Dauda toj ihi honhat toj lhey Sierra Leona yuk: “Hupuyfwaj, olhaichiyhelti. Lawhoy toj ohope pʼante nʼofwaj, owʼet lheley lhoyʼa elh hinʼu wet lewʼet lheley tataywek pʼante, ¿atsi toj tamenej? Honhat. Lhameltso tʼoney hop hiyawu (hiyawe) hopkhilak lawitʼay nuj. Hinʼuna hiwʼenhu hinʼu elh lapeyakhi wet iʼpoyejʼpe wesaj toj pelaj. Tafwaytsi tajtso, hop hinʼu toj wesaj toj iʼpe nechʼe chetiʼche wet chufw ilon. Hinʼu toj hiwʼen peyakhi yuk:-¡Oyahin peyakhina wet owʼen hop hinʼu hichʼet pitaj, lawʼey pelaj wet toj yik tachofwenhu, lham yom alhuhu!”

Dauda tefwlhache toj yomlhi wet yuk: “¡Hinʼutsi toj yomene mʼak toj iyej pʼante ochoti! Lham tʼon toj nuway wet yuk:-Chik amel lakache mʼak toj oyomelhi, wet amay alhuhu wet lewʼenla mʼak toj ihi peyakhi!-Mat, ¡lhamel iwuhiyeʼa tajtso! Hop hiyawu iwo tamseka hinʼutso toj itsoche lakacha toj hope inot lhoyʼa halʼo wuley toj ihi ischintaj.”

Dauda yikchufwi toj yomlhi wet yuk:“Ochoti yomlhi naji toj tume hinʼu toj itsoklhi peyakhi lham yome toj honhat lewuk owʼet lheley wet is che okatela tutchey. Hinʼu elh lhoyʼa lewʼet lheley iwuye ochoti letichunhayaj. Toj molhyejtso, lhamel lawitʼay nuj”.

 Mʼayhay toj molhyejna iche nilhokej ifwalas toj iyej wichi toj ihi África lhipey. Mat hote iyhoj honhat lhipey iche millones wichi toj imatitche toj iche mʼak toj nʼinʼola yikchʼuya tʼisan wichi toj yʼil wet yihuye lhip toj wichi toj yʼinhen lewʼet wet kamaj iloy wet hiwʼenpe honhat, iwuye mʼak che hope hopkhilak wichi iwuye mʼak toj lhamel yahemen. ¿Ha matche tajtso? Wichi toj yʼinhen, ¿ha kamaj iloyhiche? Che nimolhyayejtso, ¿atsi toj hopehen espíritus lhayis toj yomey toj tolhey wichi toj pajche yʼinhen? Chik lahanej mʼak toj nichulho mʼayhayna matche toj laha ihi, tsi awʼatshancheyaj tolhiyela chik lahanej wuk chik kahanayej aʼtʼilek.