NʼOCHUFWENYAJ 28
Nʼalit toj lehumin mʼak toj Heowa wet Jesús iwoyej ame
¿Chi malhyej (Ep hote) toj lelat ame lewhay che iche akalayʼi toj hiwʼen amho awʼayhat? Nʼalej toj wuj toj akajyaj ihi wet lehuminchek lenʼaltej aka gracias akalayʼi hop toj matche toj laha ihi lewʼayhat. Heowa wet Jesús hiwʼen namohen pʼante lhawʼayhat toj wichi iwoyek isej, toj Jesús lhayen lahayaʼpe namel. Natetshan chi malhyej (ep hote) toj iwoyek nanʼalit lhaka gracias.
1. ¿Chi malhyej (Ep hote) toj nanʼalit toj laha ihi mʼak toj Dios wet Cristo iwoyej namehen?
Biblia ikalelhat toj «elh at chik häpe chik tʼekhaye» hop Jesús, iwohiyelak lepes ihihitʼa toj ilayhi (Juan 3:16). ¿Chi malhyej (Ep hote) toj nanʼalit toj natʼekhaye Jesús? Tsʼilakhitʼa toj is che natʼekhaye lham hate mʼak che natshupiye wok mʼak toj nawoye nanʼalit tajtso (Santiago 2:17). Che mʼak toj nawoye wok lhalhomtes inʼalit toj lhatʼekhahyaj ihi ikhajyenla toj naise Jesús wet Lajcha, Heowa (yahyen Juan 14:21).
2. ¿Atsi lewhay toj iwoyek nanʼaltej lhaka gracias Heowa wet Jesús?
Honhatsi toj lepes toj ilayhi, Jesús ifwenho lechufwenkay lenʼayij elh toj lhamel iwoyek inʼaltej laka gracias mʼak toj lham iwohiyela. Ifwenho pʼante toja toj Biblia itafwelej toj hope «Santa cena» wok Lewhay toj nʼotichunchʼoye Jesús tʼilek (1 Corintios 11:20). Jesús iwoye pʼante tajtso toj lhayʼe lechufwenkay, toj talhe lewhaytso nilhokej cristianos toj matchehen itichunchʼoye mʼak toj lham iwoyeje wichi. Jesús yome toja toj yok: «Woyayepej täja wet tichunaypej ochʼoye» (Lucas 22:19). Toj lehoye reunión toj nʼotichunchʼoye Jesús tʼilek am lenʼalit toj matche toj laha ihi nʼohumnhayaj toj wuj toj Heowa wet Jesús inʼalit namejen.
NATʼAYHETTSHI TOJ NALECHUFWENEJ
Natetshan chi malhyej (ep hote) toj iwoyek nawʼenho gracias toj Heowa wet Jesús iti namejen lehumnhayaj. Natetshan mʼak toj tamenej toj laha ihi toj natichunchʼoye Jesús tʼilek.
3. Toj nanʼalit lhaka gracias inityen namejen toj nawoye mʼak
Tichunejlhi toj lachʼa wet iche elh toj tachʼot ame. ¿Ha ilafwel toj lepʼethatla mʼak nʼoelhtso iwoyej ame wok letʼukwela lenʼayij hopkhilak lenʼaltej aka gracias?
Namel iwoyek lepes ihihitʼa toj nalayhiche isej tʼat Heowa lehumnhayaj. Yahyen 1 Juan 4:8-10 wet ame mʼayhayna:
-
Toj Jesús lhayen lahayape namel, ¿atsi mʼak toj tamenej toj isilataj nʼowʼayhatso?
-
¿Chi malhyej (Ep hote) toj lelat ame toj lhen atichunayaja mʼak toj Heowa wet Lhos iwoyej ame?
¿Chi malhyej (Ep hote) toj iwoyek nanʼalit toj matche toj laha ihi mʼak toj Heowa wet Jesús iwoyej namehen? Yahyen 2 Corintios 5:15 wet 1 Juan 4:11; 5:3. Toj tafwaytshi toj leyahyen versículos, ame mʼayhayna:
-
¿Chi malhyej (Ep hote) toj iwoyek nanʼalit lhaka gracias?
