LEWHAY che leyahyen diario, leyahin televisión wok letachʼahuye radio, lewʼen wet lelate toj iche wujpe wichi toj ilanhen iyhaj, nʼokaʼtshayaj wet terrorismo. Nʼalej toj am lhehi atelaytayaj hop toj atʼinhayaj ihi wok hop toj iche aelh toj lehumin toj yʼil pʼante.

Atshan ame:

• ¿Ha hope mʼayhayna toj Dios tʼuhlak inʼoyej wet iyej owʼet lheley?

• ¿Atsi mʼak toj iwoyek tachʼot nʼoye hopkhilak otumla owitʼayhyajay?

• ¿Ha iwohiyela che iche nʼotamsek toj matche?

Hop Biblia kalelhaj toj nichulho nʼoyʼatshanhayna.

• Wichi nemla ilat mʼak toj aytaj, nemla hichʼuthen wok yʼinhen (Apocalipsis 21:4).

• «Wet tsufwlas tiyäjichephäla, hätehlat iwoye tsonʼa tä tiyäjphä» (Isaías 35:6).

• «Wet asnamis hiwʼenhichehena honhat» (Isaías 35:5).

•  Wichi toj yʼinhen pʼante yachajohla toj ilayhiche (Juan 5:28, 29).

• Ihichetʼala nʼoelh che tʼinhayaj ihi (Isaías 33:24).

• Nilhok wichi toj iʼpe honhat hiwʼenla lhak toj wuj (Salmo 72:16).

Nʼalej toj athahitʼa pʼiya, toj letichunla mʼayhay toj leyahyenne toj ihi lewʼoley toj ichun toj ihi librona, hope toj tajlhamet toj wichi ihuminche che hiwʼen mat ihichetʼala. Mat Dios yome pʼante toj atofwiyetʼa toj yamla matche toj iwohla iyhaja mʼayhay toj iʼpe honhat, wet Biblia ikalelhat atsi mʼak toj iwohiyela che iwoye tajtso.

Iche mʼayhay iyhaj toj isen toj ihi Biblia. Ifwel namhohen mʼak toj namel nawatlak nahanej hopkhilak matche tʼat toj lhakajyaj ihi wet nahumin toj nʼechehen ifwalasna. Lhek tichunla lhimpaj mʼayhay toj tamenej toj am alhakli ihi. Nʼalej toj hopehen mʼayhay toj malhyej chinaj tʼoj wok lhawʼet lheley, nʼotʼinhayaj, wok iche aelh toj lehumin toj yʼil. Hop Biblia iwoyek tachʼot ame hopkhilak letumla nʼowitʼayhyajayna, wet hiwʼen amho atamsek toj nichulho nʼoyʼatshanhay toj malhyejenna:

• ¿Atsi mʼak toj tamenej toj lhatelaythayaj ihi?

• ¿Atsi mʼak toj iwoyek nawoye hopkhilak natumla lhawitʼayhyajay?

• ¿Ha iwoyek lhawʼet lheley lekajyaj ihi?

• ¿Atsi mʼak toj inamejen toj nayʼinhen?

• ¿Ha yachajohla che nawʼen ifwala che hope lhaiyhaj toj yʼinhen?

• ¿Atsi mʼak toj tamenej toj kalelhaj namhohen toj Dios yamla matche mʼak toj yome pʼante toj iwohiyela?

 Toj am leyahyen librona lenʼalit toj lehuminchek lehanej Biblia lechufwenyaj. Librona tachʼotla ame hopkhilak lewoye tajtso. Iche nʼoyʼatshanhay toj tataye párrafos toj tachʼotla ame hopkhilak tʼaytshi toj letafwelche Biblia. Millones wichi toj yen lekajyaja toj lhaichufwenej Biblia lhayʼe wichi toj yen lhometa Heowa. Olhamel otʼuhlak hate am. ¡Dios iti amej lakopfwayaj toj is lewhay toj nechʼepej toj lehanej mʼak toj Biblia iwoyek ichufwen amej!