Nilhokej espíritus Heowa lhenhay toj isen pʼante. Mat, tefwajni lhayen pʼante fwitsaj, ángeltso hope Ahottaj, Satanás. Lham yahemenche pʼante wichi toj iʼpe honhat nʼokwiyej lham wet kha Heowa. Lhek natetshan.

Hop honhat toj wʼatshan wet isilataj toj lhey Edén iche pʼante wujpe halʼoy lhay toj akoj. Heowa yome pʼante Adán wet Eva iwuye toj tefw halʼo lhaytso, mat Dios yehemenhitʼe pʼante chik lhamel tefw tefwajni halʼo lha. Dios yuk chik lhamel tefw halʼo lhatso, toj paj letʼinhihena (Génesis 2:9, 16, 17).

Iche pʼante ifwala toj ­amlhotaj tahuyej Eva. Mat, hopkhitʼe pʼante amlhotaj, hope pʼante Ahottaj, lham yahuyen amlhotaj. Satanás ifwenhu Eva toj chik lham tefw halʼo lha toj Dios nʼoyej, lahanyaj ihila hotehila iwuye Dios. Ahottaj yome Eva wet yuk letʼinhitʼela. Nʼolhomtesna toj tolhe Ahottaj hope pʼante mʼak toj kamatache. Eva imatitche mʼak toj kamatache tolhe Satanás wet tefw halʼo lha. Toj paj nom Adán, lechʼefwa hiwʼenhu wet lham tefw halʼo lha (Génesis 3:1-6).

Mʼak tafwaytsitso matche, ichufwen amej toj Ahottaj tatayhlo Heowa. Satanás kamaj hope elh toj wʼet yomlhi. Ahottaj yome pʼante Eva chik lham nichʼahuyaye Dios yʼinhitʼala, hope pʼante mʼak toj kamatache. Eva yʼil pʼante, hote iwuye Adán. Lawhoytso Ahottaj yʼinhitʼe, mat lham  yʼinhila lechʼisukyaj toj tamenej. Kamaj lham hope wʼet yomlhi wet iwatlok che wichi niwuyaye mʼak toj tolhe Dios (Juan 8:44).

Toj paj, iyhoj ángeles lhayen pʼante fwitses. Ángelesna hiwʼeney atsinhay toj isis toj ihi pʼante honhat wet iwatlok imoyejwetho. Toj molhyejtso, lhamel nomhen pʼante honhat wet lhayen hinʼul. Lawhoytso lhamel tachema pʼante wujpe atsinhay, toja hopkhitʼe pʼante mʼak toj Dios yahemenche (Génesis 6:1, 2; Judas 6).

Mʼayhayna ichoje wujpe lawitʼay wichi toj ihi pʼante honhat. Ángelestso lechʼefwas iwu lelesa, mat leles hotehi iwuye hinʼul toj iche pʼante honhat. Hope pʼante hinʼul wuj pitaj wet iwuye wujpe mʼak toj niʼisa wet toj paj lhoyʼa lhip mʼak toj niʼisa toj ihi pʼante honhat. Toj molhyejtso, Heowa ichen pʼante pelhay toj wuj lhoyʼa inwokw hopkhilak yikonchi nilhokej wichi toj fwitses toj ihi pʼante honhat. Mat, tajlhamet Noé lhoyʼa lewʼet lheley wet leles lechʼefwas tafwayhen (Génesis 6:4, 11; 7:23).

Mat, ángelestso fwitses yopley pʼante espíritus lewʼet, yʼinhenhitʼe pʼante. Heowa itaytitʼe lhamel letes. Dios iwahnhiyejtʼa toj yopley pele hopkhilak iyej iyhoj ángeles toj isen wet iwahnhiyejtʼa toj lhayehen hinʼu. Hop Ifwala toj Nʼokalelhthayaj Heowa yikonchila lhamel (2 Pedro 2:4; Judas 6).

Nekchom 1914 iche pʼante nʼokʼatshayaj toj ihi pele. Dios Lhomtes toj ihi Apocalipsis yomey: “Tä tajyäme täjtso, iche nʼokaʼtshayaj tä ipuleye. Miguel [Jesucristo ineʼpo] lhäyʼe laka ángeles [ta isen], lhamel itayhlä alhutaj tä wujchetso, wet alhutaj [Satanás] lhäyʼe laka ángeles [fwitses], lhamel itayhlä Miguel. Mat ikalhihitʼa, wet nemhit lhamel lewʼet ihi pule. Häp tä mälhyejtso tä õʼtiyej kanhi häp alhutajtso tä häpe amlhätaj tä nechʼenyaya tä lhey Ahättaj wet äp lhey Satanás, häp lham tä ikanej nilhokej wichi tä iʼpe honhat. Lham lhäyʼe laka ángeles õʼthat honhate”.

¿Atsi mʼak toj tafwaytsi pʼante toj paj? Dios Lhomtes yomey: “¡Tä mälhyejtso, pule lhayis, woyay akäjyaja, häte amel tä lhenay hawʼeta!” Ángeles toj isen lekojyaj ihi tsi Ahottaj lhoyʼa ángeles wuk espíritus toj fwitses nemhi ihi pele. Mat, ¿atsi mʼak toj iyej wichi toj ihi honhatna toj tafwaytsi tajtso? Dios lhomtes yomey: “¡Mat honhat lhäyʼe lewomekitas, awitʼäy iʼamejen, tsi ahättaj ihanej tʼat tä tatäy lhimphaj wet nofwila lewhäy, wet häp tä lhäyʼe lhip tä lewäk ihi, wet inuhchä yämthilek iwohla lakaʼtshayaja amejen!” (Apocalipsis 12:7-9, 12).

Matche, Ahottaj lhoyʼa espíritus toj fwitses ikanej wet itiyej mʼak toj niʼisa wichi toj iʼpe honhat. Ángelestso toj lhey ahot lhayis hopehen Dios latayfwas. Nilhokej lhamel matche toj fwitses.