Iwatlok letetsan Dios Lhomtes yomtilak letofwelej Dios. Pajche pʼante, Dios ekwe hinʼul wet hiwʼenho letichunayaj hopkhilak yenlhi wet itsonhi papel. Papel notsanhay pʼante athana hope Dios Lhomtes. Ifwalasna nilhokej wichi nitofwelej Dios chik itetsan Dios Lhomtes wuk hope Heowa Lhomtes. Iwuye che lamatitche Dios Lhomtes, Heowa ihichetʼe ayfwechʼenlhi: “Dios ihanhiyejtʼa chik wʼet yämlhi” (Hebreos 6:18). Dios Lhomtes yome mʼak toj matche (Juan 17:17).

Dios Lhomtes hope lhawañhat elh toj laha ihi toj tolhe Dios. Hoteʼiwuye nʼofwcha toj yahemen leles ilesayen carta nitikneklhi lhamil. Dios Lhomtes yome toj Heowa yeninhila honhatna toj yam toj wʼatshan wet isilataj hopkhila toj lehi. Hote yome mʼak toj yenlhi pʼante, athana wet yome mʼak toj yeninhila toj tatay alhuhu yomtilak hiwʼenho leles toj nileyayej. Hote Dios Lhomtes tachʼut ame inujfwat awithoy wet am lawʼen akojyaj mʼak toj matche (2 Timoteo 3:16, 17).

 Wichi toj yen lhometa Heowa hopehen Lham kalayʼis, tachʼut ame toj alechufwenej Dios Lhomtes. Lhamil iwatlok ichefwen amej Dios Lhomtes wet lewohitʼe haya, mat lhamil aychufwenla chik am letʼalhe (Mateo 10:8). Hote iwuye che am lehuye lhamil toj lhay hetu, toj lhey Wichi toj Yen Lhometa Heowa Lewʼet (Lawʼet). Chik lehuye toj lhay hetu, aytsihla toj letofwelej Dios.

Iwuye che letofwelej Dios chik letichenejlhi mʼak toj yenlhi pʼante. Dios Lhomtes yuk: “Dios yenlhi pule lhäyʼe honhat” (Génesis 1:1). Toj nechʼenyaya Heowa yenlhi “pule” hote yenlhi pʼante Fwala toj isi, ihetʼenpe honhat, hiwʼen nʼamho nichayu wet ihichetʼe che yumla. Toja ichefwen amej toj Dios hiwʼen wuj lakajnayaj wet lahanyaj. Tajlhame Lham iwuye pʼante toj yenlhi mʼak toj takhajay toj hope Fwala.

Mʼak toj Dios lhenay ichefwen amej toj Lham aihumen. Lhek tichina, Heowa iwuye pʼante che yenlhi unufwaj halʼo lhay wuk kha ¿ha matche? Mat, Dios yenlhi pʼante wujpe halʼo lhay toj wenchelhame toj wefw wet niwefwsa. Nilhokej toja ichefwen amej toj Heowa aihumen wet hote pʼaltsentsaj, hemnhatsaj wet nilhokej lawhoy Lham iwatlok hiwʼen nʼamho mʼayhay toj isis (Salmo 104:24).