NʼOCHUFWENYAJ 21
¿Chi malhyej (Ep hote) toj nʼowo silota nʼosilotyajay toj isis?
Tatay lhimpaj Heowa ichumyenhilhila Leniyatyaj hopkhilak inofwat nilhokej nʼowitʼayhyajay toj iyej wichi. Wet, ¿ha matche toj natʼuhlak nafwenho wichi nʼosilotyajna toj matche toj is? Jesús tʼupʼantehlak lechufwenkay yome nʼosilotna toj imalhewek Honhat (Mateo 28:19, 20). ¿Atsi mʼak toj iwoye wichi toj yen lhometa Heowa hopkhilak tachʼahuye mʼak toj Jesús ifwel?
1. ¿Chi malhyej (Ep hote) toj lhayam matche ifwalasna Mateo 24:14?
Jesús yopʼantekwe: «Nʼosilätyaj tä Isna tä yäme Dios Niyatyaj õʼwohla silätaʼpe imälhewek honhat» (Mateo 24:14). Hop wichi toj yen lhometa Heowa wuj toj ohumin toj owoye nʼochumetna toj laha ihi. Olhamel oyen lhometa nʼosilotyajayna imalhewek Honhat, toj inuʼpe 1.000 nʼolhomtes toj wʼenhahiche. Hopkhilak nʼowoye nʼochumetna toj iʼpe Honhat is che nʼolhaikhajyenej wet nʼotihiche lewʼetes mʼayhay. Isej toj Heowa tachʼot namehen iwoyek nenlhi nʼochumetna.
2. ¿Atsi mʼayhay toj nawoye toj nafwenho nʼosilotyajay toj isis hop wichi?
Olhamel owo lhometa lhip at che wichi ihi. Wet ohoye «lhamel lewʼetes», malhyej toj cristianos toj ihi siglo toj ichun iwoye pʼante (Apóstoles Lhenhay 5:42). Toja hope lenʼayij toj iwoyek nachate millones wichi nekchompej. Mat, toj wichi ichepej toj ihitʼa katsi hate olhamel owo lhometa toj ihi lhipey iyhaj. Olhamel otʼukwepej lewhay hopkhilak ofwenho wichi mʼayhay toj talhe Heowa wet mʼak toj lham yen tichunhaya.
3. ¿Atsi iyhaj toj is che iwo lhometa nʼosilotyajna toj isis?
Nilhokej cristianos toj matchehen is che ifwenho wichi nʼosilotyajayna toj isis. Olhamel owʼen toj wuj toj laha ihi nʼochumetna. Mʼak at che olhamel oihi olhamel olhaikhajyenej toj owo silota nʼosilotyajay toj isis hop toj wichi iwoyek tafwayhen (yahyen 1 Timoteo 4:16). Ihichetʼa elh che lakaha ihi hopkhilak olhamel owoye nʼochumetna, Biblia yome toja toj yok: «Wet tä awayhat tʼat Dios lakhajyhayajna, yej tʼalheje laha wichi häp mʼayhay tä isen tä lewoyeje» (Mateo 10:7, 8). Wet, tej toj nilhokhiyejtʼa wichi ihuminchek tachʼahuye mʼak toj olhamel ofwenho, olhamel otujlhache toj owo lhometa hop toj hope mʼak toj olhamel owoye toj onʼokwiyej Heowa wet olhamel okajyenlhi.
NATʼAYHETTSHI TOJ NALECHUFWENEJ
Yahin chi malhyej (ep hote) toj wichi toj yen lhometa Heowa toj imalhewek toj iʼpe honhatna iwo lhometa wet chi malhyej (ep hote) toj Heowa tachʼote tʼat.
Imalhewek Honhat toj olhamel owo lhometa: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Olhamel olhaikhajyenej toj owo silota nilhokej wichi
Hop wichi toj yen lhometa Heowa wuj toj lhaikhajyenej hopkhilak iwo silota nʼosilotyajna toj isis lhip at che wichi ihi. Yahin VIDEO wet ame mʼayhayna:
-
¿Atsi mʼak toj lhayʼe lhip toj leseltej toj iwoye wichi toj yen lhometa Heowa toj iwo lhometa?
Yahyen Mateo 22:39 wet Romanos 10:13-15 wet ame mʼayhayna:
-
¿Chi malhyej (Ep hote) toj olhamel onʼalit toj ohumnhen wichi lewhay toj owo lhometa?
-
¿Chi malhyej (Ep hote) toj Heowa hiwʼen iyhaj toj iwo lhometa nʼosilotyajay toj isis? (Tetshan versículo 15).
