Ifwalasna mʼak toj niʼisa toj iʼpe honhat ifwel namhuhen toj tatay lhimpaj wet nom alhuhu honhat toj wʼatshan wet isilataj. Dios Lhomtes pajche pʼante yuk ihichela ifwalas toj wuj toj niʼisahen. ¿Atsi lawhoy che nomla ifwalastso? Athana nehi ifwalastso wet tatay lhimpaj hopkhilak nom honhat toj isilataj. Dios Lhomtes yome mʼak toj iche ifwalasna, natetshan.

Wuj nʼokaʼtshayaj toj iche. “Tsi wichi tä ihiche honhates tatayhlawek, wet niyatey iwohla lakaʼtshayajayej niyatey iyhäj” (Mateo 24:7). Dios lhomtesna hopehen mʼak toj matche. Tolhe toj 1914 iche pʼante dos nʼokaʼtshayajay toj iʼpe nilhok honhat wet wujpe iñhoj nʼokaʼtshayajay lalemsas. Millones wichi toj yʼinhen toj ihi nʼokaʼtshayajay.

Nʼotʼinhayajay nilhokpe honhat. “Ihichela [...] tʼinhayajay tä ihiche honhates” (Lucas 21:11). ¿Ha lawʼen mʼak toj Dios Lhomtes yome? Matche lawʼen ifwalasna iche cáncer, tʼutle tʼinhayajay, mal de Chagas, SIDA, fiebre amarilla, tuberculosis wet lhoyʼa iñhoj tʼinhayajay toj ilhonhen millones wichi.

Iche lhimpaj mʼak toj tefw. Nilhokpe honhat iche wichi hiwʼen lhimpaj mʼak toj tefw. Millones wichi toj yʼinhen toj naylos (nehläs) ilhonhen nilhokej nekchomis. Toja hope lateknek toj yome toj nomla honhat toj wʼatshan wet isilataj. Dios Lhomtes yome: “ihichela honhat [...] nehläs” (Marcos 13:8).

 Iche wujpe honhat wʼahu. “Ihichela [...] honhat wʼahu tä äytesiche tä ihiche honhates” (Mateo 24:7). Toja hope lhomtes tolhe toj 1914 iche wujpe honhat wʼahu toj ilhonhen wichi toj inetpe millon.

Iche wichi toj fwitses. “Ihichela wichi tä lhamel tʼat tä lhaihumnhen, wet nilhakʼalej chinaj tʼäj”. Lhamil “iwohla yiya mʼak toj lhamel tʼat tä tʼakänyajay”. Leles “tachʼahuhiyetʼala lhokwey” (2 Timoteo 3:1-5). ¿Ha iche ifwalasna mʼak toj hotehentsu? Wichina iwohitʼe haya Dios wet iwuyeje mʼak toj niʼisa elh toj iwatlok toj nitofwelej Dios.

Iche elh ilon wet etantses. Hote “lhäyʼehila lhip mʼak tä niʼisa” (Mateo 24:12). Am lawʼen toj lhoyʼa lhip mʼak toj niʼisa nilhokej ifwalas inʼetpe lawhoy toj pajche. Nilhokpe honhat iche etantses (iskat), ifwe chenlhi, iwuynej amej mʼak toj niʼisa.

Nilhokej mʼak toj hotehentsu ipoyenhama toj tatay lhimpaj che nom Dios Niyatyaj. Dios Lhomtes yome: “che lewʼenay häp mʼayhay tä oyämetso, hanayej tä nämla Dios Niyatyaj” (Lucas 21:31). Mat, ¿atsi toj hope Dios Niyatyaj? Hope Dios laniyatyaj toj ihi pele toj yeniyela honhat toj wʼatshan wet isilataj. Tataytila nʼoniyatyaj toj iʼpe honhat wet tajlhamet laniyatyaj toj ihichela (Daniel 2:44).