TOJ kamaj newache Honhat, Heowa yenwetha p’ante ángeles toj ihi pele. Toj paj, tefwajni ángel elh toj iwo tesa toj ikone n’on’okhayaj toj lewuk Dios. Ángeltso iwahnej p’ante che t’akonyajtso ikalhi wet lhayen p’ante hopeya Satanás, n’olhametna hope toj n’oyok «N’otayhfwa». ¿Atsi p’ante toj iwoye ángeltso toj tamenej toj n’oyen lheya tajtso?

Satanás ifwech’enlhi p’ante Eva, yome toj che tufw hal’o lhay toj Dios n’ayejo ikathiyeja m’ak toj is. Ikanej p’ante hopkhilak ileche m’ak toj Dios ne’tek iwoye. Hote, yome p’ante toj Dios w’etahuylhi. Yo p’antek: «Dios ihanej t’at, chik amel letufw lhay häp hal’ätso, hätehlat iwoyek tafwoche’pe atey, letäfwenhiyeja m’ak tä is lhäy’e m’ak tä ni’isa» (Génesis 3:5). Eva n’ofwech’enlhi p’ante wet inak’as p’ante Dios laka ley wet ikalhi p’ante Adán hopkhilak hote tufw. Talhe lewhaytso Satanás hope, wichi toj hiw’en t’ekhahyaj toj matche, letayhfwa toj lhamya wet ifwalasna kamaj ikanej wichi. ¿Chi iwoyneje?

Satanás ichumyenlhi p’ante n’on’okhayaj toj n’otiyej n’ocheyalis wet wichi lakeyis hopkhilak itiyej kanhi Israel lhayis len’ayij toj is. Jesús, Mesías, ifwenho p’ante n’ochufwenyajwuhuy toj len’okhayaj toj itiyej Dios laha ihihit’a hop toj ichufwenej p’ante wichi «m’ak tä hin’ol fwetaj is alhoho» (Mateo 15:9). Lewhay toj Israel lhayis tekawayhla Mesías, Dios tekawayhla p’ante lhameltso. Toj malhyejtso, Jesús yo p’antek: «Õ’sohla amejen Dios Niyatyaj wet õhw’enhihola wichi tä iwohla lhaya» (Mateo 21:43). Lewhaytso Jesús lechufwenkay iwo tesa toj hope Dios laka wichi toj lakopfwayaj iyej.

Toj malhyejtso Satanás iwatla p’ante che itiyej kanhi Jesús lechufwenkay len’ayij toj is. ¿Ha ikalhi p’ante? Jesús iwo p’ante letech’ayneka yome p’ante m’ak toj n’anhila. Yome toj iche hin’u toj tutchey itatcho yachuyaj lhoy toj isen wok trigo ithatho yachuyajw’et, toj paj elh hin’u toj letayhfwa itat’pe yachuyaj lhoy toj ni’isa wok cizaña. Trigo lhay’e cizaña nilhokcha toj lhaichiyhelthen paj toj nichate lewhay toj n’otechuma. Toj paj cizaña n’otiyej kanhi wet n’op’ohen, mat trigo n’otechuma wet n’ot’amajej n’othatho lewuk lhokw’et.

Jesús y’ithatho p’ante lechufwenkay atsi toj hope n’otech’aynektso. Lham hope N’utchenaj. «Yachuyaj lhoy tä isen häpe lhamel tä Dios Niyatyaj leles, wet cizaña häpe ahättaj leles, wet elh tä ithatchä cizaña häpe t’at ahättaj. Yachuyaj tä õ’lanhi häpe ifwala chik honhat noj [ifwalas toj lepes n’on’ayhay toj ihanlhi m’ayhay toj ihonhatena, NM], wet lhamel tä ilanhi yachuyaj lhay häpehen ángeles» (Mateo 13:38, 9). Jesús itech’aynej p’ante trigo lechufwenkay. Mat Satanás, malhyej iwoye hin’u toj tutchey, itatcho lechufwenkay toj ni’isahen iti whoye Jesús lechufwenkay toj matchehen. Toj malhyejtso, malhyej toj yome p’ante, wujpe lewhay toj tafwaytshi toj y’il, n’al p’ante n’ochufwenhay toj kamatachehen. Lhamel ichufwenejen p’ante iyhaj lechufwenyajay toj kamatachehen, malhyej Trinidad toj yome toj Dios, Lhos wet espíritu toj n’ot’amajchet, nilhokej toj iwekw hope Dios toj weihalha. Hote, lhamel iwo p’ante tesa toj n’okwiyej n’ocheyalis wet lhay’uytho m’ak toj niya tey iwoye. Toj lepese p’ante wujit’a p’ante’pe wichi toj ihanlhi Jesús lechufwenyajay.

Mat, malhyej toj Jesús y’ithat p’ante w’enhahila lhamej m’ayhay. Toj malhyejtso, lewhayisna Dios laka ángeles kamaj hiw’enhat kanhi wichi toj niw’ena n’ot’ekhahyaj toj matche hopkhilak tatayhen. Hop toj tamenej toj athahit’a che n’otafwelej wichi toj hiw’en n’ot’ekhahyaj toj matche. Toj lepese, Satanás, elh toj lhamya toj letayhfwa n’ot’ekhahyaj, hote n’otayhthila. Lewhaytso n’ot’ekhahyaj toj matche hopkhilak imalhnhi.

Mat, ¿chi is che lewoyneje hopkhilak letafwelej wichi toj t’ekhahyaj matche? Librofwajna lew’ole toj ihan elhna natetshana n’oy’atshanekna.