NʼOCHUFWENYAJ 15
Lenʼayij toj is alhoho toj nʼonʼokwiyej Dios
1. ¿Atsi nʼoelh toj tʼuhawetej toj ifwel namhohen lenʼayij toj nanʼokwiyej Dios?
WUJPE religiones iyhaj yome toj lechufwenyaj hope mʼak toj matche toj talhejla Dios. Mat iwohiyetʼak matche tajtso, hop toj religiones wʼenhahiche lechufwenyajay toj yome atsi toj hope Dios wet lenʼayij toj nʼonʼokwiyej. Toj malhyejtso, ¿atsi mʼak toj iwoyek tachʼot namehen hopkhilak nahanej atsi religión toj matche? Tajlhamet Heowa toj iwoyek ifwel namhohen lenʼayij toj is che nanʼokwiyej lham.
2. ¿Atsi mʼak toj is che lewoye am hopkhilak lehanej lenʼayij toj nʼonʼokwiyej Dios?
2 Heowa hiwʼen pʼante namhohen Biblia hopkhilak nahanej lenʼayij toj nanʼokwiyej. Toj malhyejtso matche toj is che alechufwenej. Dios tachʼotla ame toj letafwelche wet lewoye lechufwenyajay, hop toj matche toj ayen lelhakliya (Isaías 48:17).
3. ¿Atsi mʼak toj Dios tataye che namel nawoye?
3 Iche iyhaj wichi toj yome toj Dios tachumla nilhokej religiones, mat hopkhitʼa pʼante tajtso Jesús lechufwenyaj. Lham yopʼantek: «Tek nilhokhiyeja lhamel tä yäm nʼoye tä yok, Iwuk, Iwuk, chik nichäthihola Dios Niyatyaj. Tsʼilakhila lhamel tä iwoye Ojcha tä ipuleye lenechʼethayaj» Toj malhyejtso, Dios tataye che nalechufwenej mʼak toj lenechʼethayaj wet is che nawoye. Tajtso matche toj laha ihi, hop toj Jesús itechʼaynej pʼante wichi toj tachʼahuhiyetʼa Dios, hop wichi toj yen wʼet mʼayeka ley wet yopʼantek: «Amel tä lewoyaye mʼak tä niʼisa» (Mateo 7:21-23).
4. ¿Atsi mʼak toj Jesús ikalelhat pʼante toj ihiyeja wichi toj iwoye Dios lenechʼethayaj?
4 Jesús yome pʼante toj, che natʼuhlak nawoye Dios lenechʼethayaj, athahla mʼak toj nehi. Lham yopʼantek: «Nukwe lepe tä nitsajaho. Tsi tsajo lepe wet tsajche nʼäyij tä tiyäje nʼotäyhyaj, wet wujpey wichi tä inukwe. Mat tsajihotʼa lepe wet tsajichetʼa nʼäyij tä tiyäje nʼowʼatshancheyaj, wet wuj tä atha, wet wujitʼaʼpe wichi tä nilhoke» (Mateo 7:13, 14). Nʼayij toj tsajihotʼa hope religión toj matche wet tiyaje nʼowʼatshancheyaj toj tʼun. Nʼayij toj tsajo hope religión toj kamatache wet tiyaje nʼotʼilek. Mat Heowa tʼuhitʼahlak nʼoelh at che hope che yʼil, hop toj tamenej toj hiwʼenho lewhay nilhokej wichi hopkhilak lhaichufwenej mʼak toj talhejla lham (2 Pedro 3:9).
¿HA IWOYEK LEHANEJ ATSI RELIGIÓN TOJ MATCHE?
5. ¿Atsi mʼak toj iwoyek inʼalit amej hopkhilak lehanej atsi religión toj matche?
5 Jesús yome pʼante toj iwoyek natafwelej iyhaj toj ihanlhi religión toj matche. Hop toj tamenej toj is che natetshan lhamel tʼekhahyaj wet mʼak toj lhamel iwoye. Lham yopʼantek: «Letäfwnhiyeja lhamel chik lewʼen lechumyaj». Wet hate yopʼantek: «Halʼä tä is iwoye lhay tä is» (Mateo 7:16, 17). Tajtso hopkhitʼa toj wichi toj nʼokwiyej Dios hopehen wichi toj matche toj isen. Mat Dios lakawos nilhok lewhay lhaikhajyenej toj iwoye mʼak toj is alhoho. Natetshan athana mʼak toj iwoyek tachʼot namehen hopkhilak nahanej atsi religión toj matche.
6, 7. a) ¿Atsi mʼak toj tamenej toj religión toj matche italhto lechufwenyajay hop Biblia? b) ¿Atsi mʼak toj ichufwen namejen mʼak toj Jesús iwoye pʼante?
