Heowa itʼoyhtila imalhewek nilhokej mʼayhay toj niʼisahen toj tolhe Ahottaj. Heowa yen pʼante Niyata Jesús. Laniyatyaj toj ihi nilhokpe honhatna wet yenhilhila honhatna hop honhat toj wʼatshan wet isilataj (Daniel 7:13, 14; Lucas 23:43).

Mʼayhayna toj Heowa yome ihichela:

• WUJLA NʼOLHOK: “Iche tʼat häp lhay tä ihi honhat. Lhaka Dios takäpfwayej nʼamehen mʼak tä is”. “Is chik wuj yachuyaj tä ihi laka honhat, is chik lhäyʼe lhip tä iʼpe chenhas lhipey tä atoschephä” (Salmo 67:6; 72:16).

• IHICHETʼALA NʼOKAʼTSHAYAJAY: “Lhuyay, yahinay mʼayhay tä Lhawuk iselkat nʼamejen tä yenlhi honhatena. Itäyhat nʼokaʼtshayajay, yäk nichäte honhat lhip tä lepes tä nem nʼokaʼtshayaj ihi” (Salmo 46:8, 9).

• IHICHETʼALA WICHI TOJ FWITSES: “Tsi wichi tä niʼisahen õyokwesichephäla tä  ihi honhat [...]. Pajiyejtʼa wet nemla iche wichi tä niʼisahen. Tejlak lefwetaj letʼukwe, mat lewʼenhitʼala” (Salmo 37:9, 10).

• IHICHETʼALA NʼOTʼINHAYAJAY, MʼAK TOJ OʼITAJ WET NʼOTʼILEK: “Wet asnamis hiwʼenhichehena honhat, wet chʼotechʼol iläthichehena honhat. Wet tsufwlas tiyäjichephäla, hätehlat iwoye tsonʼa tä tiyäjphä, wet elh tä nämalhi nechʼe lepak ihihila” (Isaías 35:5, 6).

  “Dios [...] ihiyeja lhamel. Wet ilejihena nilhokej tatetʼilis, wet nemla iche nʼotʼilek lhäyʼe nʼolhakli, nʼolhafwyhayaj, nʼoteläythayaj. Tsi tajyäme mʼayhay tä pajche iche, noj tʼat” (Apocalipsis 21:3, 4).

Ahottaj wet ahot lhayis aifwechʼenlhi, mat Heowa ihichetʼe aifwechʼenlhi. Nilhok mʼayhay toj Lham yome nʼanhila (Lucas 1:36, 37). Heowa aihumin wet ihumin chek am laloy toj lhehi honhat toj wʼatshan wet isilataj. Toj molhyejtso, ukwe wichi toj yen lhometa Heowa hopkhilak alechufwenej mʼayhay toj matchehen wet isis toj ihi Dios Lhomtes. Chik alechufwenej wet lawuye mʼaktso toj matche ifwalapej, ailanhila toj lhehi mʼak toj kamatache wet mʼak toj tolhe hiyawul. Hote, ailanhila toj lhehi nʼochʼisukyaj wet nʼotʼilek. Molhyej toj Jesús yome pʼante: “Wet letäfwnhiyeja mʼak tä matche, wet mʼak tä matche ailanhichela” (Juan 8:32).