¿Atsi m’ak toj is che iwoye n’ojchalis wet n’okolis hopkhilak ichufwenej leles m’ayhay toj yiwtejla n’owanyajay?

REPRODUCIR EN

Biblia lechulhyaj

Biblia yome toj n’ojchalis wet n’okolis lechumet toj ichufwenej leles m’ak toj yiwtejla n’owanyajay. N’ofwonyajayna tach’ote wujpe n’ojchalis wet n’okolis:

Yej n’afwelh. Biblia kalelhaj lewhay toj yome n’owanyajay. Dios yome p’ante toj Israel lhayis toj «nä’tshas» hote is che lhaichufwenej m’ayhayna (Deuteronomio 31:12; Levítico 15:2, 16-19). Iwoyek let’amajej amtes che lekatla m’ayhay toj yiwtejla n’owanyajay, toj hopkhit’a m’ayhay toj is che n’oelh n’afwelh toj yome.
Chufwenpej ales. Lhimpajpej chufwenej ales che ihanej m’ayhay toj yiwtejla n’owanyajay toj yiklhaye toj manse wok lhutsha, mat isit’a che letataye che ales manses wok lhutshay hopkhilak lefwenho m’ayhayna (1 Corintios 13:11).
Che lhehi haw’et chufwenej lakeyis toj isen. Iche n’ochufwenyajw’etes toj ichufwenej na’tshas m’ayhay toj yiwtejla n’owanyajay. Mat Biblia inityenej n’ojchalis wet n’okolis toj isit’ak leles tajlhamet toj ihanej m’ak toj hope n’owanyajay, hote ichufwenej toj is che yam is lakey wet letichunhayaj toj itiyej n’owanyajay (Proverbios 5:1-23).
Ch’ahuye ales. Che ales y’atshan ame m’ak toj yiwtejla n’owanyajay yej kelitpa amet wet letiyej atichunhayaj toj ni’isa lhamel. Biblia yok: «Aʼen chʼahunaja, yej kelej chik letahuy» (Santiago 1:19).

M’ak toj is che lewoye hopkhilak ihichet’a elh che iwoyeje n’owanyajay ales

Ch’ote ales hopkhilak ihanej iwoyneje che iche elh toj iwatlak iwoyeje m’ak toj ni’isa

Tafwnhat amej m’ayhayna. Is che lehanej atsi m’ak toj iwoye iyhaj toj iwoyeje m’ak toj ni’isa na’tshas (Proverbios 18:15; tetshan capítulo 32 del volumen 1 toj ihi libro Lo que los jóvenes preguntan. Respuestas prácticas).
Tetshanpej m’ak toj ales iwoye. Isit’ak elh at che hope toj letafwnhiyejtʼa imalheyej ales, is che letafwelej elh che t’uye ales. Hote, isit’ak «[le]chʼanlhaye» che iwoye m’ak at che hope (Proverbios 29:15).
Chufwenej atsi lewhay toj is che iwoye m’ak toj n’otalhe. Na’tshas is che lhaichufwenej toj ich’ahuye lajchalis wet lakolis (Colosenses 3:20). Mat che am lechufwenej toj is che tach’ahuye elh at che hope, iwoyek elh at che hope itiyej n’owanyajay. Dios lakawos iwoyek ifwenho leles n’olhometna: «Che iche elh at che hope toj t’alh ame toj lewoye m’ak toj Dios ihumnhit’a, yej woye» (Apóstoles Lhenhay 5:29).
Chufwenej wet n’altej m’ak toj is che iwoye hopkhilak ihanej toj t’u lhame. Ch’ote ales hopkhilak ihanej iwoyneje che iche elh toj iwatlak iwoyeje m’ak toj ni’isa lewhay toj amel lhehit’a whaye. Chufwenej n’olhometna che amel lhehit’a whaye: «¡Yej tachas noye! ¡Ofwenhonla ojcha wok oko!». Lewhaytso is che lhekch’oye. Che iwoye tajtso iwohiyelak t’u lhamehen. «Tujlhache tä lechufwenejen ales» m’ayhayna, hop toj na’tshas hip’ethatla m’ak toj n’ofwenho (Deuteronomio 6:7).