6 Religión toj matche lechufwenyajay talho tʼat Biblia. Dios Lhomtes yok: «Nilhokej Nʼolesaynhay tä ihi Lehi tälho tʼat Dios leyalh, wet tʼuhawetej che õyen chufwenyaja, wet õyen fwonyaja, wet õʼisyenej alhoho elh tä weta, wet õʼhantej wichi häp mʼak tä is che iwoye, häpkhilek niwohit mʼak che tatäyej elh tä Dios kawo, mat wakʼalh tʼat yämthilek iwoye nilhokej mʼak tä is» (2 Timoteo 3:16, 17). Hop apóstol Pablo ilesayen pʼante lhomet toj itate Dios lakawos toj yok: «Tsi tä owohte siläta amejen Dios lhämet, amel letachumʼatlä, tsi letʼekhaye tä Dios lhämet tʼat, häpkhitʼa hinʼol lhämtes» (1 Tesalonicenses 2:13). Religión toj matche italhto tʼat Biblia lechufwenyajay, hop toj hope Dios Lhomtes. Talhiyetʼa mʼayhay toj hinʼul letichunhayajay wok lakeyis toj lhamel iwoye pʼante.
7 Jesús italhto pʼante Dios Lhomtes nilhokej lechufwenyajay (yahyen Juan 17:17). Nilhok lewhay ikatpejla mʼayhay toj ihi Biblia (Mateo 4:4, 7, 10). Hop Dios lakawos toj matchehen iten mʼak toj Jesús iwoye pʼante wet nilhokej lechufwenyajay italhto tʼat Biblia.
8. ¿Atsi mʼak toj Jesús ichufwenej pʼante wichi lenʼayij toj tʼuhawetej toj nʼonʼokwiyej Heowa?
8 Tajlhamet Heowa toj is che nʼonʼokwiyej. Salmo 83:18, TNM, yok: «Hopkhilak wichi ihanej toj ey hope Heowa, tajlhamet am toj ahope Nʼowujtaj toj iʼpe nilhok Honhat». Jesús tʼupʼantehlak wichi matche toj ihanej atsi toj hope Dios toj matche. Hop toj tamenej toj ichufwenej pʼante wichi hop Dios lhey wet yopʼantek: «Hop lhamel toj letʼahi toj iyej honhat leles toj lewʼen nʼoho, pajche otafwnhatej lhamel hop ey. Alewuk tʼat lhamel, wet lewʼen nʼoho, wet iwoye amet» (Juan 17:6, TNM). Jesús hate yopʼantek: «Nʼokwiyej Awuk Dios, wet tsʼilkat lham tä lewujyen» (Mateo 4:10). Toj malhyejtso, toj nahopehen Dios lakawos naten mʼak toj Jesús iwoye pʼante. Tajlhamet Heowa toj nanʼokwiyej, nachumyenlhi lhey wet nachufwenej iyhaj. Wet hate nachufwenej wichi mʼak toj Dios iwohiyeja namehen.
9, 10. ¿Atsi mʼak toj nawoye toj nanʼaltej lhahumnhayaj lhaiyhaj?
9 Is che nʼonʼaltej nʼohumnhayaj toj matche iyhaj wichi. Jesús ichufwenej pʼante lechufwenkay toj is che iti lhamejen lehumnhayaj (yahyen Juan 13:35). Lhahumnhayaj toj natiyej lhaiyhaj, is che naipʼajtitwek, tej toj wʼenhalhamej lhip toj natalhe wok lhakeyis, wok che nawʼenhitʼa wok nawʼen mʼak (Colosenses 3:14). Hop toj tamenej toj nahohiyetʼa nʼokaʼtshayaj wet nalanhitʼa nʼoelh at che hope. Dios Lhomtes yok: «Yʼahanej ihi lhamel tä häpehen Dios leles lhäyʼe iyhäj tä häpehen ahättaj leles. Tsi elh at chik häpe chik niwoyaye mʼak tä is wok nhumina lepuhfwa, tälhihotʼa Dios». Wet hate yok: «“Humnhen aiyhäj.” Isitʼak nʼahäte iwoye Caín pʼante, lham tälho ahättaj wet ilän häp lechʼinij» (1 Juan 3:10-12; 4:20, 21).
10 Nachumyenlhi mʼayhay toj nawʼen, lhakhajyhayaj wet natiyej khanhi iyhaj mʼayhay hopkhilak nachʼot lhamehen wet nalekhajyenhen weihalhapej namel (Hebreos 10:24, 25). Nawoyeje «nilhokej iyhäj häp mʼak tä is» (Gálatas 6:10).
11. ¿Atsi mʼak toj tamenej toj nachʼahuye Jesús?
