LHEK natichunejlhi che nam kachawo toj ihoho lhaka honhat. N’alej toj ichun nan’owaye che nahoye lhip toj ihi toj iyahinhla wichi. Mat che kachawotso iyahinhla nitokw lhakalay’is wet tach’ote hopkhilak iches, nawo elha lhatichunhayaj toj natiyej.

Biblia malhyej iwoye kachawotso. Iche wichi toj n’owaye che itetshan, mat lewhay toj iwoye n’olhomtestso, lekajyaj ihiche. Natetshan m’ayhay toj yome toja.

«Toj tafwaytshi toj otawhayey, otichunejlhi toj och’efwa Dumas iwotesa toj itetshanhit’a n’o —Atsinha toj lhey Sumiatun yome toja—. Toj khi’ahte m’ak toj owatla, ichehte ifwalas toj olakwlhi och’efwa, otatej m’ayhay wet otakleyej. Ichepej ifwalas toj inu’pe lew’et toj ofwitsaj wet oyalh tatay.

»Toj paj Dumas iwotesa toj lhaichufwenej N’olhamethi, olakwlhipej, mat olhaiskat oichufwi lhip elh hup wet olate m’ak toj lham lhay’e elh toj ichufwen yomejlhi. Ichehte ifwala toj olate toj lhamel iyahyen versículosna: ‹Atsinhay tä hach’efwas ihi, en awuhuya hach’efwas, tech’aynej tä lhen at awuka häp Lhawuk[...] Atsinha is chik tek yen w’et m’ayeka lech’efwa› (Efesios 5:22, 33). N’olhomtesna nichote ot’otle. Owohte t’alhyajaye Dios toj is che itayhat otes hop toj olakwlhi Dumas wet is che tach’ot n’oye hopkhilak ohope atsinha toj is. Pitajit’a lewhay toj tafwaytshi, nech’e olhamel olhokej toj olhaichufwenejen Dios Lhomtes».

Dios Lhomtes hote yome toja: «Häte hin’o elhpej tä lech’efwa ihi, is chik ihumin lech’efwa, malhyej tä ihumin lham t’isan» (Efesios 5:28). Sumiatun yome toja: «N’olhomtesna wuj toj tach’ot n’oyehen. Olhaikajyen toj op’ajtej ohumnhayaj toj otahuyej wet owotesa toj owaklhathopej té toj tapil toj talhe lechumet. Dumas hote matche toj itetshan n’o wet tach’ot n’oye toj otechuma m’ak toj ihi ow’et. Olhamel olhaikajyenhen toj ot’ukwe m’ak toj oisej, olhaip’altsenhen wet otayhat lhamejen otes (Efesios 4:32). Toj paj, olhamel ohumnhayaj lhay’e toj oyenhit’a w’et m’ayeka oelh t’aylhatshi. Athana tafwaytshi cuarenta nekchomis toj olhamel kamaj oiwek. Hop toj isej Biblia olhamel yikatchufwi toj oiwek».

«Ofwitsajte —yokwe Tayib—. Ohuminte toj otakley wet otompha lutsej hopkhilak oistunhen wichi. Hote oy’ajpej och’efwa Kustriyah wet toj matche toj ofwitsaj oy’aj paj toj otat katsi. Wujpe wichi noway n’oye.

 »Ichehte ifwala toj oyahyen Jesús lhomtesna wet nichote ot’otle: ‹Ow’en amhohen olhämet tä nech’ayekna, oyok, Humnhen aiyhäj. Mälhyej tä olham oaihumnhen› (Juan 13:34). Otshupiye toj owo elha on’ayij. Toj olate toj ofwitsaj, ot’alheje Dios lech’otyaj hopkhilak yikchufwi toj owo tamseka wet toj owoye tajtso nech’e otamsek ihi. Och’efwa wet olham otch’ahuye m’ak toj ihi Efesios 4:26, 27 toj yok: ‹Che letawäkwäy, yej ch’anlhaye che awäk iton ame hach’isukyaj, mat nofwatphä’thahya, wet yej wo lew’eta ahättaj›. Olhamel olhaihutpejwek toj oyahyen Biblia wet owo t’alhyajaye toj honatsi. Toja tach’ot n’oyehen toj inofwat iyhaj olhamel owit’ayhyajay toj iche ifwalapej wet yikatchufwi toj olhahip’ajtitwek.

»Athana ohumin n’otamsek wet wichi hiw’en toja. Och’efwa wet oles ihumin n’o wet yenhit’a n’o w’et m’ayeka. Ow’en wujpe okalay’is wet oise hop Dios. Ohope hin’u toj matche toj lekajyaj ihi».

«Toj omamse olhahip’ajtej mamses toj ilunche n’ayhay, matche toj ohuminte toj owunej, iche wujpe honatsi toj o’itaj t’at katsi, ow’oknaj —Goin yome toja—. Hate otufw wet owomte drogas, malhyej marihuana wet éxtasis, toj ot’uyitpej lech’oye chaleco antibalas. Tej toj okahyaj wet m’ayhay toj owoyehte malhyej iwoye hin’u toj t’un, nilhok lewhay on’owahyaj ihi.

