NʼOCHUFWENYAJ 10
Jesús ifwalapej tachʼahuye pʼante Heowa wet lajchalis
¿Ha hope mʼak toj athahitʼa toj letachʼahuye ajcha wet ako ifwalapej?... Ichepej lewhay toj atha. ¿Ha lehanej atsi toj Jesús tachʼahuye pʼante?... Lham tachʼahuye pʼante Heowa, hate lajcha wet lako. Mʼak toj iwoye pʼante iwoyek tachʼot ame toj letachʼahuye ajcha wet ako tej toj hope mʼak toj atha. Natetshan mʼayhayna.
Toj kamaj newahi pʼante honhat, Jesús iyej pʼante Lajcha Heowa toj ihi pele. Mat Jesús hate hiwʼen pʼante lajcha wet lako toj ihi pʼante honhatna. Lhamel lheyis hope pʼante José wet María. ¿Ha lehanej atsi toj tamenej toj lhamel hopehen pʼante Jesús lajchalis?...
Heowa yenlhi pʼante letetnek, hop toj tamenej toj Jesús lhaichiyhelit toj ihi pʼante María hate iwoye hanʼofwaj elh at che hope toj ihi lako. Toj tafwaytshi nueve meses, Jesús nechʼe nichatcha pʼante toj ihi honhatna. Hop pʼante toj malhyejtso toj María wet lechʼefwa José nichate toj hopehen Jesús lajchalis toj ihi Honhatna.
Toj Jesús hiwʼen pʼante 12 nekchamis, lham iwoye pʼante mʼak toj inʼalit toj matche toj ihumin Lajcha, Heowa. Iche pʼante lewhay toj Jesús lhayʼe lewʼet lheley ihoye pʼante Jerusalén hopkhilak nʼokwiyej Heowa. Toj lhamel yaple lewʼet, toj kamaj iche nʼayij José wet María tʼukwe Jesús mat lhamel hiwʼenhitʼa pʼante. ¿Ha am lehanej atsi lhip toj ihi pʼante Jesús?...
¿Atsi mʼak toj tamenej toj Jesús ihi pʼante Dios lewʼet?
José wet María lhamel ikelchetshi toj yaple wet ilunpe nilhokej lhipey toj ihi Jerusalén toj tʼukwe Jesús. Lhamel matche pʼante toj yen lelhakliya toj niwʼena. Mat, toj tafwaytshi pʼante tres ifwalas, ¡lhamel hiwʼen Jesús, ihi pʼante tʼat Dios lewʼet! ¿Ha lehanej atsi mʼak toj tamenej toj Jesús ihi pʼante Dios lewʼet?... Hop toj iwoye pʼantek lhaichufwenej mʼayhay toj talhejla Lajcha, Heowa. Lham ihumin pʼante Heowa wet tʼupʼantehlak ihanej mʼak toj is che iwoye hopkhilak iwo kajyaja Lham. Talhe lewhay toj lhaichiyhelit pajtha nichate pʼante toj thalakw, Jesús nilhok lewhay tachʼahuye pʼante Heowa. Jesús tachʼahuye pʼante tej che matche toj atha wet tej che tajtso iwo letelaythayaja pʼante. ¿Ha Jesús tachʼahuye pʼante José wet María?... Tachʼahuye pʼante, Dios Lhomtes yome toj iwoye pʼante tajtso.
¿Atsi mʼak toj ichufwen amej mʼak toj iyej pʼante Jesús?... Tʼuhawetej che letachʼahuye ajcha wet ako, tej che atha che lewoye. ¿Ha lewohiyela tajtso?...
