Martín wet Cristina matche toj akaswetha pʼante tsi nechʼe lhamel ihanej toj tajlhamet wichi toj isen wet toj akantsesitʼa toj ihihla Honhat wet nilhokej lhamel lhaihumnhenla tʼat. Lhamel itichunejlhi pʼante toj matche toj isilataj che wichi ilayhiche toj iʼpe honhat toj newache nehlas, nʼotʼinhayajay wet nʼotʼilek, nilhokpe honhat ihichela nʼotamsek wet nʼokajyaj. ¡Matche toj lhamel ihuminche pʼante che pitajitʼa lewhay wet mʼayhayna nʼal!

—Mat, ¿chihlahatek nʼal nilhokej mʼayhaytso? —Martín tayʼotshane pʼante Pedro.

—¡Oseltej toj letayʼotshan nʼoyej tajtso! ¿Ha ichepej ifwala che lelate wichi toj yome hinʼu toj lhey Jesús?

—Ohanej toj iwoye pʼante lhomtes toj lehanyaj ihi. Mat, ¿atsi toj tamenej toj lhame?

—Tsi taj pʼante dos mil nekchomis, lewhay toj ihi pʼante Honhat, lechufwenkay tayʼotshane pʼante lham malhyej iwoye mʼak toj letayʼotshan nʼoyej —yikchufwi toj yomlhi pʼante Pedro, yome tʼat mʼak toj ihi Mateo 24:3—. Toj nichulho lechufwenkay, Jesús yome pʼante hop nʼotetnek toj nʼanhila. Lham yome pʼante mʼayhay toj nʼanhila, hope tʼat lewhaytso, lhamel ihanhiyeja toj atofwiyetʼa lewhay hopkhilak mʼayhay toj Dios yome pʼante toj yenhilhila, nʼanhila tʼat.

—¿Nʼotetnek? —tayʼotshan pʼante Martín—. Matche toj ohuminchek ohanej. ¿Atsi mʼak toj hope tajtso?

—Dios Lhomtes ifwel namhohen mʼayhay toj inʼalthila namejen nʼotetnek. Lhek natetshan:

• “Tsi wichi tä ihiche honhates tatayhlawek, wet niyatey iwohla lakaʼtshayajayej niyatey iyhäj” (Mateo 24:7).

•  “Ihichela nehläs” (Mateo 24:7).

• “Lhäyʼehila lhip mʼak tä niʼisa” (Mateo 24:12).

• “Honhat wʼahu tä äytesiche” (Lucas 21:11).

• “Tʼinhayajay tä ihiche honhates” (Lucas 21:11).

Martín wet Cristina yome pʼante toj mʼayhaytso nʼal tʼat ifwalasna. Hop toj tamenej toj lhamel yen lelhakliya mʼak toj tataye.

—Athana nʼotetnekna nʼal tʼat ifwalasna, toja inʼalit namejen toj Heowa niyatyaj tatay lhimpaj lewhay hopkhilak niyatej Honhat. Wet Biblia iwo lheya nʼoniyatyajtso toj nechʼayek toj yok, Dios Niyatyaj —yomlhi pʼante ­Pedro wet toj tafwaytshi iyahyen pʼante nʼolhomtes toj ihi Dios Lhomtes toj inʼalit mʼayhay toj tatay lhimpaj lewhay che yenhilhila Nʼoniyatyajtso.

• “Wet chik ifwalas tä reyes ihi, häp Dios tä pule Lewuk lhamlak inechʼayen nʼoniyatyaj tä nittäya, wet nehit katsik ikalhihila. Itäyhthihena nʼoniyatyajay iyhaj pajlaʼtha nofwej, wet ihihila tä ihi pajlaʼtha tiyäjʼattsiy” (Daniel 2:44).

—Lewhay che Dios Niyatyaj niyatej Honhat —yikchufwi toj yomlhi pʼante Pedro—, mʼayhay toj niʼisa, toj newache nʼoʼisyaj wet wichi toj akantses, tatayhihena pajlaʼtha tiyajʼattsiy. ¿Ha amel lefwetaj hopkhila mʼak toj matche toj isilataj?

