Jesús hope «Dios leles lhetek» (Efesios 5:23). Ifwalasna, ichumyenlhi «nʼokawo tä afwtintsaj wet lehusek ihi» hopkhilak inuhyenkwe lenʼayij lakawos toj ihi Honhat (yahyen Mateo 24:45). Hop «nʼokawotso», Jesús tʼat toj tatshupiye hopkhilak lhaitumtej iyhaj. Tej toj malhyejtso, kamaj hope tʼat Jesús lakawos wet tachumhoplhi Cristo lepunfwas. ¿Atsi elh toj hope nʼokawotso? ¿Chi malhyej (Ep hote) toj tʼu namehen?

1. ¿Atsi elh toj hope «nʼokawo tä afwtintsaj wet lehusek ihi»?

Talhe toj pajche toj Heowa ichumyenlhi hinʼu wok hinʼul iyhaj hopkhilak inuhyenkwe laka wichi lenʼayij (Malaquías 2:7; Hebreos 1:1). Malhyej toja, toj tafwaytshi toj Jesús yʼil pʼante, hopehen apóstoles wet ancianos toj ihi Jerusalén toj lhaitumtej toj inuhyenkwe congregación lenʼayij (Apóstoles Lhenhay 15:2). Malhyej toj pajche, ifwalasna iche iyhaj ancianos toj lhaitumtej tajtso. Hinʼulna hope, Hinʼul toj lhaitumtej nilhokej congregaciones, toj hiwʼenho lepunfwas nʼolhak toj nʼotʼamajchet wet lhaitumtej toj nʼowo lhometa. Hinʼultso hopehen «nʼokawo tä afwtintsaj wet lehusek ihi» toj «häpe tʼat elh tä lewuk [Jesús] yen lewoyayej» mʼayhaytso (Mateo 24:45a). Hinʼul toj lhaitumtej nilhokej congregaciones hopehen cristianos toj Dios tatshupiye toj itsaype laka espíritu wet lhamel tataye che niyatey toj lhayʼehila Jesús toj ihi leniyatyaj lewhay che lhamel yikchʼoye Honhat.

2. ¿Atsi nʼolhak toj nʼotʼamajchet toj yenlhi nʼokawo toj afwtintsaj wet lehusek ihi?

Jesús yome pʼante toj nʼokawo toj afwtintsaj lechumet hope toj «hiwʼenhomchepej lhäk [cristianos iyhaj] tä nichäte lewhäy» (Mateo 24:45b). Malhyej nʼolhak toj ikhajyen namel wet naisen tʼat, nʼolhak toj nʼotʼamajchet hope mʼayhay toj talho Dios Lhomet toj inuhyen namkwehen lhanʼayij, hiwʼen namhohen lhakhajyhayaj hopkhilak natʼifwtiyej Heowa wet nam wakʼalh lhachumet toj Jesús hiwʼen namhohen (1 Timoteo 4:6). Nʼolhakna toj nʼotʼamajchet ichat namehen toj talhe reuniones, reuniones toj wus, publicaciones wet videos toj talho Biblia. Nilhokej mʼayhayna tachʼot namehen toj nahanej mʼak toj Heowa tataye wet toj lhayʼe lhip toj naise lham.

 NATʼAYHETTSHI TOJ NALECHUFWENEJ

3. Heowa laka wichi is che wʼawulhcha

Jesús inuhyenkwe lenʼayij hop Hinʼul toj lhaitumtej nilhokej congregaciones hopkhilak hiwʼawlhatcha wichi toj yen lhometa Heowa lechumet. Toj ihi siglo toj ichun malhyejtso pʼante congregación cristiana. Yahin VIDEO.

Yahyen 1 Corintios 14:33, 40 wet ame mʼayhayna:

• Malhyej toj ihi versiculosna, ¿ha Heowa ihuminchek kalelhajcha laka wichi? ¿Atsi mʼak toj tamenej toj malhyejtso atichunhayaj?

4. Hop nʼokawo toj afwtintsaj ikalelhatcha toj nawo lhometa

Hop cristianos toj ichun pʼante toj iwo lhometa yen hopeya mʼak toj matche toj laha ihi. Yahyen Apóstoles Lhenhay 8:14, 25 wet ame mʼayhayna:

• Toj ihi siglo toj ichun, ¿atsi iyhaj toj ikalelhatcha toj nʼowo lhometa?

• ¿Atsi mʼak toj iwoye Pedro wet Juan toj ihanlhi mʼak toj nʼofwenho pʼante apóstoles?

Toj nʼowo lhometa hope nʼochumet toj lhayʼe lhip toj laha ihi toj Hinʼul toj lhaitumtej nilhokej congregaciones ikalelhatcha. Yahin VIDEO.

 Jesús ikalelhat pʼante toj laha ihi toj nʼowo lhometa. Yahyen Marcos 13:10 wet ame mʼayhayna:

• ¿Atsi mʼak toj tamenej toj Hinʼul toj lhaitumtej nilhokej congregaciones yen hopeya mʼak toj laha ihi toj nʼowo lhometa?

• ¿Atsi mʼak toj tamenej toj nawatlak toj «nʼokawo toj afwtintsaj wet lehusek ihi» ikalelhatcha nʼochumet toj ihi honhatna?

5. Hop nʼokawo toj afwtintsaj inuhyen namkwehen lhanʼayij

Hop Hinʼul toj lhaitumtej nilhokej congregaciones inuhyenkwe lenʼayij cristianos toj iʼpe honhatna. ¿Chi malhyej (Ep hote) toj lhamel tatshupiye mʼak toj is che nʼowʼenho congregaciones? Tetshan chi malhyej (ep hote) toj iwoye Hinʼul toj lhaitumtej nilhokej congregaciones toj ihi siglo toj ichun. Yahyen Apóstoles Lhenhay 15:1, 2 wet ame mʼayhayna:

• ