DIOS Lhomtes in’alit wujpe Dios lechumyajay toj isis wet tajtso iwahin namejen che natafwelej. Malhyej toja, Lhomtes yome cuatro lechumyajay toj lhamenya, n’okhajyhayaj, n’o’isyaj, n’ohanyaj wet n’ohumnhayaj. Natetshan weihalhapej lechumyajayna.

Heowa yome p’ante Abrahán toj yok: «Ohäpe Dios tä lajit letumfwaya» (Génesis 17:1). Lakhajyhayaj ihichet’a elh che w’awulhi, najit lepesa wet iwohiyet’ala che noj. Lham ichumyenlhi p’ante toj yenwetha nilhokej m’ayhay toj iche.

Dios ichumyenhilhit’ala lakhajyhayaj che iwoye m’ak toj ni’isa. Ihanej chi iwoyneje hopkhilak ichumyenlhi wet atsi toj tamenej. Toj ichumyenlhi lakhajyhayaj, hope t’at lewhaytso, hote hope elh toj le’isyaj ihi, ahantsaj wet humnhatsaj.

Heowa nahiyejt’a lakhajyhayaj hop toj iwatlak tach’ote lakawos toj afwtintses. «Tsi Lhawuk tatey itetshanpej häp m’ak tä i’pe honhat, wet hiw’enhopej lakhajyhayaj häp wichi tä matche tä t’ekhaye häp lham» (2 Crónicas 16:9). ¿Ha lehuminhichet’a che lhamwhaye Dios toj takhajay wet toj yen lelhakliya laka wichi?

«Lhawuk ihumin m’ak tä is alhoho» (Salmo 37:28). Ihanlhi laka leyes ifwalapej toj iwoye m’ayhay toj isis wet toj is alhoho.

Dios n’ayiho m’ak toj ni’isa alhoho, «Itetshanhiyejt’a m’ak tä häpe elh chik häpe, hiw’awlhatchä lakalelhthayaj tä iwoye. Häte hip’altsenhit’a elh chik häpek yok, ‹Owo t’awayhata Lhawuk häpkhilek hip’altsenn’o›» (Deuteronomio 10:17). Lham tatayhlo wichi toj t’osche’pe iyhaj wet t’uye wichi toj neyache iyhaj che tach’ote, malhyej tesalis wet penhas (Éxodo 22:22). Heowa iw’awlhatcho wichi. «Dios hiw’awlhatejchä lehumnhayaj tä itiyej wichi, tsi tachumlä elh che häpe che iwujyen Lhawuk wet iwoye m’ak tä is» (Apóstoles Lhenhay 10:34, 35).

Heowa le’isyaj ihi toj ihi. Khit’a elh toj nilhok lewhay itayhtej wichi letes wet khit’a elh toj t’un. Lham itiyej lekalelhthayaj wichi toj iwoye t’at m’ak toj ni’isa, mat itiyej lep’altsenyaj wichi toj ileche len’ayij toj ni’isa. «Lhawuk häpe Dios tä is wet äp hap’altsentsaj, nakenhiyejt’a lewäk, iteläytej t’at, wet wuj lehumnhayaj. Pitajit’a lewhäy tä n’aifwon, wet ileyej lewäk. Tek iwoyej n’amehen laha tä t’uhawet n’amejen häp m’ak tä ni’isachehen lhäy’e lhach’isukyajay tä y’awoye» (Salmo 103:8-10). Hote ihanej iche wet ikopfwaye m’ayhay toj isis toj iwoye lakawos toj afwtintses. ¿Ha lefwetaj isit’a che let’ekhaye Dios toj n’o’isyaj lewuk?

N’ohanyaj talhe t’at Heowa. «¡Wuj m’ayhay tä ischehen tä iyej Dios, lhäye lehanyaj!» (Romanos 11:33). Lehanyaj ihichet’a m’ak che w’awulhi wet lepes ihichet’a.

Dios lehanyaj n’al toj ihi lhenhay. Lakawo David yo p’antek: «¡Iwuk, wujpey m’ayhay tä lhenlhi! Nilhokej lhamel ahanyaj t’at tä lhenejlhi» (Salmo 104:24).

