Dios lhomtes yome toj Ahottaj “ikanej nilhokej wichi tä iʼpe honhat” (Apocalipsis 12:9). Lham wet ahot lhayis ihuminhitʼa che letʼechaye Dios Lhomtes. Lhamel ikanej wichi wet yomejlhi wichi toj pajche yʼinhen kamaj iloy ihi lhip toj wichi toj yʼinhen lewʼet. Lhek natetshan.

Wujpe religiones ichufwenej nilhokej wichi toj iʼpe honhat toj hiwʼen mʼak toj tolhe hinʼu toj yʼil wet kamaj iloy. Lhamel yomey toj che hinʼu toj yʼil mʼak toj ihi kamaj iloy wet ihoye lhip toj wichi toj pajche yʼinhen lewʼet.

Mat, Dios Lhomtes lechufwenyajhitʼe mʼaktso. Techʼaynej, Dios Lhomtes toj yome lawhoy toj yenlhi pʼante Adán: “Dios tachuma lhip honhat wet yenlhi tä yen hinʼoya. Wet yafwutche lenhus wet hiwʼenho lewʼatshancheyaj. Wet mälhyej pʼantetso tä iwo tesa tä iche hinʼo” (Génesis 2:7). Dios itihihitʼe pʼante mʼak che hope toj nʼinʼola Adán tʼisan wet toj yʼil kamaj iloy.

Dios Lhomtes yome toj hinʼu toj pajche yʼil nemhi iche mʼak che tolhe che kamaj iloy. Hop hinʼu toj imalhewek toj yʼil  iwuhiyeʼa mʼak che hope wuk iwitʼayen iyhoj.

• “Elh chik iwo lechʼisukyaja, häp tä yʼinhila” (Ezequiel 18:4).

• “Wet yʼinhen, yachajo tä honhat tʼat, wet noj häp mʼayhay tä iwaklhat yämtilek iwoye” (Salmo 146:4).

Nʼolhomtes iyhoj inolit toj wichi wet tshotoy yʼinhen (Eclesiastés 3:19, 20). Wichi toj yʼinhen nemhi iche letichunhayaj (Eclesiastés 9:5,10). Toj molhyejtso, lawhoy toj hinʼu yʼil nemhi iche mʼak che tolhe che kamaj iloy.

Che leyahyen Dios Lhomtes imalhewek, lewʼenla toj ihichetʼe nʼolhomtes che yome wichi toj yʼinhen che ihuye lhip elh. Hinʼu toj yʼil nuj, nemhi hiwʼen lewʼatshancheyaj. Hop nʼochufwenyaj toj yome toj iche lhip toj wichi toj yʼinhen lewʼet ihihitʼe Dios Lhomtes. Hop nʼochufwenyaj toj tolhe Ahottaj wet ahot lhayis. Heowa noyehu hop religiones chufwenyajay toj kamatachehena (Proverbios 6:16-19; 1 Timoteo 4:1, 2).

Ahottaj ikanej wichi ihone hiyawu. Hop hiyawu hope hinʼu che iwuye che tachemlo nʼosilatyajay toj tolhe lhip toj wichi toj yʼinhen lewʼet. Wujpe wichi, hote hiyawu, imatitche nʼosilatyajaytso toj tolhe wichi toj pajche yʼinhen. Mat, Dios Lhomtes inolit amej toj mʼaktso maticheʼa (Eclesiastés 9:5, 6, 10).

Toj molhyejtso, ¿atsi toj tolhe nʼosilatyajaytso? Tolhe tʼat ahot lhayis. Lhamel iwuye toj hiwʼen wichi toj iloyhiche wet ihanej lhomtes, chi molhyej pʼante, atsi mʼak toj lhamel iwuye pʼante wet mʼak toj lhamel letichunhayajay. Toj molhyejtso, ahot lhayis athahitʼa che itenlo wichi toj pajche yʼinhen (1 Samuel 28:3-19).

Ahottaj ihone pʼalhalis toj ka- matachehena ikanej wichi, iwatlok wichi imatitche toj nʼopʼitseyhay kamaj iloyhiche. Mʼayhayna itiyej kanhi mʼak toj matche hop wichi (2 Timoteo 4:4).

Ihi África iche wujpe pʼalhalis toj wichi ilote toj yome toj wichi toj yʼinhen pʼante nʼowʼen toj iloyhiche. Wujpe wichi yome toj  wichitso nʼowʼenpej toj atofweʼla lhip toj ihi pʼante. Tʼotshan ame: chik wichina yachajo toj iloyhiche ¿ha atofweʼla pʼiya lewʼet lheley wet lakalayʼis?

