1, 2. ¿Atsi lhip toj iwoyek naletane ifwalasna?

TICHUNLA che letiyajche nʼayij wet iwo tesa toj pele ichalaj, nam ihwok wet wuj toj iwomcha. Toj malhyejtso, letʼukwe lhip toj leletane. Matche toj akajyaj ihi che lelhoke lhip toj iwoyek lhechufwi.

² Ifwalasna nʼehi mʼayhay toj hate iwoye tajtso. Mʼayhay toj iʼpe honhatna tʼaytshipej toj niʼisa. Nʼalej toj letayʼatshan ame: «¿Atsi lhip toj iwoyek naletane?». Iche pʼante elh hinʼu toj ilesayen Biblia toj yok: «Ahäpe oletnhawet wet owukwe tä takhajay. Ahäpe oka Dios tä otʼekhaye» (Salmo 91:2). Heowa iwoyek tachʼot namehen hopkhilak natumla lhawitʼayhyajay, wet hiwʼen namhohen lhaniwhayaj toj matche toj isilataj toj tatay alhoho.

3. ¿Atsi mʼak toj is che nawoye hopkhilak Heowa tachʼot namehen?

³ ¿Atsi mʼak toj iwoye Heowa hopkhilak tʼu namehen? Lham iwoyek tachʼot namehen hopkhilak natayhla lhawitʼay at che hope. Hate, lhayʼe lhip toj takhajay, inuʼpe nʼoelh at che hope toj tʼuhlak iti namejen lhawitʼay. Che athana iche mʼak toj niʼisa toj inamejen, iwoyek kalelhaj namhohen toj Heowa yamla isen mʼayhay toj tatay alhoho. Dios Lhomtes inityen namejen toja: «Yej lhekaychʼoye Dios lehumnhayaj» (Judas 21). Hopkhilak Heowa tachʼot  namehen toj natayhla hop nʼowitʼayhyajay, is che ihi toj ihi toj naise lham. Mat, ¿atsi mʼak toj is che nawoye hopkhilak nakalhi tajtso?

4, 5. ¿Atsi pʼante mʼak toj iwoye Heowa toj inʼalit toj iti namejen lehumnhayaj?

⁴ Hopkhilak nʼekchufwi toj nahopehen Heowa lakalayʼis wok lhoyfwas, is che nahanej toj matche toj iti namejen lehumnhayaj. Tichunchʼoye nilhokej mʼayhay toj Heowa iwoyej namehen. Hiwʼen pʼante namhohen honhat toj hope lhip toj matche toj isilataj, halʼay toj isis wet itshatay. Hate hiwʼen pʼante namhohen nʼolhak toj matche toj akaj wet tshaji inat. Hate Heowa ichufwen pʼante namejen toj ihi Biblia hop lhey wet atsi Dios toj hope. Mat, lehumnhayaj toj matche toj wuj toj inʼalit pʼante, hope toj ichen honhate Lhos Jesús, hopkhilak iwompe lewʼatshancheyaj nilhokej namel (Juan 3:16). Isej tajtso, nawʼen lhaniwhayaj toj matche toj isilataj toj tatay alhoho.

⁵ Heowa itihi pʼante nʼoniyatyaj hop pele toj atofwiyetʼa che itayhtila nʼotelaythayaj wet yamla wʼatshan wet isilataj honhat, toj nʼehihla lhatamsek wet lhakajyaj (Salmo 37:29). Heowa hate inʼalit pʼante toj iti namejen lehumnhayaj toj ichufwen namejen toj is mʼak toj nʼehi. Hate, tʼalhej namehen che nawo tʼalhyajaye wet lham nilhok lewhay tachʼahupej namehen. Toj malhyejtso, Heowa iti namejen lehumnhayaj toj matche nihokej namel.

6. ¿Atsi mʼak toj iwoyek am lewoye toj lewʼenho gracias Heowa toj hiwʼen namhohen lehumnhayaj?

 ⁶ ¿Atsi mʼak toj iwoyek am lewoye toj lewʼenho gracias Heowa toj hiwʼen namhohen lehumnhayaj? Lenʼaltej toj matche toj laha ihi mʼayhay toj iwoyej ame. Mat honhatna wujpe wichi toj iwohiyetʼa tajtso. Malhyej pʼantetso wichi toj iche lewhay toj Jesús ihi honhat. Iche pʼante lewhay toj Jesús ichesten diez amostas lanhay, mat hatefwajni pʼante toj hiwʼenho gracias (Lucas 17:12-17). Namel natʼuhlak nahate iwoye hinʼutso wet nanʼaltej Heowa nilhok lewhay toj nawʼenho gracias.