Dios lechumyajayna hote ihi N’olhamethi. Niyat David ilesayen p’ante: «Lhawuk lechufwenyaj is alhoho, wet iwo lehanyaja häp elh tä nhana m’akej» (Salmo 19:7). Iwoyek naw’en m’ak toj naisej toj talhe Dios lehanyaj toj najit lepesa. ¿Ha am lewohiyela tajtso?

Heowa lechumyaj toj matche toj lhamya hope n’ohumnhayaj wet Lhomtes yome toja: «Dios häpe t’at n’ohumnhayaj» (1 Juan 4:8). Lehumnhayaj t’at toj iw’ahte toj iwoye nilhokej m’ayhay. Wet iwahnej che lehumnhayajtso itshupyene m’ak toj Lham iwatlak iwoye.

Dios wujpe m’ayhay toj iwoye hopkhilak ipayen namehen lehumnhayaj. Malhyej toja, hiw’en  namhohen m’ayhay toj isis, malhyej «pelhay, lhäy’e yachuyaj, lhäy’e [lha]lhäk tä naya yämthilek [lh]akäjyaj i’[n]amejen» (Apóstoles Lhenhay 14:17). Toj malhyejtso, «nilhokej m’ak tä isen tä y’akatej, wok oyok, lhatw’ayhtes tä n’aisej, tälhe Dios tä ipuleye, lham tä lhenek ifwala lhäy’e iwel’a lhäy’e katetsel» (Santiago 1:17). Ichumyenlhi n’ow’ayhat toj lhay’e lhip toj laha ihi toj hope N’olhamethi, Dios in’alit m’ak toj matche toj hope Lham wet ichufwen namejen laka leyes wet iyhaj m’ayhay toj matchehen. Jesús yo p’antekwe toj iwo t’alhyaja: «Ämet häpe t’at m’ak tä matche» (Juan 17:17).

Dios hote tach’ot namehen lewhay toj lhawit’ayhyajay ihiche. «Ti’pe Lhawuk nilhokej m’ak tä lhen alhakliya, wet lham aikahyenla. Tsi tek tach’anlhahiyelak nichät katsi häp hin’o tä iwoye lhämtes» (Salmo 55:22). Lham itayhat lhach’isukyajay. «Tsi ahäpe Dios tä hap’altsentsaj, wet letäyhtej elh letes, wet wuj tä lehumnhen lhamel tä t’än hach’oye» (Salmo 86:5). Hote iwatlak hiw’en namhomche n’ow’atshancheyaj toj naj lepesa. «Ilejihena nilhokej tatet’ilis, wet nemla iche n’ot’ilek lhäy’e n’olhakli, n’olhafwyhayaj, n’oteläythayaj» (Apocalipsis 21:4). Wet am, ¿ha lehuminhila Dios malhyej toj aihumin?

Dios iwatlak matche toj natafwelej. Lhomtes inityen namejen: «Hoyaye Dios wet lham ihohla amehen» (Santiago 4:8). Dios yo p’antek «okalay’i» toj yome laka profeta Abrahán toj afwtintsaj (Isaías 41:8). Wet iwatlak weihalhapej namel nahopehen lakalay’is.

Che t’aytsi toj nalechufwenej atsi toj hope Dios, t’aytsihla toj namwhoye Dios wet hote t’aytsihla toj lhakajyaj ihiche. «Lhawuk lakäpfwayaj tä is iyej hin’o tä [itiyej] lehumnhayaj Lhawuk lechufwenyaj, wet yen tichunhayaja ifwalapej honatsipej» (Salmo 1:1, 2). Toj malhyejtso, nekchufwi toj nalechufwenej Biblia, natichunejlhi lechumyajay wet m’ak toj iwoye. Hote nan’alit toj nahumin Dios che nawoye m’ak toj nalechufwenej. «Wet tä y’awoye lhämtes, y’an’älit tä y’ahumin t’at Dios. Wet lhämtes tek choyhat» (1 Juan 5:3). Nat’alheje Dios malhyej toj lakawo t’alheje p’ante: «Päyen n’oye han’äyhäy, chufwen n’oye häpkhilek onukwehen. Hän n’okwe m’ak tä matche» (Salmo 25:4, 5). Naw’enhila toj Dios «tek atofwehlä elh weihalhapej n’amel» (Apóstoles Lhenay 17:27).