Hote iwuye, chejpo hila iche hinʼu toj hiwʼen elh toj nichotche hinʼu toj pajche yʼil ¿ha molhyejtso? Lhek tichunla toja, iche pʼante dos wichi toj iwo silotyaja toj ihi nʼokaswʼet, lhamel hiwʼen pʼante hinʼu toj hichetfwaj wet ihon wichitso lenʼayij. Lhamel yʼotshana lham: “¿Atsi toj tamenej toj lehon olhamel onʼayij?” Hinʼutso yeneʼche tefwajni hinʼu elh toj iwo silotyaja hope elh lewʼet lhele toj pajche yʼil. Mat, nʼowumektso yeneʼche is alhoho lhomtes wet iwuhiyeʼa toj nʼoyʼamhoplhi. ¡Lhek tichunla mʼak toj yome hinʼu toj hichetfwajtso toj ifwenho lakalayʼis wet wichi toj iwhoye lewʼet!

Chejpo hila am lahanej mʼayhaytso toj wichi hiwʼen, ilate wet tafwilhanej pʼante. Iche wujpe mʼayhaytso istunhen wichi. Marein, toj ihi pʼante África, ilotepej lakatela toj pajche yʼil lepak toj honatsi. Lham matche pʼante toj nu way, ineyatchepo pʼante nilhokej lewʼet lheley wet tʼonlhi pʼante. Atsinhana toj paj nemhi yahanej honhat.

Chik hinʼu toj pajche yʼil kamaj iloy ¿ha lematitche toj lham istunwetʼa pʼiya lewʼet lheley? Matche toj nimatache. Nilhokej nʼosilotyajayna tolhey ahot lhayis.

Iche nʼosilatyajay toj teʼhap che nʼoelh isiyeja. Atsinha toj lhey Gbassay, toj ihi Sierra Leona tʼinhayaj ilon pʼante. Lham hiwʼen pʼante lafwilhek tafwilhanej lajcha toj yʼil pʼante, hinʼuna ifwenhu atsinhatso toj is che ihoye halʼo wet ilanhi lawʼule, toj paj ilhaʼtej halʼo wuletso inot wet iyoyej. Mat, isiʼa che ifwenho wichi iyhoj. Atsinhana tachʼahuye mʼayhaytso wet lhaichesat.

Atsinha elh yomeʼte lechʼefwa toj pajche yʼil hiwʼen pʼante toj honatsi wet hiwʼen toj is tʼat wet isis lakoy.

 Nʼosilotyajaytso wet nʼowʼenhaytso toj teʼhap che nʼoelh isiyeja. ¿Ha tolhey Dios? Kha, tolheyiʼa Heowa. “Dios tä ahäpe mʼak tä matche” (Salmo 31:5). Heowa haniyejʼala che aifwechʼenlhi. Tajlhamet ahot lhayis toj iwuye tajtso.

Mat, ¿ha iche ahot lhayis toj isen? Kha. ¿Ha lematitche tachʼot ame? Kha, nilhokej lhamel fwitses. Lawhoy pʼante Ahottaj tahuyej Eva, lhayen pʼante elh toj is (Génesis 3:1). Mat, ¿atsi pʼante toj iyej hop Eva toj tafwaytsi toj tachʼahuye Ahottaj? Atsinhatso yʼil pʼante.

Am lahanej toj wuj wichi lhayenehen iyhoj toj isen hopkhilak ifwechʼenlhi wichi iyhoj wuk isuyej mʼak che hope. Dios Lhomtes yuk: “Satanás ihanej tä lhaitechʼaynej ángel tä isi” (2 Corintios 11:14).

Dios nemhi tahuyej wichi toj iʼpe honhat che ihone nʼofwilhey, nʼowenhay, nʼopakas wuk espíritus. Lham ineʼyenkwe wet ichufwen wichi toj ihi honhatna ihone Lhomtes.Wichi toj lhaichufwenej Dios Lhomtes iwuyek “wakʼalh tʼat yämthilek iwoye nilhokej mʼak tä is” (2 Timoteo 3:17).

Heowa ichufwen namejen mʼayhayna toj niʼisa toj tolhey Ahottaj tsi naihumnhen. Lham ihanej toj ahot lhayis hopehen nʼolhikoy lhayis.