7. ¿Chi malhyej (ep hote) toj is che nahumin Heowa?

⁷ Hate is che nanʼalit toj nahumin Heowa. Jesús ifwenho pʼante lechufwenkay toj lehumnhayaj toj itiyej Heowa, is che imalhetwek lehusek, lewʼatshancheyaj, wet letichunhayajay (yahyen Mateo 22:37). ¿Atsi toj hope nʼolhomettso?

8, 9. ¿Atsi mʼak toj nawoye toj nanʼaltej Heowa toj nahumin?

⁸ ¿Ha tajlhamet toj is che name toj nahumin Heowa? Kha. Che nahumin Heowa toj namalhetwek lhahusek, lhawʼatshancheyaj wet lhatichunhayaj, mʼayhay toj nawoye is che inʼalit tajtso (Mateo 7:16-20). Dios Lhomtes kalelhaj toj ichufwen namejen toj che nahumin Dios, nachʼahuyehla laka leyes. ¿Ha hope mʼak toj atha tajtso? Kha, hop toj Heowa laka leyes «tek choyhat» (yahyen 1 Juan 5:3).

⁹ Lewhay toj nachʼahuye Heowa, nʼen lhakajyaja mʼak toj nʼehi (Isaías 48:17, 18). Mat, ¿atsi toj tachʼotla namehen hopkhilak yikchufwi toj nahopehen lakalayʼis wok lhoyfwas? Natetshan.

10. ¿Atsi mʼak toj tamenej toj is che am lhekchufwi toj alechufwenej mʼayhay toj talhejla Heowa?

¹⁰ ¿Atsi mʼak toj lewoye pʼante toj tamenej toj ahope Heowa lakalayʼi wok lhoyfwa? Toj alechufwenej pʼante Biblia, lhayʼe lhip toj letafwelej Heowa wet lechiyhelit toj ahope lekalayʼi wok lhoyfwa. Toj akalayʼi Lham malhyej iwoye itaj. Hopkhilak kamaj lakʼe is che letato halʼay. Tajtso hope toj am is che lhekchufwi toj alechufwenej mʼayhay toj talhejla Heowa hopkhilak ihi toj ihi toj aise lham (Proverbios 2:1-5).

11. ¿Atsi mʼak toj lelathiyela toj nichate ahusek toj alechufwenej mʼayhay toj ihi Biblia?

¹¹ Toj lhimpajpej toj alechufwenej Biblia, lehanhiyeja mʼayhay toj nichate ahusek. Lhek tetshan mʼak toj iyej pʼante dos Jesús lechufwenkay toj lhamel ilate toj lham ikalelhto iyhaj profecías. Lhamel yopʼantek: «Tä yʼanekche nʼäyij, tä lham yämlhi nʼamhohen oläte ohusek tä lakäjyaj ihi tä lham yʼithat nʼamhohen Dios lhämtes tä ihi Lehi» (Lucas 24:32).

12, 13. a) ¿Atsi pʼiya mʼak toj iwoyek iyej lhahumnhayaj toj natiyej Dios? b) ¿Atsi mʼak toj iwoyek namel nawoye hopkhilak nofwitʼa lhahumnhayaj toj natiyej Heowa?

¹² Mʼak toj Jesús ichufwenej pʼante dos lechufwenkaytso, nichate pʼante lhamel lehusek. Nʼalej toj am lewhay toj lewo tesa toj alechufwenej Biblia matche toj lhen akajyaja. Isej tajtso, iwoye pʼante toj letafwelej Heowa wet toj lehumin. Kalelhaj tʼat toj am letʼuhitʼalahla che nʼohumnhayajtso yʼom (Mateo 24:12).

¹³ Athana toj ahope Dios lakalayʼi, is che alekhajyenej  hopkhilak ihi toj ihi toj takhajay toj aise. Hopkhilak lekalhi tajtso, is che letujlhache toj alechufwenej mʼayhay toj talhejla Heowa wet Jesús. Hate, is che letichunejlhi mʼayhay toj alechufwenej wet toj lewoye mʼayhayna (Juan 17:3). Toj leyahyen wok alechufwenej Biblia, atshan ame: «¿Atsi toj ichufwen nʼoyej toja toj talhejla Heowa? ¿Atsi mʼak toj tamenej toj is che omalhetwek ohusek wet owʼatshancheyaj toj otiyej ohumnhayaj Heowa?» (1 Timoteo 4:15).

14. ¿Atsi mʼak toj tamenej toj nʼotʼalhyaj ikhajyen lhahumnhayaj toj natiyej Heowa?

