼante. Ifwalasna, elh toj ichʼahuhiyetʼa Dios laka leyes hate iwoye mʼak toj iyej pʼante Adán. Wujpe lewhayis toj tafwaytsi toj Adán yʼil, Dios neʼtek lakawo ilesayen: «Tsi mʼak tä yʼakalhihlä lhasukyaj häpe tʼat lhatʼilek» (Romanos 6:23). Tajtso nayet tʼat, «Tsi elh tä pajche yʼil, tafwayej tʼat nʼosukyaj lakhajyhayaj» (Romanos 6:7).

•   Ihichetʼa lewhay che Dios yen tichunhayaja toj hipʼaltsenwetha wichi yamlek tiyajʼattsiy (Jeremías 32:35). Hop infierno tatayhla Biblia lechufwenyaj toj yok: «Dios häpe tʼat nʼohumnhayaj» (1 Juan 4:8). Lham ihuminche toj nanʼokwiyej hop toj nahumin, wet hopkhitʼa toj nanowaye che nʼahipʼaltsenwetha yamthilek tiyajʼattsiy (Mateo 22:36-38).

•   Iche iyhaj wichi toj isen toj tiyajo infierno. Iche Biblias toj ichumyenlhi nʼolhamet infierno hate yome toj hinʼu toj tʼifwtiyej Dios, malhyej Jacob wet Job, lhamel yome p’ante toj ihohiyela infierno (Génesis 37:35; Job 14:13). Wet hate Biblia yome toj Jesús ihi pʼante infierno lewhay toj yʼil pajtha inupha (Apóstoles Lhenhay 2:31, 32). Toj malhyejtso, kalelhaj toj lewhay toj Biblias ichumyenlhi nʼolhamet infierno, hope tʼat Nʼopʼitseyay lewʼet. b

 Nʼotechʼaynekna toj Jesús ifwenho pʼante ihi Biblia lhip toj Lucas ilesayen, Lucas 16:19-31. Nʼotechʼaynhay hopehen pʼalhalis toj ichufwen namejen lhakeyis wet mʼayhay toj espirituales. Toj malhyejtso, nʼotechʼaynek toj yome hinʼu toj hiwʼen mʼayek wet Lázaro hopkhitʼa mʼayhay toj matchehen (Mateo 13:34). Chik lehuminchek letʼuhlak lhekchufwi lehanej nʼotechʼaynektso, tʼukwe artículo «¿Atsi toj hope nʼotechʼaynek toj yome hinʼu toj hiwʼen mʼayek wet Lázaro?».

 Kha. Nʼochufwenyaj toj yome toj wichi toj niʼisahen toj yʼinhen yikchufwi toj ihanej toj pʼalitses hop toj atofwehla Dios mathichetʼa, hop toj malhyej toj Biblia lechufwenyaj yome toj nʼopʼitseyhay mʼak ihanhiyejtʼa (Salmo 146:3, 4; Eclesiastés 9:5).

 Matche. Biblia ipayen name nueve wichi toj yʼinhen pʼante wet lhamel ihoye nʼopʼitseyhay lewʼet (elhpej Biblias yome toj hope «infierno» wok «itaj»), wet toj paj lhamel inukwepha. c Chik lhamel ilayhiche lewhay toj ihi infierno, lhamel ifwel mʼak toj hiwʼen. Mat, ihichetʼa elh toj ifwel toj lepʼaltsenyaj ihi wok hiwʼen mʼayhay. ¿Atsi toj tamenej? Hop toj Biblia lechufwenyaj yome toj lhamel mʼak ihanhiyejtʼa, malhyej che «imahen» (Juan 11:11-14; 1 Corintios 15:3-6).