Dios yahemen che lhen akalayʼiya. Dios lhenek honhat wet tʼula che am akalayʼi ¿ha pajche toj lahanej? Dios Lhomtes yome, pʼante pajche hinʼu toj lhey Abraham, Dios yen lakalayʼiya (Santiago 2:23). Hote pʼante iñhoj hinʼul wet tsinhay toj akosefwetho toj hopehen Dios lhoyfwas. Lham hiwʼenho pʼante lhamil lakopfwayaj. Ifwalasna wujpe wichi toj iʼpe honhat ikalhitʼat toj lhayen hopeya Dios lakalayʼis. Hote am lakalhila che alhen hopeya Dios lakalayʼis.

Che alhen Dios lakalayʼiya wuj toj is inʼetpe wichi toj iʼpe honhat. Akalayʼis toj iʼpe honhat lahanej che aiwum, mat Dios ha ihichetʼe che aiwumla, ihichetʼe ilelʼa amej (Salmo 18:25). Che ahope Dios lhoyfwa wuj toj is, inʼetpe tokalayʼis toj iʼpe honhat wuk hiwʼen mʼayhay. Wichi toj hiwʼen mayek chik yʼil ichojitʼe mʼak che hope, iñhoj lhayen lewuhuya. Athana wichi toj Dios lakalayʼis wuj toj is, hiwʼen mʼak toj matche toj laha ihi wet ihichetʼe hinʼu chik isohiyeja (Mateo 6:19).

Chejpho hila iche wichi toj nhuminache toj ahope Dios lakalayʼi. Chejpho hopehen hawʼet lheley wuk akalayʼis (Mateo 10:36, 37). Chejpho hila toj ilokwlhi am wet iwuynej ame mʼak toj niʼisa. Lhek tichun ame: ¿Atsi toj lewatlok akojlhi hope wichi wuk Dios? Che a elh yuk: “Yajtek”, ¿hala tachʼahuye? ¡Kha! Che kha tʼeka latinla. Lahanej tachʼut ame latʼinhitʼela, Dios iwuye che hiwʼen amho awʼatshancheyaj toj laj lepesa. Toj molhyejtsu yej chʼanlhaye che elh che hope fwitaj ilehat amej toj alechufwenej mʼak toj tolhe Dios (Juan 17:3).