Martín iseltej mʼayhay toj ilate tsi yome hop Heowa. Mat iche mʼak toj kamaj yen lelhakliya. —Che Heowa toj yenwetha pʼante nilhokej mʼayhay wet matche toj takhajay wet lechowej ihi —tayʼotshan pʼante Martín—, ¿atsi toj tamenej toj iche wujpe nʼolhakli toj iʼpe honhat? ¿Atsi toj tamenej toj iche wujpe lhawitʼayhyajay?

—Ayʼotshanyaj matche toj is wet wujpe wichi toj tayʼotshan lhamehen —Pedro nichulho pʼante—. Che natetshan Heowa lechumyajay, nechʼe nahanej toj ihuminhichetʼa toj leles iloyhiche toj wujpe mʼayhay toj matche toj niʼisa iyej toj ihi honhat. Mat, ¿atsi toj Dios lene­chʼethayaj pʼante lewhay toj nechʼenyaya toj itiyej Honhat? ¿Atsi pʼante mʼak toj iche? Hopkhilak nahanej atsi mʼak toj tamenej toj iche ifwalasna mʼayhayna, is che nahanej mʼak toj nichulho nʼoyʼatshanhayna.

Pedro iyahyen pʼante versículona hopkhilak inʼaltej Martín mʼak toj Heowa ilate pʼante toj tume lham lewhay toj wakʼalh lhenhay.

• “Dios hiwʼen tä wuj tä is nilhokej mʼak tä yenlhi” (Génesis 1:31).

Lhenek toj inuʼpe lewʼet toj isilataj toj ihi Honhat hope pʼante Adán wet Eva. Malhyej iwoye iyhoj lhenhay, Heowa yenwetha p’ante tʼisanis toj newache m’ak toj niʼisa toj iyej; ihuminche pʼante che ilayhiche pajtha tiyajʼattsiy toj iʼpe honhat. Lham itihi pʼante yachuyajwʼet toj lhey Edén, lhip toj nilhokej mʼayhay toj lhamel iwatla ihi hopkhilak ilayhiche wet lekajyaj ihiche. Naya pʼante mʼayhay toj lhamel hiwʼen (Génesis 2:8, 9). Hate Heowa ifwenho pʼante  toj is che yam wujpe toj iwo lelesa hopkhilak tapoyej Honhat wet lhayen niyatayej (Génesis 1:28). Tej toj wujpe nekchomis toj tafwaytshi, leles toj newache mʼak toj niʼisa toj iyej tʼisanis, lekajyaj ihiche, iwoye pʼante che ilayhiche toj iʼpe honhat toj wʼatshan wet isilataj, mat malhnhiyejtʼa pʼantetso. Mʼak toj tataye pʼante lhamel hope pʼante mʼak toj matche toj isilataj.

Mat, ¿atsi toj tamenej toj lhamel ikathiyejtʼa pʼante mʼayhaytso? Biblia yome mʼak toj tamenej:

• “Iche hinʼo tefwajni tamenej pʼante tä nʼochʼisukyaj ihi honhat, wet nʼochʼisukyajna iton alhoho nʼotʼilek, wet nʼotʼilek yʼaje nilhokej wichi tsi nilhokej iwo lechʼisukyaja” (Romanos 5:12).

Malhyej iwoye nʼojcha toj ihumin leles, Heowa hiwʼenho pʼante Adán wet Eva leyes, toj is pʼante che tachʼahuye hopkhilak ilayhiche yamlek tiyajʼattsiy wet yik atchufwi toj tʼuye honhattso toj wʼatshan wet isilataj (Génesis 2:15-17). Hop toj lehanyaj ihi, Heowa inityenhihentʼa pʼante che lhamel tachʼahuye. Mat, Lham iwahnej pʼante che lhamel inʼaltej lehumnhayaj toj itiyej wet iwoye lhomtes. Malhyej iwoye namel, lhamel iwoye pʼantek itshupyene mʼak che ihuminche. ¿Atsi pʼante toj lhamel itshupyene toj iwoye?

Matche toj niʼisa pʼante toj Adán wet Eva itshupyene toj tachʼahuhiyetʼa pʼante Dios, inʼalit toj tatayhlo pʼante Elh toj yenwetha pʼante lhamel. Toj malhyejtso iwo pʼante lechʼisukyajaya hop toj tamenej toj noj toj hiwʼen tʼisanis toj newache mʼak toj niʼisa che iyej. Pitajhitʼa pʼante lewhay, nechʼe hichʼuthen pʼante wet yʼinhen, malhyej toj Heowa pajche ifwenho pʼante toj malhhiyejatso che tachʼahuhiyetʼa laka leyes (Génesis 2:17).

Nilhokej namel nahopehen Adán wet Eva leles, lhachʼisukyajay ihiche, hop toj tamenej toj nachʼuthen wet nayʼinhen.  Mat Pedro ikalelhtho pʼante Martín, hopkhilak letamsek ihi toj Dios lenechʼethayaj toj itiyej pʼante wichi iwohitʼa elha. Lhajcha toj humnhatsaj kamaj ihuminchek nalayhiche toj nehi honhat toj wʼatshan wet isilataj. Pedro inʼaltej pʼante Martín wet Cristina versículona toj ihi Biblia:

• “Lhawuk lham tʼat tä häpe Dios. Yenlhi pule wet äp yenlhi honhat wet yäm tʼunhi. Wet yenhitʼa tsʼanisa mat iwo lheleya tä häpe wichi. Lham yok, ‘Ohäpe Dios, ihichetʼa elh’” (Isaías 45:18).

Pedro yachajo pʼante toj ifwenho lhamel mʼayhay toj isis toj Dios yome p’ante toj yenhilhila toj ihi Biblia. Nemla iche nʼotʼinhayajay, mʼayhay toj oytesiche wet nʼotelaythayajay, nilhokej wichi hiwʼenla lewukwey toj isis wet wujla lhok; hate nemla iche nʼotʼilek. Nʼokapfwayajayna hope Dios lenechʼethayaj lhip toj itiyej pʼante wichi hopkhilak hiwʼen nʼowʼatshancheyaj toj tʼun wet iʼpe honhat toj wʼatshan wet isilataj. Lenechʼethayajtso iwohitʼa elha. Pedro iyahyen pʼante mʼakna wet ipayne Martín:

• “Häp wichi tä isen, honhat lewuhuyla wet yenla lewʼeta yämlek tiyäjʼattsiy” (Salmo 37:29).

Toja hope mʼak toj Heowa yome pʼante toj yenhilhila wet nʼanhila tʼat.