Nilhokej namel iwuye nayahin wet natshupyene elh che hope, chumoplhi Heowa wuk Ahottaj wet ahot lhayis. Iwuhiyeʼa che nawuye dos mʼayhayna. ¡Matche toj lehan onhatej che letachumoplhi Heowa!

Molhyej toj natetshanne, Ahot lhayis iwatlok iwitʼayen iyhoj wichi wet ifwechenlhi. Heowa hopkhitʼe molhyejtso. Lham ihumin wichi molhyej nʼojcha ihumin leles. Molhyej toj lhomtes yome: “Nilhokej mʼak tä isen tä yʼakatej, wok oyok, lhatwʼayhtes tä nʼaisej, tälhe Dios” (Santiago 1:17). Heowa nʼoyejitʼe mʼak toj is, hiwʼenho wichi, tej toj pʼalitsaj Lham (Efesios 2:4-7).

Lhek tichunla mʼayhay toj iwuye pʼante Dios lhos, Jesús, toj ikana honhatna. Lham iwuye pʼante ichesat hop elh toj nomalhi, asnamis, tsefwlas, amostas lanek, yokwespa ahot lhayis wet ichesat nilhokej nʼotʼinhayajay. Lham isej Dios lakhajyhayaj ineyatpo wichi toj yʼinhen (Mateo 9:32-35; 15:30, 31; Lucas 7:11-15).

Dios ihanhiyejtʼe che wʼetahuylhi, yome mʼak toj matche ifwalapej. Lham ihanhiyejtʼe ala che aifwechʼenlhi (Números 23:19).

Hote iwuye atas toj nichato chohot kaniyhay, millones wichi toj iʼpe honhat nichato nʼotʼekhanyajay toj nʼotiyej mʼayhay toj kamatachehen. Nuwaye wichi toj yʼinhen, nuwaye ahot lhayis. Yen lhakliya mʼak toj hiyawu iwuye lhoyʼa toj itatej elh mʼak toj niʼisa wuk lhamel che nʼotatej mʼak toj niʼisa. Wichina nahahi mʼayhayna toj tolhe Ahottaj Satanás. Dios lakawos nahahitʼe mʼayhaytso.

Chik am letachumhoplhi Heowa, tʼamajila amej hopkhilak ahot lhayis nemhi aiwitʼaya. Mʼayhay toj wichi itat ame nemhi aiwitʼayen. Hop toj Heowa lhoyʼa lhip toj takhajay, inetʼpe Ahottaj (Santiago 4:7). Tres hiyawul toj ihi Nigeria toj lhoyʼa lhip toj takhajayhen, iwatlok ilon hinʼu toj yen lhometa Heowa toj niwatanlok yikchʼoye lhip toj lhamel ihi, itatej tʼat mʼak toj niʼisa. Lawhoy toj hiyawul nikalhahi mʼak toj iwuye, tefwajni elh lhamel nuway wet ihoye hinʼu toj yen lhometa Heowa wet tʼalhe chik nʼopʼaltsen.

Chik ahot lhayis ayhonlhi iwuye latʼonla Heowa lechemyenlhi Lhey wet Lham tʼamajila amej (Proverbios 18:10, NM). Mat, Dios hiwʼenla amho letʼuhyaj tajlhamet chik leleyej imalhewek nilhokej mʼayhay toj tolhey wichi toj tahuyej ahot lhayis wet toj nʼokwiyej ahot lhayis. Dios lakawos pʼante toj ihi Éfeso iwuye pʼante tajtso. Lhamel ihutwek laka libros toj  yomey hiyawul chumtes wet iwunhomche (Apóstoles Lhenhay 19:19, 20). Ifwalasna Dios lakawos is che iwuye tajtso. Is che leleyej mʼayhay toj hiwʼen amho suerte, lehoye hiyawu toj letʼotsane mʼak che hope wuk mʼak che hope toj tolhe wichi tahuyej ahot lhayis.

Chik am lewatlok akojlhi Dios, is che leleyej mʼayhay toj tolhe religión toj kamatache. Mat, hote  is che leleyej toj lawuye mʼayhay toj niʼisahen. Am is che letachumlhi lemalhetwek akhajyhayaj toj letiyej religión toj tsʼilak. Dios Lhomtes inolit mʼayhay toj Heowa iwatlok che am lawuye:

Ahottaj wet ahot lhayis hiwʼen toj ihi honhatna wichi toj ichufwenej wet iwuye mʼayhay toj niʼisa alhoho. Mat, Heowa hote hiwʼen laka wichi, hopehen wichi toj yen lhometa Heowa (Isaías 43:10). Nilhokpe honhatna iche inetʼpe siete millones wichitso. Nilhokej wichina lhaikhajyenej toj iwuye mʼak toj is wet ichufwenej wichi iyhoj mʼak toj matche. Nilhokej honhates iwuyek lewʼen lhamel toj ihi wichi toj yen lhometa Heowa Lewʼet, lhiptso lhamel wujla lehumnhayaj toj itiʼahilo.

Lechumet hope toj tachʼote iyhoj hopkhilak techumhoplhi Dios. Lhamel ichufwenla amej Dios Lhomtes, ihila hawʼet wet ichufwenla amej chi molhyej toj lenʼokwiyej Heowa lenʼayij toj is alhoho. ¿Ha is che letiskanpe? Kha, lahahitʼe. Wichi toj yen lhometa Heowa lekojyaj ihiche toj ichufwenej wichi mʼak toj matche tsi ihumnhen nilhok wichi wet ihumin Heowa Dios.