¹⁴ Che am lewʼen akalayʼi toj matche, nʼalej toj letahuyejpej nilhokej ifwalas. Tajtso tamenhiyeja toj matche toj aise lham. Toj malhyejtso, lhahumnhayaj  toj natiyej Heowa takhajay lewhay toj nawo tʼalhyajaye ifwalapej (yahyen 1 Tesalonicenses 5:17). Hop nʼotʼalhyaj hope nʼowʼayhat toj lhamya toj talhe Lhajcha. Nilhok lewhay is che talho lhahusek lhalhomtes toj nafwenho (Salmo 62:8). Isitʼa che nachajopej hop nʼotʼalhyajay, mat is che talho lhahusek mʼak toj nafwenho lham. Che natujlhache toj nalechufwenej Biblia wet natalhto lhahusek toj nawo tʼalhyaja, kamaj takhajayhla lhahumnhayaj toj natiyej Heowa.

15, 16. ¿Atsi atichunhayaj toj letiyej toj nʼoyen lhometa nʼosilotyajay toj isen?

¹⁵ Hopkhilak yikchufwi toj nahopehen Heowa lakalayʼis, hate is che name mʼayhay toj natʼekhaye, nafwenho iyhaj wichi. Toj nafwenho wichi iyhaj mʼayhay toj yome Heowa, hope mʼak toj matche toj laha ihi (Lucas 1:74). Hate, hope pante Jesús lhomet toj neʼte pʼantek nilhokej Dios lakawos toj matchehen is che iwoye. Toj malhyejtso, nilhokej namel is che nʼen lhometa nʼosilotyajay toj talhe Dios niyatyaj. ¿Ha am lewoye tajtso? (Mateo 24:14; 28:19, 20).

¹⁶ Hop apóstol Pablo matche toj ihumin pʼante toj iwo lhometa, hop toj tamenej toj yopʼantek hope «mʼak tä wuj tä laha ihi» (2 Corintios 4:7). Toj lefwenho iyhaj wichi mʼayhay toj yome Heowa wet lenechʼethayaj, hope mʼak toj matche toj laha ihi toj iwoyek am lewoye. Toj lewo ometa, hope elh mʼak toj lewoye toj letachumhoplhi Dios, wet letichunhayaj  toj itiyej mʼayhay toj lewoye toj letachumhoplhi matche toj laha ihi (Hebreos 6:10). Toj lewo ometa, letachʼote iyhaj hopkhilak hopehen Dios lakalayʼis wet ikhajyen toj am aise. Isej toj lewo ometa, iwoyek lekatej nʼowʼatshancheyaj toj tʼun, wet hate iyhaj toj tachʼahu ame (yahyen 1 Corintios 15:58). ¿Ha iche elh nʼochumet toj malhyejtso toj iwoyek hiwʼen amho akajyaj?

17. ¿Atsi mʼak toj tamenej toj is che nʼokelit toj nʼoyen lhometa nʼosilotyajay toj isen?

¹⁷ Matche toj is toj nʼokelit che nʼoyen lhometa nʼosilotyajay toj isen. Dios Lhomtes yok: «En ämeta Dios lhämet. [..], mat yej pantej ämet» (2 Timoteo 4:2). Wichi iwatlak ilate nʼosilotyajay toj talhe Dios Niyatyaj. Hate, Biblia yome toj «atottʼa alhoho Lhawuk laka ifwala tä wuj» wet ilafwel toj yam alhoho. Ifwala toj lepes «ichäthiyela, nihihlä tanej chik pajlä» (Sofonías 1:14; Habacuc 2:3). Atofwiyetʼa toj Heowa itayhtila nilhokej mʼayhay toj iʼpe honhatna toj lewuk Satanás. Toj kamaj nichataye tajtso, is che nafwenho wichi hopkhilak itsupyene toj tachumhoplhi Heowa.

18. ¿Atsi mʼak toj tamenej toj is che nalehutwek hopkhilak nanʼokwiyej Heowa?

¹⁸ Heowa tʼuhlak lakawos toj matchehen lhaihutwek hopkhilak nʼokwiyej. Biblia yok: «Nʼatʼukwe lhakey tä is yämlek yʼahumin nʼamehen wet yʼatchʼotej nʼamehen lhachumtes tä isen. Isitʼak yʼaleyej tä yʼalhaihutpejwek, mälhyej tä iche iyhäj tä ileyej, mat nʼanityen lhamejen. Wet nem koyhyaj tä is chik yʼawoye täjtso, tä yʼawʼen tä tottʼa alhoho ifwala tä Lhawuk  tapinla» (Hebreos 10:24, 25). Is che lhayʼe lhip toj nalekhajyenej toj nahoye nilhokej reuniones. Toj nʼehi, iwoyek nanityen lhaiyhaj wet nakhajyenhen.

