Hop nʼotʼilek hope hiwʼenhitʼe nʼowʼatshancheyaj. Hope molhyej nehati (Juan 11:11-14). Wichi toj yʼinhen nemhi ilotchehonhat, nemhi hiwʼenchehonhat, nemhi latichunayaj ihi (Eclesiastés 9:5, 10). Hop religión toj kamatache yome wichi toj yʼinhen yik ihuye elh lhip wet yikʼatchufwi toj iloy, iyej iñhoj toj yʼinhen. Mat tajtso Dios Lhomtes ichefweniyejʼa.

Wichi toj yʼinhen iwuhiyeʼa tachʼut ame wuk iwuawitʼoya. Ichepej toj nhawʼen wichi yikche nʼokʼeylis toj itiyej nʼopʼitsek, lhamil yenek nhopʼitsek yahemenche. Mat Heowa yahemenitʼe lakeyis toj tolhe unufwaj matitʼe toj Ahottaj. Hote nhopʼitsek yahemenitʼe che iñhoj wichi iloy iwuye mʼak che hope, tsi lhamil hiwʼenhitʼe nʼowʼatshancheyaj. Toj molhyejtsu, isitʼe che haʼnowaye wuk nʼokwiyej hop nʼopʼitseyhay. Tajlhame nhanʼokwhiyej Dios (Mateo 4:10).

Wichi toj yʼinhen yachahola toj iloy. Lawhoy tatay alhuhu Heowa inehʼtichepanla hop wichi toj yʼinhen yomtilak iloy iʼpe honhat toj wʼatshan wet isilataj (Juan 5:28, 29; Apóstoles Lhenhay 24:15). Am iwuye laneyatpo aʼelh toj imo, hoteʼiwuye Heowa inehʼtichepanla wujpe wichi toj yʼinhen (Marcos 5:22, 23, 41, 42).

Ahottaj ichefwenej wichi yʼinhihenʼa wet wujpe wichi techaye tajtso matiʼe. Ahottaj wet ahot lhayis yahemen che wichi nitichenejlhi toj espiritus toj tolhe wichi toj yʼinhen kamaj iloyhiche wet tamenej toj tʼinhayajay ihi wuk lawithoy ihi. Ahottaj ifwe chenlhi wichi, itiʼhi lafwilek wuk lawʼenhay. Toj molhyejtsu, Heowa yahemenitʼe wichi toj fwetaj tahuyej nʼopʼitseyhay (Deuteronomio 18:10-12).