11 Is che nʼochʼahuye Jesús, hop toj tajlhamet lham toj nʼofwayhyaj talhe. Biblia yok: «Ihichetʼa elh at che häpe tä Dios ichen honhatena yämthilek nʼaifwayhthen» (Apóstoles Lhenhay 4:12). Toj ihi nʼochufwenyaj 5 toj ihi librona, nalechufwenej naji toj Heowa ichene pʼante lhos Jesús honhate hopkhilak iwom lewʼatshancheyaj toj yen lahayaʼpe wichi toj tachʼahuye Dios (Mateo 20:28). Heowa itshupyene pʼante Jesús toj hopkhila Niyat toj niyatej honhat. Hop toj tamenej toj Biblia ifwel namhohen toj is che nachʼahuye Jesús che natʼuhlak nʼalayhiche yamlek tiyajʼattsiy (yahyen Juan 3:36).
12. ¿Atsi mʼak toj tamenej toj nalethatichetʼa mʼayhay toj políticos iwoye?
12 Isitʼa che nʼolhaithatche mʼayhay toj políticos iwoye. Jesús lhayʼuyhtihotʼa pʼante políticos chumtes. Lewhay toj nʼotiyej pʼante nʼokalelhthayaj, tahuyej pʼante niyat romano Pilato toj yok: «Oniyatyaj tälhiyetʼa honhatna» (yahyen Juan 18:36). Malhyej iwoye Jesús, namel natʼifwtiyej Dios Niyatyaj toj ihi pele. Hop toj tamenej toj nalethatichetʼa hop mʼayhay toj políticos iwoye, tej toj nehi lhip at che hope. Mat Biblia neʼtek nachʼahuye «niyatey tä iche» (Romanos 13:1). Is che nachʼahuye leyes toj ihi honhat toj namel nehi. Mat che ley tatayhla leyes toj talhe Dios, namel naten hop apóstoles. Lhamel yopʼantek: «Lhek yahinya, iwohiyetʼak nʼam woye Dios lhämtes, mat owohiyetʼa hinʼol lhämtes» (Apóstoles Lhenhay 5:29; Marcos 12:17).
13. ¿Atsi mʼak toj nen silotyaja toj talhejla Dios Niyatyaj?
13 Is che nen silotyaja toj tajlhamet Dios Niyatyaj toj iwoyek itayhat nʼowitʼayhyajay toj iʼpe honhatna. Jesús yome pʼante toj «nʼosilätyaj tä Isna tä yäme Dios Niyatyaj» nʼowʼohla silotaʼpe imalhewek Honhat (yahyen Mateo 24:14). Ihichetʼa niyat at che hope toj iʼpe honhatna che ikalhi toj iwoye mʼak toj Dios Niyatyaj tʼuhlak iwohiyeja namehen (Salmo 146:3). Jesús ichufwen pʼante namejen toj lewhay che nawo tʼalhyaja is che nakatla Dios Niyatyaj, yopʼantek: «Is chik Aniyatyaj inʼoyejen. Is chik õʼwoye ämet honhatena, mälhyej tä õʼwoye tä ipuleye» (Mateo 6:10). Biblia ifwel namhohen toj Dios Niyatyaj itayhthila nilhokej nʼoniyatyajay toj iʼpe honhatna, tsʼilakhila nʼoniyatyajtso toj niyatej honhat wet tatayhitʼala yamlek tiyajʼattsiy (Daniel 2:44).
14. ¿Atsi religión toj lefwetaj hope elh toj matche?
14 Toj tafwaytshi toj letetshan mʼayhayna, tʼatshan ame: «¿Atsi wichi toj italhto lechufwenyajay Biblia? ¿Atsi wichi toj itafwnhatej iyhaj Dios lhey? ¿Atsi wichi toj matche toj iti lhamejen lehumnhayaj? ¿Atsi wichi toj tʼekhaye toj Dios ichen pʼante honhate Jesús hopkhilak ifwayhat namel? ¿Atsi wichi toj lhaithatichetʼa mʼayhay toj políticos iwoye? ¿Atsi wichi toj yen silotyaja toj tajlhamet Dios Niyatyaj toj iwoyek itayhat lhawitʼayhyajay?». Tajlhamet wichi toj yen Lhometa Heowa toj iwoye nilhokej mʼayhayna (Isaías 43:10-12).
¿ATSI MʼAK TOJ AM LEWOHIYELA?
15. ¿Atsi mʼak toj is che nawoye che natʼuhlak Dios tachumla lhanʼokhayaj toj natiyej?
15 Tsʼilakhitʼa toj is che nʼoelh tʼekhaye toj Dios iche. Ahot lhayis hate tʼekhaye toj Dios iche, mat lhamel tachʼahuhiyetʼa (Santiago 2:19). Che natʼuhlak Dios tachumla lhanʼokhayaj toj natiyej, is che nawoye mʼak toj lham neʼtek nawoye, tsʼilakhitʼa toj is che natʼekhaye toj iche.