»Ichehte ifwala toj n’oelh toj ipayen n’oye m’ak toj ihi Dios Lhomtes: ‹Yäs, yej p’ethatlä ochufwenyajay, [...] wet wujla’pe ifwalas lhay’e nekchämis tä leläy, wet wujla atamsek chik i’amej› (Proverbios 3:1, 2). Hote ipayente n’oye elhna: ‹Eh ipuhfwas tä oalehumnhay, häp tä mälhyejtso m’ak tä isen tä Lhawuk ifwel n’amhohen. Tä mälhyejtso, n’alej  lhamchehen yämlek noj nilhokej lhach’ohle tä iyej lhat’isanis lhay’e lhahusey, wet äp n’alhaimalhtejwek tä n’alhayen t’amajchetesayej Dios› (2 Corintios 7:1). Toj ohuminchek pitaj lewhay toj olayhi wet otamsek ihi, oleyejte drogas, otiyej kanhi okalay’is toj ni’isahen wet owotesahte toj otchumhoplhi Dios.

»Tafwaytshi diecisiete nekchomis kamaj oyachajihot’a che otufw drogas. Ot’inhayaj ihihit’a, ow’et lheley lekajyaj ihiche, ow’en okalay’is toj isen, wet nemhit otes ihi. Athana oma’pe omawet, nemhit omahi n’ayij toj ow’oknaj».

«Ohopehte mamse toj etantsaj —Bambang yome toja—, matche toj ohuminchehtek owit’ayen iyhaj wichi toj w’enhachelhamej toj on’ayihomche.

»Mat toj paj owotesahte toj ot’ukwe Dios. Tajtso ichajte n’oye wichi toj lhaihutwek toj lhaichufwenej N’olhamethi. Oseltej toj ow’en iyhaj toj hip’ajtej lehumnhayaj toj n’okwi n’oyej, hopehen wichi toj on’ayihomchehte wet wujpe wichitso toj lhaihutwek w’enhachelhamej wet is lhamehen. Nech’e ohanej textona toj yok: ‹Dios hiw’awlhatejchä lehumnhayaj tä itiyej wichi, tsi tachumlä elh che häpe che iwujyen Lhawuk wet iwoye m’ak tä is› (Apóstoles Lhenhay 10:34, 35).

»Athana nemhit on’ayihomche iyhaj wichi. Ow’en okalay’is toj matche hopehen wichitso toj on’ayihomchehte. Hop toj isej Lhomtes, Dios ichufwen n’oyej toj is che ohumnhen oiyhaj».

«Toj omamse tres toj yachajopej toj oichufwi n’op’onthi: dos hop toj ot’etan wet uno hop toj otshan hin’u —Garoga yome toja—. Tafwaytshi nekchomis iyhaj ichehte n’oka’tshayaj, olhay’uyto wichi toj tatayhlo niyatey wet wujpehte wichi toj olanhen. Toj noj n’oka’tshayajtso, ohopehte hin’u toj olhetekej wichi toj fwitses, ochumet hop toj one’tek iyhaj wichi hiw’en n’ohohen chinaj t’oj. Oho yepej lhip t’at che hope olhay’e hin’ul toj t’u n’oye. Ohopehte elh toj fwitsaj wet owoyejehte wichi lewit’ayhyaj.

»Mat ichehte ifwala toj oyahyen m’ak toj ihi Biblia: ‹Elh chik lehumnhayaj ihi ihanej tä iteläytej m’ak at chik häpe. Häpe elh tä hap’altsentsaj. Tek t’ischeneje elh m’ak at chik häpe. Tek lhaiwujyen wet tek lhaichäjlhi. Tek yen w’et m’ayeka elh, wet t’uhikwet’a m’ak tä lham isej. Tek lhaiwäkwyayenlhi, wet yenhit’a tichunhayaja m’ak tä elh p’ante iwoyeje› (1 Corintios 13:4, 5). Toja nichotehte ot’otle. Ot’ayehte honhat lhip elh, oyikatchufwi toj otetshan Biblia wet owoye.

»Athana nemhit owo wit’aya iyhaj wichi. Wichi yenhit’a n’o w’et m’ayeka hop toj ochufwenejen m’ak toj ihi Biblia wet m’ak toj oihi lhay’e lhip toj is».

M’ak toj wichina yome wet iyhaj m’ayhay toj malhyejenna ipayen t’at toj «Dios lhämet iläy wet takhajay» (Hebreos 4:12). M’ayhay toj ihi Dios Lhomtes atahit’a che nahanej, che nawoye wet naikajyenhen.

¿Ha iwoyek tach’ot ame Biblia? Matche, iwoye tej toj iche awit’ayhyajay. «Nilhokej N’olesaynhay tä ihi Lehi tälho t’at Dios leyalh, wet t’uhawetej che õyen chufwenyaja, wet õyen fwonyaja, wet õ’isyenej alhoho elh tä weta, wet õ’hantej wichi häp m’ak tä is che iwoye, häpkhilek niwohit m’ak che tatäyej elh tä Dios kawo, mat wak’alh t’at yämthilek iwoye nilhokej m’ak tä is» (2 Timoteo 3:16, 17).

¿Ha lehuminchek letetshan iyhaj n’ochufwenyajay toj ihi Biblia?