Iwoye. Dios yen lelhakliya lakawos toj t’ifwtintses toj t’inhayaj ihi. Hop Biblia yomeje lhamel toj «che tʼinhayaj ilän, hiwʼenhihola lakhajyhayaj» (Salmo 41:3). Hop toja tres m’ayhay toj iwoyek namel nawoye hopkhilak natelaytej che iche lhat’inhayaj toj lecha ihihit’a toj inamejen:

1.   Nat’alhe Dios lech’otyaj hopkhilak natumla. «Nʼotamsek tä tälhe Dios, tä häpe mʼak tä inuʼpe nilhokej nʼohanyaj», tach’otla namehen toj nemhit wuj toj nen tichunhayaja wet hiw’en namhomche lhakhajyhayaj toj nawatla hopkhilak natelaytej (Filipenses 4:6, 7).

2.   Is che naw’en lhatichunhayaj toj isen. Dios Lhomtes yok: «Chik ohusek lakäjyaj ihi, häpe tʼat kacha tä is. Mat chik ohusek lefwitajayaj ihi, okhajyhayaj ihihitʼa» (Proverbios 17:22). Che natichunejlhi m’ayhay toj hiw’en namhohen lhakhajyaj, lhafwitajayaj wuijt’ala wet isyenla lhat’isan.

3.   Nam takhajay lhaniwhayaj. Lhaniwhayaj tach’ot namehen toj lhakhajyaj ihi, tej toj inamejen lhat’inhayaj at che hope (Romanos 12:12). Hop Biblia yome t’at toj ihichela ifwala toj ihichet’ala wichi toj yok: «Otʼinhayaj ilännʼo» (Isaías 33:24). Dios itayhtila nilhokej n’ot’inhayajay toj ciencia ikalhihit’a che itayhten. Hate, lhimpajpej itayhtila m’ayhay toj ichaje toj n’oelh hich’ut , hop toj Biblia yok: “Mälhyejtso tʼisan yäpnhihola che is, wet tehlat iwoye täjte kamaj mamse” (Job 33:25).

 N’osilot: Wichi toj yen Lhometa Heowa, olhamel ot’ekhaye Dios lech’otyaj toj hiw’en n’ohohen, mat hote olhamel ohoye kachawo che olhamel ot’inhayaj ihi (Marcos 2:17). Tej toj malhyejtso, olhamel onityenhiyejt’a iyhaj che ichumyenlhi tratamientos at che hope, hop toj w’eihalhapej ikalelhtila m’ak toj iwohiyela hopkhilak is t’isan.