16. ¿Atsi mʼak toj tamenej toj is che nʼekchʼoye religión toj kamatache?
16 Hopkhilak Dios tachumla lhanʼokhayaj toj natiyej, hate is che nʼekchʼoye religión toj kamatache. Profeta Isaías ilesayen pʼante: «¡Mäyaychʼoye, mäyaychʼoye tä lheyayhi! Amel [...] yej tsok mʼak tä kokʼaye» (Isaías 52:11; 2 Corintios 6:17). Heowa yen hopeya religión toj kamatache mʼak toj lechʼohle ihi. Hop toj tamenej toj is che natakawayhla nilhokej mʼayhay toj talhejla religión toj kamatache.
17, 18. a) ¿Atsi toj hope «BABILONIA TÄ LHAMYA»? b) ¿Atsi mʼak toj tamenej toj is che lekelit toj lhekchʼoye?
17 ¿Atsi toj hope religión toj kamatache? Hope religión at che hope toj ichufwenej wichi lenʼayij toj nitʼuhawetayej toj nʼonʼokwiyej Dios toj hatehitʼa iwoye mʼak toj Biblia lechufwenyaj. Biblia yen lheya «BABILONIA TÄ LHAMYA» nilhokej religiones toj kamatachehen (Apocalipsis 17:5). ¿Atsi mʼak toj tamenej? Toj tafwaytshi pʼante Pelhay toj wuj lewhay toj Noé iche, nʼal pʼante wujpe nʼochufwenyajay toj kamatachehen toj ihi hupuy toj Babilonia. Nʼochufwenyajaytso yʼajpe pʼante nilhok honhat. Malhyej toja, wichi toj ihi pʼante Babilonia tatshupiye tres dioses, mat toj nʼokwiyej malhyej at iwoye che wʼeihalha. Ifwalasna wujpe religiones lechufwenyaj yome toj Dios hope trinidad, mat Biblia lhayʼe lhip toj ikalelhat toj tajlhamet Heowa toj hope Dios toj matche wet toj Jesús hope Lhos (Juan 17:3). Babilonia lhayis, hate lhamel tʼekhaye pʼante toj iche mʼak toj talho nʼoelh toj yʼil, toj kamaj ilayhi wet toj iwoyek ihi letelaythayaj toj ihi itaj. Mat tajtso matichetʼa (tetshan Nʼosilotyajay 14, 17 wet 18).
18 Dios pajche pʼante yome toj nilhokej religiones toj kamatachehen atofwiyetʼa che nʼotayhten (Apocalipsis 18:8). ¿Ha am nechʼe letafwelche toj is che lekelit toj lhekchʼoye religión toj kamatache? Heowa tʼuhlak am lekelit toj lewoye tajtso toj kamaj ninama lepes (Apocalipsis 18:4).
Che letachumhoplhi Heowa, lelhayʼe laka wichi, lham hiwʼenla amho hawʼet lheley toj iʼpe nilhok honhat.
19. ¿Atsi mʼak toj iwohiyela Dios toj inʼalit toj tʼu ame che letachumhoplhi?
19 Che am lekalelhat toj leleyej religión toj kamatache wet letachumhoplhi Heowa, nʼalej toj iyhaj wichi toj hopehen hawʼet lheley, akalayʼis wok akayʼefwas, ihanhiyejtʼa mʼak toj tamenej toj lewoye tajtso wet tatay ahila, iti amej lelakwyhanyaj wok ileyej toj lhaipʼajtit amej. Mat Heowa tʼuhla ame. Hiwʼenla amho hawʼet lheley toj iʼpe nilhok honhat, millones wichi toj matche toj lhaihumnhen wet toj hiwʼen leniwhayaj toj ihihla honhat toj wʼatshan wet isilataj (Marcos 10:28-30). Tej toj athana iche iyhaj hawʼet lheley, akalayʼis wok akayʼefwas toj tatay ahila toj letachumhoplhi Heowa, mat nʼalej toj che paj tatshupiye toj lhaichufwenej Biblia.
20. ¿Atsi mʼak toj tamenej toj matche toj laha ihi che am ahope elh wichi toj ihi religión toj matche?
20 Atofwiyetʼa che Dios itayhthila nilhok mʼak toj niʼisa, wet Leniyatyaj niyatiyeja nilhok honhat (2 Pedro 3:9, 13). Hopkhila lewhay toj matche toj isilataj. Nilhokiyeja wichi nʼokwihiyeja Heowa malhyej toj lham ihuminche. Toj malhyejtso matche toj laha ihi che am letachumhoplhi Dios athana wet ahope elh wichi toj ihi religión toj matche.
