Chik lewatlok ahope Dios lhoyfwa is che lawuye lenʼokhayaj toj matche. Jesús ifwenhu pʼante hop wichi toj is che nʼokwiyej mʼak toj “matche” hop laka Dios (Juan 4:23, 24). Iche wehialha lenʼokhayaj toj matche (Efesios 4:4-6). Hop religión toj matche ihon ame awʼatshancheyaj toj tʼun wet religión toj kamatache ihon ame aʼtʼilek.

Iwuye che letofwelej religión toj matche che latetshan mʼak toj wichi iwuye toj nʼokwiyej Dios toj matche. Hop wichi toj nʼokwiyej toj matche Dios, is che hoteʼiwuye Heowa toj naj lakeya. Hoteʼiwuye fwaʼayhuk toj is yenlhi lhay fwaʼay toj isis, hop religión toj matche yam lakeyis isis hop wichi (Mateo 7:15-20).

Heowa kalayʼis amajej toj iwuye mʼak toj yome Dios Lhomtes. Lhamil yahanej Dios Lhomtes toj tolhe Lham. Toj molhyejtsu, lhamil iwoʼnej che Dios Lhomtes ineʼhyenkwe lenoyij hop lewʼatshancheyaj, yomtilak nuj lawithoy wet nitofwelej lhoyʼa lhip Heowa (2 Timoteo 3:16). Hote, lhamil iwuye mʼak toj yen lhometa.

 Dios lhoyfwas lhayhemnhen. Jesús ipoyne lahemnayej wichi ichefwenej mʼak toj tolhe Dios, wet ichesten tʼinhayajay. Wichi toj iwuye mʼak toj religión toj matche ihemnhen iyhoj. Hoteʼiwuye Jesús, lhamil iwhawlhatʼcho nilhokej wichi, wichi toj pʼalitses wet wenhachelhamej. Jesús ifwenhu lachefwenkay toj matchehen toj lhayhemnhenlaʼat, wet wichi toj iyahin lhamil iʼhanhiyeja toj hope lachefwenkay toj matchehen (Juan 13:35).

Dios kalayʼis wujyen Dios Lhey: Heowa. Chik aʼelh che hope niwatanlok ichemyenlhi ey, ¿ha hope akalayʼi toj matche? Kha. Chik am lawʼen oyfwa is che lhomejlhi toj hope elh toj is wet lechemyenlhi lhey. Toj molhyejtsu, wichi toj iwatlok lhayenehen Dios kalayʼi is che ichemyenlhi Lhey wet Heowa iwatlok lhomejlhi lham (Mateo 6:9; Romanos 10:13, 14).

Dios lhoyfwas ichefwenej wichi hop Dios Niyatyaj, hoteʼiwuye Jesús. Dios Niyatyaj hope laniyatyaj toj ihi pele wet yanhilhila honhat toj wʼatshan wet isilataj. Dios kalayʼis ifwenhu iñhoj wichi mʼak toj Dios Niyatyaj (Mateo 24:14).

Wichi toj yen lhometa Heowa lhaykajyenej toj iwatlok Dios kalayʼis. Lhamil iwulehaya Dios Lhomtes wet lhayhemnhen. Hote lechemyenlhi wet wujyen lhey wet ichefwenehen wichi hop Dios Niyatyaj. Wichi toj yen lhometa Heowa iwuye mʼak toj religión toj matche.