4. Naten hop Jesús
Mʼak elh toj iwoyek nawoye toj nanʼalit lhaka gracias, hope toj naten Jesús. Yahyen 1 Pedro 2:21 wet ame mʼayhayna:
-
¿Atsi mʼayhay toj iwoyek lewoye hopkhilak leten tʼat Jesús?
Jesús ihumin pʼante Dios Lhomtes, iwo silota wichi Dios Leniyatyaj wet tachʼote wichi iyhaj.
5. Natichunchʼoye Jesús tʼilek
Hopkhilak nahanej mʼak toj iche pʼante toj Jesús yenlhi Laka Cena, yahyen Lucas 22:14, 19, 20. Wet ame mʼayhayna:
-
¿Atsi mʼak toj iche toj ihi Cenatso?
-
¿Atsi mʼak toj hope pan wet hatʼes wok vino? (Tetshan versículos 19 wet 20).
Jesús tʼupʼantehlak lechufwenkay yenlhi tʼat hop Cenana nekchompej, ifwala toj lham yʼil pʼante. Hop toj tamenej, wichi toj yen lhometa Heowa lhaihutwekhen nilhokej nekchomis hopkhilak itichunchʼoye Jesús tʼilek, toj ihanlhi tʼat mʼak toj lham iwoye. Hopkhilak lehanej chi malhyej (ep hote) reunionna toj matche toj laha ihi, yahin VIDEO. Toj paj ame mʼayhayna:
-
¿Atsi mʼak toj nawoye ifwalatso toj natichunchʼoye Jesús tʼilek?
Pan wet vino hope tʼat nʼotechʼaynhay. Pan hope Jesús tʼisan toj newache mʼak toj niʼisa toj ihi toj lhaiwompe nilhokej wichi. Wet hatʼes hope tʼat lewʼoyis.
IYHAJ WICHI YOME TOJA: «Che tajlhamet letʼekhaye Jesús iwohiyelak letafway».
-
¿Chi malhyej (Ep hote) toj iwoyek lechumyenlhi Juan 3:16 wet Santiago 2:17 hopkhilak lekalelhat toj is che nʼowoye mʼayhay iyhaj?
MʼAYHAY TOJ LETETSHANNE
Nanʼaltej Jesús lhaka gracias mʼak toj lham iwoyej pʼante namehen toj natʼekhaye lham wet toj nahoye tʼat lewhay toj nʼotichunchʼoye letʼilek.
Mʼayhay toj nalechufwenejne
-
¿Chi malhyej (Ep hote) toj iwoyek nanʼalit toj natʼekhaye Jesús?
-
¿ Chi malhyej (Ep hote) toj lenʼaltej Heowa wet Jesús toj matche toj laha ihi mʼak toj lhamel iwoyej ame?
-
¿Atsi mʼak toj tamenej toj matche toj laha ihi che lehoye lewhay toj nʼotichunchʼoye Jesús tʼilek?
IWOYEK LEWʼEN IYHAJ MʼAYHAY:
Chʼahuye mʼak toj ikalhi Jesús tʼilek toj inityen namejen toj nawoye mʼak.
Tʼayhettshi toj letafwelej nʼotʼekhajyaj wet chi malhyej (ep hote) toj iwoyek nʼonʼalit.
«Natʼekhaye mʼak toj Heowa ifwel» (La Atalaya, octubre toj 2016)
Toj itafwelche mʼak toj hope Jesús tʼilek iwo elha mʼak toj atsinha ihi pʼante. Yahyen laka historia «Olay wet otamsek ihi hate oise Dios».
«Dios Lhomtes iwo elha mʼak toj ihi» (La Atalaya, 1 toj agosto toj 2011)
Yahyen mʼak toj tamenej toj wujitʼaʼpe wichi toj tuj pan wet iyayej hatʼes lewhay toj nʼotichunchʼoye Jesús tʼilek.
Hate nʼalej toj iwoyek lehumin
M’AYHAY TOJ WICHI TAY’ATSHAN LHAMEHEN
¿Chi malhyej (Ep hote) toj ichufwen Biblia hop wichi toj yen lhometa Heowa?
Iwoyek alechufwenej Biblia lelhayʼe elh wichi toj yen lhometa Heowa wet lechumyenlhi aka Biblia. Wet hate iwoyek lelhayʼe hawʼet lheley wok akalayʼis toj lehuminche.
