Jesús ichufwenej pʼante wichi toj, che tʼuhlak hope cristiano, toj ichun is che lhaiwo bautisaya (yahyen Mateo 28:19, 20). Mat, ¿atsi toj hope bautismo? Wet, ¿atsi mʼak toj is che nʼoelh iwoye hopkhilak ikalhi toj iwoye tajtso?

1. ¿Atsi toj hope bautismo?

Nʼolhomet bautizar talho tʼat griego lhomtes toj hope toj nʼoyʼuytho nʼoelh inat imalhewek tʼisan. Toj Jesús lhaiwo pʼante bautisaya, nʼoyʼuytho pʼante tewok toj ihi Jordán, wet toj paj «inuphä tä tälho inät» (Marcos 1:9, 10). Lewhay toj cristianos toj matchehen lhaiwo bautisaya, hate imalhewek tʼisan toj nʼoyʼuytho inat.

2. ¿Atsi mʼak toj inʼalit nʼoelh lewhay toj lhaiwo bautisaya?

Toj nʼoelh lhaiwo bautisaya, inʼalit toj pajche lhayachaje Heowa. Wet, ¿atsi mʼak toj is che iwoye hopkhilak lhayachaje Heowa? Nʼoelh is che iwo tʼalhyajaye Dios wet ifwenho toj ihuminchek lepes ihihitʼa toj tachumhoplhi Lham. Wet tajtso iwoye tʼat toj kamaj lhaiwohitʼa bautisaya. Toj ihi nʼotʼalhyajtso, nʼoelh toj lhayachaje Heowa ifwenho toj tajlhamet Heowa toj nʼokwihiyeja wet mʼak toj lhayʼe lhip toj laha ihi toj ihihla hope toj iwoye mʼak toj Dios ihuminchek nʼowoye. Hate, ihanlhi mʼak toj Jesús ichufwenej pʼante wichi wet mʼak toj lham iwoye pʼante, lewhay toj yok: «Elh chik häpe chik tʼuhläk yen hänekanʼo, is chik lhaifwonlä lham lenechʼethayaj [...] wet nek nʼokwe» (Mateo 16:24). Isej toj nʼoelh lhayachaje Heowa wet bautismo, nʼoelh iwoyek ise tʼat hop Heowa wet iyhaj toj nʼokwiyek hop Lham.

3. ¿Atsi mʼak toj nʼoelh is che iwoye hopkhilak lhaiwo bautisaya?

Che am lehuminchek alewo bautisaya, toj ichun is che lehanej mʼak toj talhe Heowa wet lechiyhelit atʼekhahyaj toj letiyej hop Lham (yahyen Hebreos 11:6). Che tʼaytshi mʼak toj lehanej wet atʼekhahyaj, lhayʼehila lhip toj lehumin Heowa. Wet tajtso inityenla amej toj am lehuminchek lewo ameta wet lehanlhi tʼat Biblia lechufwenyajay (2 Timoteo 4:2; 1 Juan 5:3). Che nʼoelh iwoyepej mʼak toj tʼuhawetej hopehen tʼat Heowa leles, toj malhyejtso tatshupiye toj yachaje lewʼatshancheyaj Dios wet lhaiwo bautisaya (Colosenses 1:9, 10). a

 NATʼAYHETTSHI TOJ NALECHUFWENEJ

4. Mʼak toj ichufwen namejen Jesús laka bautismo

Hopkhilak nahanej iyhaj mʼayhay toj talhe Jesús laka bautismo, yahyen Mateo 3:13-17. Che paj ame mʼayhayna:

• Lewhay pʼante toj Jesús lhaiwo bautisaya, ¿ha hope pʼante hanʼafwaj?

• ¿Ha tajlhamet nʼotsaype inat lhip hop lhetek? Toj malhyejtso, ¿chi malhyej (ep hote) pʼante toj lhaiwo bautisaya?

Lewhay toj Jesús lhaiwo pʼante bautisaya, iwo tesa lechumet toj Dios hinʼayej pʼante. Yahyen Lucas 3:21-23 wet Juan 6:38 wet ame mʼayhayna:

• Toj tafwaytshi laka bautismo, ¿atsi lechumet toj tatshupiye toj yen hopeya toj lhayʼe lhip toj laha ihi?

5. Bautismo hope mʼak toj iwoyek lekalhi toj lewoye

Toj nʼoelh tʼuhlak lhayachaje Heowa wet lhaiwo bautisaya toj ichun iwoyek nowaye. Mat, che am letujlhache tʼat toj alechufwenej wet lhayʼe lhip toj letafwelej Heowa, lhayʼehila lhip toj kalelhat amho toj letshupiye toj lewohiyela mʼak toj matche toj laha ihi. Hopkhilak letafwelej mʼak toj wichi iyhaj ikalhi, yahin VIDEO.

Yahyen Juan 17:3 wet Santiago 1:5 wet ame mʼayhayna:

• ¿Atsi mʼak toj iwoye tachʼote nʼoelh hopkhilak wakʼalh toj nichate laka bautismo?

1. Nalhayachaje tʼat Heowa lewhay toj nawo tʼalhyajaye wet nafwenho toj lepes ihihitʼala toj nachumhoplhi Lham.

2. Lewhay toj nalhaiwo bautisaya, nanʼalit toj pajche nalhayachaje Dios.

 6. Lewhay toj nʼoelh lhaiwo bautisaya lhaipʼajtej tʼat Heowa lewʼet lheley iyhaj

Toj nalhaiwo bautisaya, napʼakej tʼat nʼowʼet lheley toj lhaipʼajtitwek toj iʼpe honhatna. Mʼak talhiyetʼa lhip che natalhe wok mʼak toj nehi pʼante, nilhokej namel wʼawulhcha mʼak toj natʼekhaye wet nawoye tʼat Biblia lechufwenyajay. Yahyen Salmo 25:14 wet 1 Pedro 2:17 wet ame mʼayhayna:

• Malhyej toj ihi versiculosna, ¿chi malhyej (ep hote) toj naisej che nalewo bautisaya?

 MʼAYHAY TOJ LETETSHANNE

Jesús yome pʼante che nʼoelh tʼuhlak lhayen hopeya cristiano is che ikhajyen letʼekhahyaj toj itiyej Heowa, ihanlhi Biblia lechufwenyajay, lhayachaye Lham wet lhaiwo bautisaya.

Mʼayhay toj nalechufwenejne

• ¿Atsi toj hope bautismo, wet atsi mʼak toj tamenej toj laha ihi?

• ¿Atsi mʼak toj tamenej toj laha ihi che nʼoelh lhayachaje Heowa wet lhaiwo bautisaya?

• ¿Atsi mʼak toj ichun toj is che iwoye nʼoelh hopkhilak lhayachaje Heowa wet toj lhaiwo bautisaya?