19. ¿Atsi mʼak toj tachʼotla namehen hopkhilak nahumnhen lhapunfwas?

¹⁹ Toj ihi reuniones, lewʼenla akalayʼis toj isen. Lhamel tachʼotla ame toj letachumhoplhi Heowa. Letafwenhiyeja iyhaj lhapunfwas toj wʼenhahiche lakeyis wet mʼayhay toj ihi pʼante toj hate lhaikhajyenhen hopkhilak tachumhoplhi Heowa. Mat, malhyej iwoye am, hopehen wichi toj lechʼisukyajay ihi wet iche toj isitʼa alhoho mʼak toj iwoye. Che iche mʼak toj malhyejtso, is che lekalhi toj letayhtejen letes (yahyen Colosenses 3:13). Is che tajlhamet toj letetshan lakeyis toj isen toj iyej lhapunfwas. Tajtso tachʼotla ame toj lehumnhen wet lekhajyen toj aise Heowa.

20, 21. ¿Atsi toj hope «[nʼo]wʼatshancheyaj tä matche»?

²⁰ Heowa tʼuhlak nilhokej lakalayʼis wok lhoyfwas matche toj is mʼak toj ihi. Biblia yome toj lewhayis toj tatay alhoho, hatethitʼala iwoye ifwalasna.

²¹ Lewhay toj natataye nalayhichehla yamlek tiyajʼattsiy, wet tsʼilakhitʼala che nawʼenla 70 wok 80 nekchomis. Nʼenla khajyaja «[nʼo]wʼatsancheyaj tä tʼun» toj ihihla honhat toj wʼatshan wet isilataj, nemla lhatʼinhayajay ihi, lhatamsekis ihihla wet nʼehihla lhakajyaj. Hop tajtso toj Biblia yome toj hope «[nʼo]wʼatshancheyaj tä matche». Heowa yome pʼante toj hiwʼenla namhohen nʼowʼatshancheyajna, mat is  che lhayʼe lhip toj nalekhajyenhen hopkhilak nakatej (1 Timoteo 6:12, 19).

22. a) ¿Atsi mʼak toj iwoyek namel nawoye hopkhilak nakatej «[nʼo]wʼatshancheyaj tä matche»? b) ¿Atsi mʼak toj tamenej toj hopkhitʼa mʼak toj tʼuhawetej che nʼowʼen namhohen nʼowʼatshancheyaj toj tʼun?

²² ¿Atsi mʼak toj is che nawoye hopkhilak nakatej «[nʼo]wʼatshancheyaj tä matche»? Is che lhachumtes hope «mʼak tä is» wet «[lha]käywet tä matche» hope tʼat lhachumtes toj isen toj nawoye (1 Timoteo 6:18). Tajtso hope toj is che nawoye mʼayhay toj nalechufwenej toj ihi Biblia. Mat nʼowʼatshancheyaj hopkhitʼa mʼak toj nakatiyeja hop toj isej lhakhajyhayaj. Tej toj matche toj nalekhajyenpe, hopkhitʼa mʼak toj tʼuhawetej che nʼowʼen namhohen. Hope nʼotʼawayhat toj Heowa hiwʼenho lakawos toj tʼifwtintses «häp tä isej lepʼaltsenyaj» (Romanos 5:15). Lhajcha toj ihi pele tʼuhlak hiwʼenho lakawos nʼowʼayhatna toj matche toj isilataj.

23. ¿Atsi mʼak toj tamenej toj am is che letshupyene toj lewoye mʼayhay toj isen athana?

²³ Atshan ame: «¿Ha onʼokwiyej Dios malhyej toj lham ihumin?». Che letafwelej toj is che lewo iyhaja mʼayhay toj lhehi, is che lekelit toj lewoye. Che natʼekhaye Heowa wet nalekhajyenej toj nachʼahuye, Lham hope tʼat lhaletnhawet. Heowa tʼuhiyela lakawos lewhay che nichate lepes mʼayhay toj niʼisa toj iʼpe honhatna. Wet che tafwaytshi tajtso, malhyej toj lham yome pʼante, nawʼenla nʼowʼatshancheyaj toj tʼun toj ihihla honhat toj wʼatshan wet isilataj. Che am athana lekalelhat toj letshupyene toj lewoye mʼayhay toj isen, iwohiyela che lekatej nʼowʼatshancheyaj toj tʼun.