Chik lewatlok ahope Dios lhoyfwa is che letofwelej Lham. ¿Ha akalayʼis yahanej ey wet iwu eya? Toja hop mʼak toj matche. Dios yahemen che lahanej wet lewu lheya. Dios lhey Heowa (Salmo 83:18; Mateo 6:9). Hote am alechufwenej mʼak toj yahemen Dios wet toj nemnache, is che letofwelej Dios lhoyfwasa lhoyʼa latayhfwas. Chik lewatlok letofwelej aʼelh pajla lawhoy, hoteʼiwuye Dios Lhomtes yome iwu kotsayej nilhok lawhoy toj lakalhi yomtilak letofwelej Heowa (Efesios 5:15, 16).

Dios lakalayʼis iwuye mʼak toj Dios yahemenche. Lhek tichina akalayʼis, chik lawuyehen mʼak toj niʼisa wet mʼak toj nemnache, ¿ha kamaj hopkhila akalayʼis? Kha. Hote iwuye, chik lewatlok Dios akalayʼi is che lawuye mʼak toj Dios yahemen (Juan 4:24).

¿Ha tachʼut ame nilhokej religiones yomtilak ahope Dios kalayʼi? Kha. Jesús hope Dios lhoyfwa toj matche toj is, lham yome toj dos noyhij. Noyhij toj tachen tsajche wet wujpe wichi toj tyojche noyhijtsu ichoj amey aʼtʼilek. Iche elh noyhij nitsajache nitakwitʼe wichi toj tyojche noyhijtsu ichoj amey awʼatshancheyaj toj tʼun. Toj molhyejtsu, chik lewatlok Dios hope alekalayʼi is che lahanej aʼnʼokwiyej toj letiyej (Mateo 7:13, 14).