Chik lawʼen akalayʼi toj lewoʼaya, lewatlok ahoteʼiwuye lham. Dios Lhomtes yuk: “Hapʼaltsentsaj häp Lhawuk wet is alhoho” (Salmo 25:8). Chik ahope Dios kalayʼi is che alhene wichi toj isen wet is alhuhu. Dios Lhomtes yuk: “Tenay Dios, tä ahäpehen leles tä lehumnhay. Wopej ahumnhayaja”. Hop tohesna iñhoj mʼayhay toj iwuye latenlo toj Heowa iwuye:

Chʼuta aiñhoj. “Tä yʼahanejpej yʼawoyneje, nʼatchʼoteje nilhokej iyhäj häp mʼak tä is” (Gálatas 6:10).

Enlhi achemet toj is. “Elh tä tʼetan, is che ileyej tä tʼetan, mat tachumlhi. Is che iwoye lechumet tä is” (Efesios 4:28).

Is che lalej atʼisan, hote akamʼayhay wet awʼatshancheyaj. “Nʼalej lhamchehen yämlek noj nilhokej lhachʼohle tä iyej lhatʼisanis lhäyʼe lhahusey, wet häp nhalhaimälhtejwek tä nʼalhayen tʼamajchetesayej Dios” (2 Corintios 7:1).

 Tiyej ahemnhayaj aʼwet lheley wet itihi imʼayek. “Mat amel häte, is chik hinʼo elh weihalhapej ihumin lechʼefwa, mälhyej tä lhaihumin, wet atsinha is chik tek yen wʼet mʼayeka lechʼefwa. Näʼtshas [...] woyayepej mʼak tä ajchalis lhäye akolis neʼtepej che lewoyaye, häp tä is alhoho täja” (Efesios 5:33–6:1).

Humnhen aiñhoj. “Nʼahumnhen iyhäj, tsi nʼohumnhayaj tälhe tʼat Dios” (1 Juan 4:7).

Tachʼahuye wet lawuye mʼak toj talha ame niyatey. “Is chik nilhokej wichi tachʼahuye niyatey tä iche [...]. Tiskanpe mʼak tä tʼuhawetej che letiskanpe. Che häpe impuestos, wo lahaya” (Romanos 13:1, 7).