5. Olhamel ohopehen Dios lechʼotfwas
Wujpe mʼayhay toj inʼalit toj Heowa tachʼote tʼat lakawos toj iwo lhometa. Natetshan mʼak toj ihi pʼante Nueva Zelanda. Iche pʼante honaj, toj wichi toj yen lhometa Heowa elh, toj lhey Paul iwo lhometa, ihoyehen wichi lewʼetes wet nilhoke atsinha. Ifwalatso toj nechʼe fwala, atsinha iwo pʼante tʼalhyajaye Dios wet ichumyenlhi lhey, Heowa, wet tʼalhe tʼat hopkhilak iche elh laka wichi toj tachʼote lham hopkhilak itafwelej Heowa. Paul yome toja: «Tafwaytshi tres horas olham ohoye tʼat lewʼet».
Yahyen 1 Corintios 3:9 wet ame mʼayhayna:
-
¿Chi malhyej (Ep hote) toj mʼak toj iyej pʼante atsinha toj ihi Nueva Zelanda inʼalit toj Heowa tachʼote laka wichi toj ikalhi toj iwo lhometa?
Yahyen Apóstoles Lhenhay 1:8 wet ame mʼayhayna:
-
¿Atsi mʼak toj tamenej toj nawatla Heowa lechʼotyaj hopkhilak nawoye tʼat lhachumet?
Tetshan lhipna
Toj ihi reunión toj ihi semana nʼowaklhathen olhamel hopkhilak is toj owo lhometa. Che am lehoye pʼante elh reunionesna, ¿chi malhyej (ep hote) atichunhayaj toj letiyej mʼak toj nʼochufwen nʼoyejen?
6. Toj owo lhometa owoye tʼat mʼak toj Dios tʼalh nʼoyehen
Toj ihi siglo toj ichun, iyhaj toj ihanlhi pʼante Jesús letayhfwas tʼuhlak inuhla toj iwo lhometa. Cristianostso lhaiwompe Dios silotyaj toj is hopkhilak niyatey tachumla tʼat toj lhamel iwo lhometa (Filipenses 1:7). Ifwalasna, wichi toj yen lhometa Heowa iwoye tʼat tajtso. a
Yahyen Apóstoles Lhenhay 5:27-42 wet ame mʼayhayna:
-
¿Atsi mʼak toj tamenej toj olhamel ihichetʼala lewhay che oleyej toj owo lhometa? (Tetshan versículos 29, 38 wet 39).
MʼAK TOJ IYHAJ YʼATSHANE: «¿Atsi mʼak toj tamenej toj wichi toj yen lhometa Heowa ihoyehen wichi lewʼetes toj iwo lhometa?».
-
¿Atsi mʼak toj lechulhihola?
MʼAYHAY TOJ LETETSHANNE
Jesús tʼupʼantehlak lechufwenkay iwo silota nʼosilotyajay toj isis imalhewek honhatna. Heowa tachʼote tʼat laka wichi hopkhilak ikalhi toj iwoye nʼochumetna.
Mʼayhay toj nalechufwenejne
-
¿Atsi mʼak toj nʼowoye hopkhilak nʼowo silota nʼosilotyajay toj isis toj iʼpe honhatna?
-
¿Chi malhyej (Ep hote) toj olhamel owo lhometa inʼalit toj ohumin wichi?
-
¿Ha lefwetaj toj olhamel toj owo lhometa hope nʼochumet toj hiwʼen nʼohohen olhamel okajyaj? ¿Atsi mʼak toj tamenej?
IWOYEK LEWʼEN IYHAJ MʼAYHAY:
Yahin chi malhyej (ep hote) toj wichi toj yen lhometa Heowa toj iwo lhometa toj ihi lhipey iyhaj toj wus.
Nʼowo lhometa toj ihi lhip toj lhayʼe lhip toj wichi iche toj ihi París (5:11)
¿Chi malhyej (Ep hote) toj wichi toj yen lhometa Heowa tachʼote iyhaj toj yikchʼoye lhip toj talhe?
Nʼofwenho nʼosilotyaj toj isis iyhaj toj yikchʼoye lhip toj talhe (5:59)
Chʼahuye mʼak toj nʼofwel toj iwoyek hiwʼenho lekajyaj nʼoelh toj iwopej lhometa.
Tafwelej chi malhyej (ep hote) toj wichi toj yen lhometa Heowa ikalhi hop niyatey toj tʼuhlak inuhla toj iwo lhometa.
a Dios tʼat toj ichen olhamel hopkhilak owo lhometa. Toj malhyejtso wichi toj yen lhometa Heowa tatahiyetʼa che niyatey toj ihi honhatna inuhitʼahla toj olhamel owo lhometa.
Hate nʼalej toj iwoyek lehumin
M’AYHAY TOJ WICHI TAY’ATSHAN LHAMEHEN
¿Chi malhyej (Ep hote) toj ichufwen Biblia hop wichi toj yen lhometa Heowa?
Iwoyek alechufwenej Biblia lelhayʼe elh wichi toj yen lhometa Heowa wet lechumyenlhi aka Biblia. Wet hate iwoyek lelhayʼe hawʼet lheley wok akalayʼis toj lehuminche.
