N’OCHUFWENYAJ 8
N’al p’ante Mesías
INU’PE quinientos nekchomis toj tafwaytshi toj profeta Daniel ilesayen p’ante lhomtes, Dios laka ángel Gabriel, lhain’altej p’ante atsinha toj kamaj lhakn’ajaye hin’u che hope, toj lhey María toj talhe David leles. Ángeltso yo p’antek: «¡Amtena! ¡Lhawuk i’amej! ¡Dios tatshupiyej ame lep’altsenyaj!» (Lucas 1:28). María inuhat lhamho p’ante, hop toj ihanhiyejt’a p’ante atsi toj ángeltso yome.
Gabriel iwo p’ante silota María toj iwohla p’ante lhosa toj hopkhila Mesías
Mat Gabriel yok: «María, yej noway, tsi i’amej Dios lakäpfwayaj tä is tä itshupyenej ame. Ofwel amho tä lech’otshanhila wet lewohla äsa, lhenla lheya Jesús». Ángeltso yikchufwi toj yomlhi p’ante wet yok: «Lhawuk Dios yenla häpeya Niyat tä wuj, mälhhiyejat iwoye letes David p’ante, [...] najit lepese Leniyatyaj» (Lucas 1:30-33). ¡Lhay’e lhip toj isilataj n’osilotyajna! María iwohla p’ante lhosa toj hopkhila Mesías, n’oelh toj ichojiyela wichi Dios lakopfwayaj toj n’onihihla.
Iyhaj wel’as toj tafwaytshi iche p’ante Jesús, nichothihcho p’ante Belén. Honatsitso, iche p’ante ángel toj iwo silota tson’ataswos toj ihi lhiptso: «Ochäj amehen osilätyaj tä is, häpkhilek ikäjyenwethä nilhokej wichi. Fwalana nichätchä amel Afwayhthiyay tä häpe Cristo, Lhawuk, ihi David laka hupuy» (Lucas 2:10, 11). Toj paj Jesús lew’et lheley t’aye p’ante Nazaret, lhip toj lhaichiyhelthi p’ante.
Nekchom toj 29, hope p’ante lewhay toj is che n’al Mesías, Jesús iwo p’ante tesa lechumet toj hope profeta, lewhay toj hiw’en p’ante «treinta nekchämes» (Lucas 3:23). Wujpe wichi toj itafwelej p’ante toj hope n’oelh toj Dios chenek wet lhamel yo p’antekwe: «¡Profeta tä lhamya in’amejen!» (Lucas 7:16, 17). Mat, ¿atsi p’ante toj Jesús lechufwenyaj?
Jesús ichufwenej p’ante wichi toj is che ihumin Dios wet n’okwiyej. Jesús yo p’antekwe: «Lhawuk [Heowa, NM] Dios tajlhamat lham tä lhawuk. Humin Awuk Dios, mälhewek ahusek, lhäy’e mälhewek atichunhayaj, lhäy’e mälhewek akhajyhayaj» (Marcos 12:29, 30). Yachajo p’ante lhometna: «N’okwiyej Awuk [Heowa, NM] Dios, wet ts’ilkat lham tä lewujyen» (Lucas 4:8).
Jesús ifwenho p’ante lechufwenkay toj is che lhaihumnhen. Jesús yo p’antekwe: «Humin aelh, tech’ayen amej tä alehumin» (Marcos 12:31). Hote, yome p’ante toj lhomtesna matche toj laha ihi: «Häp m’ak tä let’uhläk aiyhäj iwoyej amehen, häte woyeje aiyhäj. Tsi täjtso häp tä nilhok Ley p’ante tälhe Moisés lhäy’e profetas lechufwenyajay» (Mateo 7:12).
Jesús matche p’ante toj iwatla che yen lhometa Dios Niyatyaj wet lhaikhajyenej. Jesús yo p’antekwe: «Is tä owo silätayej wichi tä ihiche lew’etes iyhäj häp Dios Silätyaj tä Is tä yäme Leniyatyaj. Tsi häp täjtso tä õ’chen n’oye» (Lucas 4:43). ¿Atsi toj tamenej toj lhay’e lhip toj laha ihi N’oniyatyajtso?
Dios Lhomtes ichufwenej wichi toj Dios Niyatyaj hope n’oniyatyaj toj ihi pele wet niyathiyeja Honhat. Jesús, hope Mesías, Niyat toj Dios itshupyene p’ante toj is che ihi N’oniyatyajtso. Malhyej toj profeta Daniel yome p’ante toj Dios hiw’enhohla lhamtso «lakhajyhayaj, lhay’e lewujyaj, lhay’e leniyatyaj» toj ihi pele (Daniel 7:14). N’oniyatyajna iwelanthila Honhat yamla w’atshan wet isilataj wet ikopfwahiyela Dios lakawos hiw’enhohla n’ow’atshancheyaj toj naj lepesa. ¿Ha lefwetaj khit’a m’ayhay toj isis n’osilotyajayna?