Wuj toj iseltejen toj lhamel ihanej toja, Martín wet Cristina matche toj lhamel ihuminchek ihi honhattso toj nechʼayek wet nʼotamsek tapoyej.

—¿Atsi toj is che olhamel owoye hopkhilak oihi honhattso? —tayʼotshan pʼante Martín.

—Amel lehanej toj nilhokej mʼayhay toj laha ihi is che nalekajyenej hopkhilak nakatej —Pedro nichulho pʼante—. Natichunejlhi Adán wet Eva wet mʼayhay toj lhamel tʼamajiyejʼta pʼante hop toj tamenej toj tatoy pʼante. ¿Atsi toj ichufwen namejen mʼak toj lhamel iwoye pʼante?

 —Lhamel tachʼahuhiyetʼa pʼante Dios, hop toj tamenej toj tatoy pʼante lewʼatshancheyaj toj naj lepesa wet toj ihi honhat toj wʼatshan wet isilataj.

—Malhyej toj Heowa hiwʼenho pʼante leyes lhamel, hote hiwʼen namhomche leyes. Che nahuminchek nehi honhat toj isilataj toj tatay lhimpaj lewhay che nam, is che nalechufwenej atsi toj hope Dios, nahanej mʼak toj tʼalhej namehen wet nawoye.

Martín itichunejlhi pʼante toj mʼakna wʼawulhitche hope mʼak toj is alhoho, mat tayʼotshan lhame pʼante chi is che lhamel iwoyneje hopkhilak ikalhi tajtso.

—Toj natchʼahuye Heowa khiʼa mʼak toj matche toj atha, tsi malhyej Nʼojcha toj ihumin leles, tajlhamet toj tʼalhej namehen che nawoye mʼayhay toj naisiyeja. Lhayʼe toj, tajlhamhiyetʼa che inʼalit namejen nʼonʼayij toj ihan namehen honhat toj nechʼayek, hote ifwel namhohen toj iwoyek inuhyen namkwehen lhanʼayij toj is che nanukwe —Pedro ikalelhat pʼante wet toj tafwaytshi iyahyen pʼante toj ihi Biblia hopkhilak lhamel tachʼahuye mʼak toj Heowa ifwel namhohen nilhokej namel:

• “Ohäpe Awuk Dios, ochufwen amejen mʼak tä aisej, wet ohän amchehen nʼayij tä häp tä is chik lenukwe. Wet chik lewohiyehte mʼak tä oneʼtek lewoye, wet atamsek mälhhiejnʼet iwoye tewok, wet haʼisyaj mälhhiejnʼet iwoye inät tä iwo lheteya, wet wujpey ales tä lepes lheley, tehinʼet iwoye holo tä iwhäye tewok, wet tek olehiyej pʼante tä olhayen Lewuka, wet tek otäyhthihen pʼante lhamel” (Isaías 48:17-19).

Nʼolhomtesna toj matche toj isis nichate pʼante Martín wet Cristina letʼotle, hop toj tamenej toj matche toj lhamel ihuminche pʼante che athana lenʼayij toj inukwe hope mʼak toj is alhoho hopkhilak lewʼet lheley isej. Lhamel itichunejlhi  pʼante toj ihichetʼa mʼak elh che hope che lhayʼe lhip toj is, tajlhamet toj lhamel ihuminchek iyej leles toj ihi honhat toj nechʼayek.

—Amel iwoyek lhen akajyaja nilhokej nʼokapfwayajayna che alechufwenej mʼak toj Heowa ichufwen namejen wet alekajyenej toj lewoye —yomlhi pʼante Pedro.

—¿Atsi lhip toj ihi che olhamel owatlak olhaichufwenej tajtso? —tayʼotshan pʼante Martín wet matche toj akajlhi—. ¿Ha iwoyek María wet am letachʼot nʼoyehen?

—Matche toj olhamel ohuminchek ochʼot amehen. Lhayʼe toj olhamel owʼen mʼak toj iwohiyela che tachʼot amehen hopkhilak lewʼen nʼayij toj nʼotamsek wet nʼokajyaj wet lhek atchufwi toj lenukwe.