Heowa yen lhawʼayhata naʼtshas. Lham tataye che nʼojcha wet nʼoko tʼuye nʼowʼayhatso wet Lham hiwʼenho nʼofwonyajay toj isis hopkhilak lhamel ikalhi toj iwoye tajtso. Hate ifwone naʼtshas hopkhilak lewʼet lheley lekajyaj ihiche.

1. ¿Atsi nʼofwonyajay toj Heowa hiwʼenho nʼojcha wet nʼoko?

Heowa tataye che nʼoko wet nʼojcha ihumnhen leles wet lhaimalhtejwek lewhay toj hiwʼen hopkhilak lhayʼe lhamel. Hate ihuminchek tʼamajejla mʼak at che hope toj niʼisa wet itafwnhatej lhamel mʼayhay toj matchehen toj ihi Biblia (Proverbios 1:8). Heowa ifwenho toja nʼojchalis: «Chufwenejen [ales] Lhawuk lenʼäyij» (yahyen Efesios 6:4). Heowa matche toj ihumin toj hiwʼen toj nʼojchalis ichufwenhen leles toj ihanlhi lefwonyajay wet tatahiyetʼa che iche elh toj iwoye tajtso.

2. ¿Atsi nʼofwonyajay toj Heowa hiwʼenho naʼtshas?

Heowa ifwenho naʼtshas toja: «Woyayepej mʼak tä ajchalis lhäyʼe akolis neʼtepej che lewoyaye» (yahyen Colosenses 3:20). Che iche hanʼafwaj toj yenhitʼa wʼet mʼayeka wet tachʼahuye lajcha wet lako, lhamel lekajyaj ihihla wet Heowa hate (Proverbios 23:22-25). Jesús hope pʼante hanʼafwaj toj iwoyek nʼoten; tej toj lechʼisukyajay ihihitʼa tachʼahuye wet yenhitʼa wʼet mʼayeka lajcha wet lako tej toj hopehen pʼante iyhaj toj lechʼisukyaj ihi (Lucas 2:51, 52).

3. ¿Atsi mʼak toj wichi toj lewʼet lheley ihi iwoyek iwoye hopkhilak ilat lhamehen toj iwhaye tʼat Heowa?

Che am ales ihi, nʼalej toj lehuminchek lhamel ihumin Heowa malhyej am. ¿Chi malhyej (Ep hote) toj iwoyek lekalhi? Toj lehanlhi tʼat nʼofwonyajna toj ihi Biblia: «Tujlhache tä lechufwenejen ales [Heowa lhomtes]. En ämeta chik lhehi hawʼet, wok lenukwe nʼäyij» (Deuteronomio 6:7). Nʼalej toj lehanej toj is che lhachajopej toj lefwenho mʼayhayna ales. Mʼak toj texto yome hope toj am is che letʼukwe lewhayis hopkhilak lefwenho ales mʼak talhe Heowa. Hate wuj toj is, che nilhokej hawʼet lheley tʼukwe lewhay semanapej hopkhilak amel lenʼokwiyej Heowa toj alechufwenej Biblia. Wet, tej toj ales ihihitʼa, toj alechufwenejpej Biblia semanapej wuj toj tachʼotla ame.

 NATʼAYHETTSHI TOJ NALECHUFWENEJ

 6. Yej lhen wʼet mʼayeka ajcha wet ako

 MʼAYHAY TOJ LETETSHANNE

Heowa tataye che nʼojcha wet nʼoko ihumnhen leles, ichufwenhen wet tʼuye lhamel, hate tataye che naʼtshas yenhitʼa wʼet mʼayeka wet tachʼahuye lajcha wet lako, wet nilhokej lhamel nʼokwiyej Lham.

Mʼayhay toj nalechufwenejne

• ¿Chi malhyej (Ep hote) toj nʼoko wet nʼojcha ichufwen wet tʼuye leles?

• ¿Chi malhyej (Ep hote) toj naʼtshas inʼalit toj yenhitʼa wʼet mʼayeka lako wet lajcha?

• ¿Atsi mʼayhay toj iwoyek isej che itiyej kanhi lhip lewhay toj lhamel hiwʼen toj nʼokwiyej Heowa?