LHIP 1
«Otʼuhikwela iyhäj tä wetahen»
Tsonʼatas tʼeken toj tuj hop hup toj wʼatshan wet isilataj. Iche tsonʼataj elh toj wetayej iyhaj. Athana hiwʼenhitʼa lewuk wet tsonʼatas iyhaj. Tatay lhimpaj che honhatsi, wet tsonʼatajtso ihi lhip toj iwoyek nʼolan, hop toj ihichetʼa nʼoelh toj iwoyek tʼuye. Mat athana ilate nʼopak toj itafwelche, ¡hope tʼat lewuk lepak! Lewuk inu alhoho toj ihoye lela, ineyhatpha, tatshufwelej, ipoʼpe wet ichaje lewʼet.
HEOWA lhaitechʼaynejpej hop tsonʼataswo. Toj ihi lhomtes ikalelhat namhohen: «Olhamla tʼat chik otʼukwe oläy wet olhamla tʼat chik otetshan» (Ezequiel 34:11, 12).
«Olham tä otetshanhihla olay»
¿Atsi iyhaj toj hopehen Heowa lelay tsonʼatas? Hopehen tʼat hop wichi toj nʼokwiyej lham wet ihumin. Biblia yok: «Lhuyay nʼatihi lhakamchetey honhat, nʼatkhosche katsi wet nʼanʼokwiyej Lhawuk, häp lham tä lhenek nʼamel. Lham häpe lhaka Dios wet nʼahäpehen laka wichi. Lham tʼu nʼamehen, hätet iwoye tsonʼataswo tä tʼuye leläy» (Salmo 95:6, 7). Malhyej toj tsonʼatas ihan lewuk, iyhaj toj nʼokwiyej Heowa tʼuhlak ihan lham. Mat iche iyhaj toj ikalhihitʼa. Ichepej toj Dios lakawos hatet iwoye tsonʼatas toj «ifwtsatpehen honhat», «tsonʼatas tä tatäywethä» wok «tsonʼatas tä wetahen» (Ezequiel 34:12; Mateo 15:24; 1 Pedro 2:25). Tej toj malhyejtso nʼoelh toj ileyej Heowa, lham iwomhitʼa, mat tatayepej che tapile.
¿Ha am kamaj lelat ame toj Heowa hope tsonʼataswo toj awuk? Ifwalasna, ¿atsi mʼak toj iwoye hopkhilak tʼu namehen malhyej tsonʼataswo?
Hiwʼen namhohen nʼolhak toj nʼotʼamajchet. Heowa yok: «Ochunhanhilawethä, ohänhiyela hup tä wʼatshan». Hate yok: «Wet lhamel iwohla tʼelakwʼetesa chik ihi honhattso, wet tufwila häp hup tä is wet wʼatshan wet akäj» (Ezequiel 34:14). Heowa hiwʼen namhohenpej nʼolhak toj wʼenhahiche toj nʼotʼamajchet wet toj tʼuhawetej. ¿Ha ahusekchʼoye lewhay toj Heowa ichulho atʼalhyajay toj isej artículo, discurso wok video? ¿Ha lhen atichunhayaja toj Heowa iti amej lehumnhayaj?
Tʼu namehen wet tachʼot namehen. Heowa ikalelhat: «Otʼuhikwela iyhäj tä wetahen wet onachajiyela lehi häp elh tä nitpila. Wet elh chik takälä ichä, wet oyäythilhila, wet otchʼothiyela häp iyhäj tä laj lakhajyhayaja» (Ezequiel 34:16). Heowa ikhajyen iyhaj toj lakhajyhayaj ihihitʼa wok iyhaj toj wujpe lelhakli. Lham inayhten lelatshay lelay tsonʼatas, ichepej toj lewitʼayhyajay talhe tʼat lepunfwa toj ihi congregación. Wet tachʼote iyhaj toj wetahen hopkhilak yaple lewʼet wet hate iyhaj toj tatayhla pʼiya letichunhayaj toj niʼisa alhoho.
Che nawetahen lham tʼu namkwehen. Heowa yok: «Ofwayhthiyeja honhates tä lhamel ifwtsatpehen». Hate ikalelhat: «Otʼuhikwela iyhäj tä wetahen» (Ezequiel 34:12, 16). Heowa yenhitʼa tichunhayaja toj lelay toj wetahen lekacha ihihitʼa. Che iche elh toj weta lham ihanej tʼat, hop toj tamenej toj tʼukwe wet yen kajyaja toj hiwʼen (Mateo 18:12-14). Lham yome lakawos toj matche toj yok: «Ahäpehen oläy tsonʼatas, häp tsonʼatas tä häpehen oka wichi, wet oaichunhanwethä» (Ezequiel 34:31). Am ahope elh tsonʼastso.
Heowa, yenhitʼa tichunhayaja toj lelay toj wetahen lakacha ihihitʼa. Lham yen kajyaja toj hiwʼen
«Nachaj nʼoyehen olhamel owujyajnaj inʼoyejen»
¿Ha lehanej mʼak toj tamenej toj Heowa tʼan ame che lhaple? Hop toj tʼuhlak akajyaj ihi. Lham yome toj itsayhlaʼpe wujpe nʼokopfwayajay hop lelay (Ezequiel 34:26). Am lehanej tʼat toj Heowa yampej matche lhomtes.
Ahusekchʼoye mʼak toj lelate toj ihi pʼante ahusek toj tʼaytshipej toj letafwelej lham. Malhyej toja, lewhay toj alechufwenej Dios lhey wet toj lehanej mʼak toj lham iwohiyejela wichi. ¿Ha ahusekchʼoye toj matche toj iti amej akhajyhayaj lewhay toj lheyej apunfwas toj ihi reuniones toj wuj? Wet toj letahuyej wichi toj ihuminchek tachʼahuye nʼosilotyajay toj isis toj ihi Biblia, ¿ha akajyaj ihihitʼa toj lhaple hawʼet wet toj lehanej toj wakʼalh achumet?
Am iwoyek lhachajo toj malhyejtso toj lelat ame. Dios kawos iwo tʼalhyajaye pʼante Heowa: «Is chik lenachaj nʼohen ame häpkhilek olhamel otpil ame. Nachaj nʼoyehen olhamel owujyajnaj inʼoyejen» (Lamentaciones 5:21). Heowa ichulho lhamel letʼalhyaj, wet laka wichi yachajo toj lekajyaj ihi pʼante toj tachumhoplhi lham (Nehemías 8:17). Hate am, Heowa tachʼotla ame.
Tej toj malhyejtso iyhaj toj tʼuhlak yaple Heowa, iche mʼayhay toj inuhla lenʼayij. Athana nʼokalelhthila mʼayhay toj tamenej wet mʼak toj is che lewoye hopkhilak letumla.
