DIOS yome p’ante toj Mesías hopkhila p’ante Elh toj Lhetekej nilhokej honhatil. Dios matche toj ihanej atsi toj ahawetej che lhetekej wichi wet toj lhamel iwatla, hop toj tamenej toj itshupyene lhamtso . ¿Chi malhyej toj in’alit p’ante toj ahawetej che lhetekej wichi? ¿Ha hope p’ante elh toj takhajay toj tiyajo n’oka’tshayaj? ¿Ha hope p’ante niyat toj yam is lechumet? ¿Ha hope p’ante elh toj ahantsaj toj wichi iwunit? Malhyej toj Dios Lhomtes yome, Mesías hope p’ante Jesucristo, profeta toj malhnhiyejt’a p’ante iwoye iyhaj (Mateo 23:10).

Dios t’amajej p’ante Jesús hopkhilak lewhay toj nichatcha naj lech’isukyaja. Hote, Jesús itelaytej p’ante nilhokej m’ayhay toj Satanás iwoyeje toj iwatlak itiyej kanhi len’ayij toj is alhoho. Jesús lhomtes wet m’ayhay toj iwoye p’ante in’alit toj inuhtihit’a p’ante’pe lew’et toj ichumyenlhi Dios lakhajyhayaj, le’isyaj, lehanyaj wet lehumnhayaj. Natetshan atsi toj ichufwen namejen m’ayhay toj iwoye p’ante.

Ichumyenlhi lakhajyhayaj toj Dios hiw’enho p’ante hopkhilak tach’ote iyhaj. Matche toj yen lelhakliya iyhaj wet isej lakhajyhayaj hiw’enho p’ante wichi wujpe m’ayhay toj lhamel iwatla. Lham yo p’antek: «Wuj tä op’altsen häp wichina, tsi [...] nojche lhäk tä hiw’en» (Marcos 8:2). Toj paj, iwo p’ante letetneka hopkhilak hiw’enho lhok wujpe wichi toj ihumin toj tach’ahuye.

Hote Jesús ilunche p’ante wujpe lhipey, ichufwenhen wichi wet «ichestejen wichi nilhokej t’inhayajay lhäy’e m’ak at chik häpek lewit’äyhyaj» (Mateo 4:23). Hop toj tamenej toj wujpe wichi toj ihanlhi p’ante wet «nilhokej wichi tä t’uhläk ichumpe häp lham, tsi lakhajyhayaj tälho wet nilhokej ichesejen» (Lucas 6:19). Matche, Jesús «näm wet yenhit’a lakawosa wichi, mat lhayen wichi lakawoya, wet iwom lew’atshancheyaj tä lhayen lahayayej wujpe wichi» (Mateo 20:28). ¿Chihotefwas niyatey toj iche athana lhayen lewoya iyhaj, malhyej toj Jesús iwoye p’ante?

In’alit p’ante Dios le’isyaj. Jesús ihanlhi p’ante Dios laka leyes, hote iwoye p’ante n’ochufwenyajay toj talho leyestso. Malhyej toj profetas yome p’ante toj ihi Bi­blia, malhyej iwoyek lham t’at che yomlhi p’ante che yok: «Wuj tä ohumin tä owoye anech’ethayaj, wet achufwenyaj ihi t’at ohusek» (Salmo 40:8). Jesús iw’awlhatcho wichi —wichi toj p’alitses, hiw’en m’ayhay, hin’ul wet atsinhay, no’tshas wet wichi toj tanhay—, iwo p’ante haya lhamel, malhyej iwoye Dios. Toj lechufwenkay n’ayejo toj n’ojchalis ihane leles, lham yo p’antek: «Ch’anlhaye nä’tshas, yej n’äyejo tä iho n’oye. Tsi wichi tä ihi Dios Niyatyaj häpe lhamel tä hätet iwoye nä’tshasna» (Marcos 10:14).

In’alit p’ante Dios lehanyaj. Jesús matche toj itafwelej p’ante chi molhyej wichi. «Lham nitäfwelej t’at elhpej hin’o lehusek» (Juan 2:25). Lewhay toj letayhfwas ichene p’ante sip’alis che itsoklhi, nech’e lhamel t’at toj itafwelej wet yok: «¡Ihichet’a elh chik lhämtes häte iwoye tä lham yämlhi!». ¿Chi p’ante italhthi Jesús nilhok lehanyajna? Lham t’at toj ikalelhat p’ante toj yok: «M’ak tä oyen ochufwenyaja tälhit’a n’oye, tälhe t’at Elh tä lechenekn’o» (Juan 7:16, 46).

 In’alit p’ante Dios lehumnhayaj. Hote Jesús hip’altsenhen p’ante wichi. Iche p’ante ifwala toj hin’u toj «amostas wuj tä ilän» lhaip’altsene wet yok: «Che lewoye, lehanej lewoyneje che letäyhat n’oyej ot’inhayaj». Toj Jesús hiw’en hin’una toj matche toj p’alitsaj «tachumpe wet yok: Owoye. Otäyhat amej. Wet yofwajkwet tatäy amostas wet hin’o iches» (Lucas 5:12, 13; Marcos 1:41, 42). Jesús matche toj iwatla p’ante che isoyej lep’altsenyaj hin’utso.

¿Ha Jesús nayen lelhakliya? Lham toj nichulho toja: «Hoyay n’oye, amel tä let’elejen achumtes lhäy’e alhuyes, owohla elakw’eta. Ti atapehen olhukw’et, wet achufwenejen m’ak tä owoye tä otamsek ihi wet tek olhaichäjlhi, häpkhilek lelhokaye ahusey t’elakw’et» (Mateo 11:28, 29).

Jesús, hope elh toj lhay’e lhip toj t’uhawetej che lhetekej wichi. Toj malhyejtso, inityen namejen toja: «Achufwenejen m’ak tä owoye». ¡Chumla n’osilotyajna toj Cristo ifwel namhohen! Che lechumla toja akajyaj ihihla.