NʼOCHUFWENYAJ 46
¿Atsi mʼak toj tamenej toj nʼoelh is che lhayachaje Dios wet lhaiwo bautisaya?
Lewhay toj nʼoelh lhayachaje Heowa, iwo tʼalhyaja wet yome toj tajlhamet Lham toj nʼokwihiyeja wet mʼak at che ihi iwohiyela mʼak toj Dios tʼalhe (Salmo 40:8). Toj paj, lewhay toj tafwaytshi toj lhaiwo bautisaya, inʼaltej iyhaj toj pajche lhayachaje Dios. Lewhay toj nalhayachaje Heowa hope mʼak toj lhayʼe lhip toj laha ihi toj iwoyek natshupiye wet iwohla elha mʼak toj nehi. ¿Atsi mʼak toj iwoyek tachʼot ame toj letshupiye tajtso?
1. ¿Atsi mʼak toj tamenej toj nalhayachaje Heowa?
Nʼohumnhayaj hope mʼak toj tamenej toj nalhayachaje Heowa (1 Juan 4:10, 19). Biblia ifwel namhohen toja: «Humin Awuk Dios, mälhewek ahusek, lhäyʼe mälhewek atichunhayaj, lhäyʼe mälhewek akhajyhayaj» (Marcos 12:30). Toj namwetha wet mʼak toj nawoye inʼalit lhahumnhayaj toj natiyej Heowa. Che matche toj nahumin Heowa natshupiye toj nachaje lhawʼatshancheyaj wet nalhaiwo bautisaya, malhyej iwoye hinʼu wet atsinha toj lhaihumnhen toj tʼuhlak tawhayey.
2. ¿Atsi nʼokopfwayajay toj Heowa hiwʼenho lakawos toj bautisados?
Che am alewo bautisaya lelhahiyʼeja Heowa lewʼet lheley, wichi toj wuj toj lekajyaj ihi. Toj malhyejtso wʼenhahiche mʼayhay toj lelatla Dios lehumnhayaj wet lhayʼe lhipla toj lewhaye lham (yahyen Malaquías 3:16-18). Hate toj Heowa hope Ajcha, lhen akajyaja wujpe ipunfwas toj ihi honhatna toj ihumin Dios wet hate am (yahyen Marcos 10:29, 30). Matche, toj kamaj alewohitʼa bautisaya, am is che lewoye mʼayhay iyhaj. Is che letafwelej Heowa, lehumin wet lenʼalit toj letʼekhaye Lhos. Toj lepes, is che lekalelhtho Heowa toj lhayachajiyela hawʼatshancheyaj. Che lewoye mʼayhayna wet che paj alewo bautisaya, iwohiyelak lhen akajyaja hawʼatshancheyaj toj lepes ihihitʼa. Dios Lhomet yok: «Bautismo, häp mʼak tä aisej tä letafwayhen athana» (1 Pedro 3:21).
NATʼAYHETTSHI TOJ NALECHUFWENEJ
Natetshan atsi mʼak toj tamenej toj laha ihi toj alhachaje Heowa wet alewo bautisaya.
3. Nilhokej namel is che natshupiye atsi elh toj natchumhoplhihla
Toj ihi pʼante Israel toj pajche, iche wichi toj yen tichunhayaja toj iwoyek nʼokwiyej Heowa wet Baʼal. Mat isitʼa tajtso. Hop toj tamenej toj Heowa ichene laka profeta Elías hopkhilak yam is alhoho lenʼayij. Yahyen 1 Reyes 18:21 wet ame mʼayhayna:
-
¿Atsi mʼak toj Israel lhayis is pʼante che tatshupiye?
Namel hate is che natshupiye atsi elh toj natchumhoplhihla, malhyej iwoye Israel lhayis toj pajche. Yahyen Lucas 16:13 wet ame mʼayhayna:
-
Iche wichi toj yen tichunhayaja toj iwoyek nʼokwiyej Heowa, wichi iyhaj wet mʼayhay, ¿atsi mʼak toj tamenej toj isitʼa tajtso?
-
¿Atsi mʼak toj iwoyek nawoye hopkhilak Heowa hiwʼen toj pajche natshupiye toj natchumhoplhi lham?
4. En atichunhayaja Heowa lehumnhayaj toj iti amej
Heowa hiwʼen namhohen wujpe lhawʼayhat toj isis wet, ¿atsi mʼak toj iwoyek namel nawʼenho? Yahin VIDEO.
¿Atsi mʼayhay toj Heowa iwoye hopkhilak inʼalit amej lehumnhayaj? Yahyen Salmo 104:14, 15 wet 1 Juan 4:9, 10 wet ame mʼayhayna:
-
Nilhokej nʼowʼayhtes toj Heowa hiwʼen namhohen, ¿atsi elh toj lehumin?
