LHIP 3
Toj aytaj nʼotichunhayajay: Ichepej toj iche «aelh letes»
«Iche ipunfwa atsinha toj ihi congregación toj iti nʼoyej toj oiskat laka chinaj tʼoj. Lewhay toj iyhaj ipunfwas ihanej tajtso, iche iyhaj toj lhaitat nʼokwe wet iyhaj toj lhaitatche lham. Toj paj ipunfwana ihanej toj olhamhitʼa toj oiskat. Tej toj otʼuhlak otayhtej letes, oyenek iwohiyetʼa che otayhtej mʼak toj iwoyej nʼoye» (Linda).
¿HA ATICHUNHAYAJAY malhyej at iwoye Linda? Mʼak toj lepunfwa iwoyeje matche toj aytaj. Lhafwitajayaj ihi toj nahanej toj iche ipunfwas iyhaj toj ihuminhitʼa mʼak toj iyhaj iwoye, hop toj tamenej toj ileyej toj iwoye Heowa lenechʼethayaj. ¿Malhyejtso mʼak toj iamej?
¿Ha iche elh toj «isohla nʼamejen häp Dios lehumnhayaj tä iti nʼamejen»?
Nataye che Dios lakawos inʼaltej lehumnhayaj iyhaj, hop toj tamenej toj che iche lhapunfwa toj iwoyej namejen mʼak toj niʼisa atha che natayhat letes (Juan 13:34, 35). Toj malhyejtso, che iche lhapunfwa toj iti namejen lhawitʼay, mʼak toj inamejen matche toj aytaj (Salmo 55:12).
Biblia ikalelhat toj, ichepej toj, elh toj cristiano iwoyek ihuminhitʼa mʼak toj elh iwoye (Colosenses 3:13). Mat lewhay toj namel nahuminhitʼa mʼak toj lhaiyhaj iwoye, iwoyek atha toj natiyej kanhi. ¿Atsi mʼak toj tachʼotla namehen? Nen tichunhayaja nʼolhomtes toj matchehen iyhaj toj ihi Biblia. Natetshan tres lhamel.
Lhajcha toj ihi pele ihanej mʼak toj nehi. Heowa hiwʼen tʼat nilhokej mʼak toj inamejen, hate mʼayhay toj nʼoti namejen toj nitʼuhawetayej, wet nen lhafwitajayaja tajtso (Hebreos 4:13). Wet tsʼilakhitʼa tajtso, lhayʼe lhip toj ilat toj hiwʼen toj lhatelaythayaj ihi (Isaías 63:9). Lham inuhla che nʼowitʼayhyajay, lhatelaythayajay wok mʼak at che hope, wok che iche lekawo elh, toj «ikalhi chik isohla nʼamejen häp Dios lehumnhayaj tä iti nʼamejen» (Romanos 8:35, 38, 39). Toj nahanlhi mʼak toj lham iwoye, namel hate is che nanuhla toj, mʼak at che hope wok nʼoelh at che hope iso namejen Heowa lehumnhayaj.
Toj natayhat mʼak toj nʼowoyej namehen hopkhitʼa che nahuminche. Toj natayhat nʼoelh letes toj iwoyej pʼante namehen mʼak toj niʼisa hopkhitʼak nam lhamsaj, nakalelhat wok nafwenho mʼak toj tamenej toj isitʼa mʼak toj iti namejen. Heowa ihuminhitʼa nʼochʼisukyaj, mat che iche mʼak toj tʼuhawetej toj itayhtej nʼoelh letes iwoye tʼat (Salmo 103:12, 13; Habacuc 1:13). Lewhay toj Heowa inityen namejen toj natayhtej lhaiyhaj letes, lham ihuminchek naten hop toj lham «ileyej lewäk» (Salmo 103:9; Mateo 6:14).
Toj natiyej kanhi lhawak naisej. ¿Atsi mʼak toj tamenej? En atichunhayaja toja, che lechuma tunte toj hiwʼen un kilo toj choyhat wet leneyhatpha. Nʼalej toj athahitʼa che pitajitʼa lewhay toj lewoye tajtso. Mat ¿atsi mʼak toj ihla amej che paj lewhay toj leneyhatpha? Yelhchehla akwey che letsoklhi nitakw minutos, weihalha hora wok che tafwatshi weihalha hora. Tej toj tunte un kilo toj choyhat toj pitaj lewhay toj letsoklhi tʼaytshi toj choyhat. Toja hate iwoye toj lhawak ihi, che pajche lewhay toj natihi lhahusek, tej toj lhamsaj lhayʼe lhip toj iwo lhawitʼaya. Hop toj tamenej toj Heowa ifwel namhohen toj is che natiyej kanhi lhawak hop toj ihanej mʼak toj namel naisiyeja (Proverbios 11:17).
Toj natiyej kanhi lhawak naisej
«Malhyej at iwoye che Heowa tahu nʼoyej»
¿Atsi mʼak toj iwoye pʼante Linda hopkhilak itiyej kanhi lewak toj itiyej lepunfwa? Mʼak toj tachʼote hope toj itichunejlhi mʼak toj Biblia yome toj nʼoelh itayhat elh letes (Salmo 130:3, 4). Mʼak toj matche toj ikhajyen hope toj lehusekchʼoye toj che natayhat lhaiyhaj letes, Heowa hate itayhat lhates (Efesios 4:32–5:2). Toj itichunejlhi textos toj ikhajyen, lham yo pʼantekwe: «Malhyej at iwoye che Heowa tahu noyej».
Toj paj, Linda itiyej kanhi pʼante lewak. Imalhewek toj itayhat lepunfwa letes wet athana matche toj is lhamehen. Linda yikchufwi toj tachumhoplhi Heowa. Kalelhaj tʼat toj Heowa tʼuhlak lechumhoplhi yamlek tiyajʼattsiy.
