IHICHETʼA elh che neyahi lelhakli, wet Dios kawos hate lelhakli ihi. Iche pʼante nʼoelh toj ilesayen nʼolhomtesna: «Wuj otichunhayajay» (Salmo 94:19). Wet Jesús yome pʼante toj lewhay che lepes matchehla toj atha toj nʼotchumhoplhi Heowa, yo pʼantekwe: «Wuj tä lhen alhakliya mʼayhay tä lewatlä» (Lucas 21:34). ¿Ha afwitajayaj ihi toj lewʼenhitʼa chinaj tʼoj, toj lhen alhakliya hawʼet lheley wok toj atʼinhayaj ihi? ¿Atsi mʼak toj iwoye Heowa hopkhilak tachʼot ame?

Nawatla nʼochʼotyaj hopkhilak natayhla mʼayhay toj nen lhalhakliya. Pablo yome toja: «Wuj mʼayhay tä ithahyenpej olhamel onʼäyij [...]; õʼthatche katsi olhamel». Tej toj malhyejtso apóstol Pablo yo pʼantek: «Mat tek onahahi», «mat tek onlhakʼalwethä», «mat tek õʼtäyhat nʼohen». ¿Atsi mʼak toj tachʼotla namehen hopkhilak natumla? Hop «nʼokhajyhayaj tä wuj» toj talhe lhaka Dios toj naj letʼunfwaya, Heowa (2 Corintios 4:7-9).

Tichunla lewhay toj lekatej «nʼokhajyhayaj tä wuj» lewhayis toj pajche. ¿Ha ahusekchʼoye discurso che hope toj tachʼot ame toj lewʼen toj Heowa iti amej lehumnhayaj? ¿Ha lhen atʼekhahyaja mʼak toj Biblia yome lewhay toj lekalelhtho wichi iyhaj nʼoniwhayaj toj yome honhat toj wʼatshan wet isilataj? Hop reuniones wet lewhay toj nawo lhometa ikhajyen namel toj natayhla mʼak toj nen lhalhakliya wet lhatichunhayajay letamsek ihi hopkhilak lhakajyaj ihi toj natchumoplhi Heowa.

Heowa tataye tʼat che nachunkat toj natʼukwe leniyatyaj wet nilhokej lewhay nawoye lhachumtes toj talhe lham (Mateo 6:33; Lucas 13:24). Mat iwoyek atʼinhayaj, nʼowitʼayhyaj toj talhe hawʼet lheley wet akalayʼis tamenej toj nemhit akhajyhayaj ihi wok nʼalej toj achumet inuhla toj alepʼajtej congregación. Iwoyek matche toj afwitajayaj ihi toj iwohiyetʼa che letetshan wujpe mʼayhay wet nemhit akhajyhayaj ihi. Nʼalej toj iwoyek lhen atichunhayaja toj Heowa tʼalh ame wujpe mʼayhay toj is che lewoye. Mat Heowa ihanej mʼak toj lhen atichunhayaja, wet tʼalhitʼa ame mʼak toj lekalhihitʼa toj lewoye.

Heowa ihanej toj nayʼelej lhatichunhayajay wet lhatʼisanis yʼenhen. Lham ihanej toj lhimpajpej yachajo toj naisen (Salmo 103:13, 14).

Tichunla ejemplona, mʼak toj Heowa iwoye pʼante toj tʼuye Elias. Iche lewhay toj profetana ihoye lhip toj tsʼanis hop toj lekʼefwhayaj ihi wet lenowahyaj ihi. ¿Atsi mʼak toj iwoye pʼante Heowa? ¿Ha ifwenho toj lham toj letes? Wok ¿neʼtek Elías ikelit toj yaple lechumet toj hiwʼen? Kha, iwohiyetʼa tajtso. Iche dos veces toj Heowa ichene laka ángel hopkhilak tʼamajej toj inʼomhatlhi wet hiwʼenho mʼak toj tuj. Tej toj malhyejtso cuarenta ifwalas toj Elías kamaj lekʼefwhayaj ihi. ¿Atsi mʼak elh toj Heowa iwoye hopkhilak tachʼote? Toj ichun inʼaltej pʼante toj iwoyek tʼuye. Toj paj ichumyenlhi «nʼopak tä matche tä niʼäytajahi wet isajya» toj ikhajyen. Wet hate ikalelhtho toj tsʼilakhitʼa lham toj  iche, iche miles wichi toj ilehiyejtʼa toj nʼokwiyej Dios. Tajtso ikalhi toj Elías yachajo toj lekhajyhayaj ihi toj tujlhache toj iwoye lechumet toj profeta (1 Reyes 19:1-19). ¿Atsi mʼak toj ichufwen namejen tajtso? Lewhay toj Elías matche toj wuj lefwitajayaj, Heowa itelaytej wet hipʼaltsen lham. Mat Heowa iwohitʼa elha lakey. Lham ayen lelhakliya malhyej profetatso.

Lewhay che letichunla mʼak toj letʼuhlak lewʼenho Heowa is che hope mʼak toj lekalhi toj lewoye, yej letechʼaynej mʼak toj lewoye athana, mʼak toj lewoye ifwalas toj pajche. Lewhay toj nʼoelh toj ikoyej carrera, ileyej toj lhaichufwenej toj inu alhoho wujpe ifwalas wok nekchomis, iwohiyetʼa che ikelit toj yachajo mʼak toj iwoye pʼante. Hopkhilak yachajo toj lekhajyhayaj ihi wet tumla, is che lhimpajpej toj lhaichufwen. Malhyej iwoye tajtso, cristianos hatet iwoye wichi toj ikoyej carrera: is che nalhaiwaklhaten hopkhilak nakalhi nʼowʼayhat (1 Corintios 9:24-27). ¿Ha lhen atichunhayaja mʼak toj iwoyek lekalhi athana? Malhyej toj lehoye reuniones. Alhe Heowa hopkhilak tachʼot ame toj lekalhi toj lewoye tajtso. Toj lhimpajpej toj yachajo toj akhajyhayaj ihi, lewʼenla tʼat toj Heowa «matche tä hapʼaltsentsaj» (Salmo 34:8). Yej lepʼetatla, mʼak at che hope toj lewoye hopkhilak lenʼaltej ahumnhayaj, tej toj lhamsaj, lham yen tichunhayaja toj matche toj laha ihi (Lucas 21:1-4).

¿Atsi mʼak toj iwoye Heowa hopkhilak ikhajyen June, lhapunfwa toj nʼoyome toj ihi lhip toj ichun? Lham yok: «Olehiyejtʼa toj owo tʼalhyajaye Heowa wet otʼalhe toj tachʼot noye. Iche ifwala, toj olhas lechʼefwa ifwel nʼoho toj ihichela reunión toj wuj toj ihi lhip toj oihi, wet iche ifwala toj olham ohoye. ¡Matche toj isilataj toj yachajo toj oihi Heowa laka wichi! Reuniontso toj wuj hope mʼak toj owatla toj ikhajyennʼo. Ifwalasna, yachajo toj otchumhoplhi Heowa wet matche toj okajyaj ihi. Nechʼe ohanej toj isitʼak olhaitsʼilhkat wet owatla opunfwas lechʼotyaj. Oyen kajyaja toj okelit toj oyaple Heowa laka wichi, toj kamaj ninama ifwala toj lepes».