-
Toj lhen atichunhayaja nʼowʼayhtesna, ¿chi malhyej (ep hote) atichunhayaj toj letiyej lham?
Lewhay che iche nʼoelh toj hiwʼen namhohen nʼowʼayhat, nahuminchek nanʼalit toj nahumin mʼak toj nʼowʼen namhohen. Yahyen Deuteronomio 16:17 wet ame mʼayhayna:
-
Lewhay toj lhen atichunhayaja nilhokej mʼayhay toj Heowa hiwʼen amho, ¿ha lehuminchek lhachajla mʼak hop lham? ¿Atsi mʼak toj lehuminchek lewʼenho?
5. Iwoyek ichaje wujpe nʼokopfwayajay nʼoelh toj lhayachaje Dios
Wujpe wichi yen tichunhayaja toj, che famoso, hiwʼen lechumet toj is wok che hiwʼen chinaj tʼoj lekajyaj ihihla. ¿Ha matche tajtso? Yahin VIDEO wet ame mʼayhayna:
-
Tej toj hinʼuna toj ihi video wuj pʼante toj ihumin toj ikoyej fútbol, ¿atsi mʼak toj tamenej toj ileyej?
-
Lham tatshupiye pʼante toj yachaje lewʼatshancheyaj Heowa wet ileyej fútbol, ¿ha lefwetaj toj tatshupiye mʼak toj is alhoho? ¿Atsi mʼak toj tamenej?
Toj kamaj hopkhitʼa cristiano, apóstol Pablo iwoye pʼante che hope nʼoelh toj lenʼohyaj ihi hop toj elh toj ichufwen pʼante wuj toj itafwelej ley judía. Mat ileyej hopkhilak lhayen hopeya cristiano, ¿ha yʼulhanche mʼak toj iwoye? Yahyen Filipenses 3:8 wet ame mʼayhayna:
-
¿Atsi mʼak toj tamenej toj Pablo yome pʼante toj nilhokej mʼayhay toj iwoye toj kamaj hopkhitʼa cristiano malhyej iwoye «hup mok»?
-
¿Atsi mʼak toj ikalhi toj ileyej mʼayhaytso?
-
¿Ha lefwetaj toj isila mʼak toj lhehi che letshupiye toj lechumhoplhi Heowa? ¿Atsi mʼak toj tamenej toj malhyejtso atichunhayaj?
Lewhay toj Pablo lhayen hopeya cristiano, ikalhi wujpe mʼayhay toj lham iwohiyetʼak ikalhi toj pajche.
IYHAJ WICHI YOME TOJA: «Laha ihihitʼa toj nʼoelh lhayachaje Dios».
-
¿Ha lefwetaj toj lhachaje Heowa hawʼatshancheyaj laha ihi? ¿Atsi mʼak toj tamenej?
MʼAYHAY TOJ LETETSHANNE
Nʼohumnhayaj toj nalatla toj natiyej Heowa tachʼotla namehen toj nalhayachaje Lham wet nalhaiwo bautisaya.
Mʼayhay toj nalechufwenejne
-
¿Atsi mʼak toj tamenej toj tʼuhawetej toj namalhetwek lhahusek toj nahumin Heowa wet nanʼokwiyej?
-
¿Atsi nʼowʼayhat toj Heowa hiwʼenho lakawos toj bautisados?
-
¿Ha lehuminchek alhayachaje Heowa?
IWOYEK LEWʼEN IYHAJ MʼAYHAY:
Yahin atsi mʼak toj tamenej toj elh toj ihumin toj ichoylhi wet deportista tatshupiye pʼante toj lhayachaje Heowa.
Tetshan mʼayhay iyhaj toj tamenej toj iwoyek alhayachaje Heowa.
«¿Atsi mʼak toj tamenej toj nʼoelh is che lhayachaje Heowa?» (La Atalaya, 15 toj enero toj 2010)
Yahin toj ihi video lekajyaj toj hiwʼen iyhaj toj lhayachaje Heowa.
Yahyen mʼak toj ihi pʼante atsinha toj yachajo toj itetshan mʼak toj laha ihi, toj ihi lhip toj lhey «Wujpe nekchomis toj oyʼatshanpej lhame atsi mʼak toj tamenej toj nechehen».
«Dios Lhomet iwo elha mʼak toj ihi» (La Atalaya, 1 toj noviembre toj 2012)
Hate nʼalej toj iwoyek lehumin
M’AYHAY TOJ WICHI TAY’ATSHAN LHAMEHEN
¿Chi malhyej (Ep hote) toj ichufwen Biblia hop wichi toj yen lhometa Heowa?
Iwoyek alechufwenej Biblia lelhayʼe elh wichi toj yen lhometa Heowa wet lechumyenlhi aka Biblia. Wet hate iwoyek lelhayʼe hawʼet lheley wok akalayʼis toj lehuminche.
