Martín hiwʼen pʼante wujpe lelhakli a. Pitaj lewhay toj lhaikhajyen pʼante hopkhilak hiwʼen lechumet toj kalelhoj hopkhilak ichoj mʼak toj lewʼet lheley iwatla. Ihuminche pʼante che leles hiwʼen nʼochufwenyaj toj is wet yen kajyaja mʼak toj tataye lhamel. Mat tajtso wʼawulhitche matche toj atha. Mat tajlhamet toj lham iwoye pʼante che hiwʼen tʼisan toj tʼinhayaj neyache wet yikchufwi lechumet hopkhilak ikalhi chinaj tʼoj wet hopkhilak lewʼet lheley hiwʼen nʼolhok lhayʼe toj iwo haya lhip toj ihi. Iche ifwalas toj tayʼotshan lhamej: “Che owitʼay ihi, ¿atsi toj tʼuhiyela owʼet lheley?”.

Cristina, Martín lechʼefwa, hote lelhakli ihi. Lham wet Martín isitʼa lhamehen. Atsinhana ihuminche pʼante che lechʼefwa tachʼote toj ichiyhelit leles wet ichufwenhen hopkhilak lhamel yenhitʼa wʼet mʼayhaya iyhoj wet yam isis lakeyis. Mat Martín toj nompej toj tolhe lechumet matche toj yʼel wet hiwʼenhitʼa lewhay hopkhilak itetshan leles. Cristina matche toj lelhakli ihi wet ifwalapej lham wet lechʼefwa ichuwetlhamehen, tej toj ihanej toj tajtso iwo lewitʼaya leles. “Owathitʼahlak otichunejlhi chihla malhyej mʼak toj nehi che iche lhales elh che hope che tʼinhayaj ihi —yomlhi pʼante Cristina— ¿Chihla natalhthi chinaj tʼoj hopkhilak nachoj kachal wuk nawo haya kachawʼet?”.

Martín wet Cristina hote hiwʼen toj wichi toj ihi honhat toj ihi iwo elha lakeyis. Lhamel tachʼot lhamehen pʼante, mat athana lhamel ileyej tajtso wet nemhit hiwʼen lewhay hopkhilak itetshan iyhoj. Martín wet Cristina iyhoj toj lehumnhay wet lakalayʼis  tatayhlo lewitʼayhyajay malhyej iwoye lhamel wet yen lelhakliya mʼayhay toj tataye lhamel. Wʼawulhitche ihichetʼa elh che hope hiwʼen letamsek toj matche. “¡Matche toj ohuminchek noj nilhokej lhawitʼayhyajay wet lhakajyaj ihiche lhayʼe lhatamsek!”, yen tʼichunhayajapej Cristina. Tej toj lhamel matche toj tatayhlo pʼante, wʼawulhitche ihichetʼa mʼak che ikalhi.

Iche pʼante ifwala toj Martín wet Cristina yome mʼayhay toj lhamel yen lelhakliya.

—¿Ha hopkhila pʼiya mʼak toj matche toj isilataj che nawʼen nʼayij toj nʼotamsek wet nʼokajyaj? —Martín tayʼotshan.

—¡Matche toj ohuminchek malhyejtso! —Cristina nichulho—. Otichunejlhi naji tajtso wet ohanej toj che nawʼen tajtso, nofwila nilhokej lhawitʼayhyajay.

—Mat, ¿chihla malhyej che nawʼen tajtso toj iche wujpe religiones wet wichi letichunhayajay toj wʼenhahiche? —yikchufwi toj yomlhi Martín—. Iwohiyetʼak natetshan weihalhapej religionestso. Nilhokej toj yome toj iwoyek inofwat nʼowitʼayhyajay, mat mʼak toj matche, religionestso hiwʼenhihotʼa pʼante wichi mʼayhay toj isej.

Tej pʼante toj Cristina letichunhayaj malhyej iwoye Martín, matche toj ihuminche pʼante che tʼukwe mʼak toj tachʼote lewʼet lheley. Lham hiwʼen pʼante leniwhayaj toj hiwʼenla tʼat tajtso.

Eʼlat alhakli ihi malhyej iwoye Martín wet Cristina. Tsi toja iche nilhokej ifwalas toj iyej wichi. Nilhokej wichi matche toj ihuminchek letamsek ihi, tʼinhayaj newache wet lewʼet lheley lekajyaj ihiche, mat toja wʼawulhitche hop mʼak toj matche toj atha che wichi ikalhi. ¿Ha iwoye pʼiya che nʼowʼen hop nʼayij toj nʼotamsek wet nʼokajyaj?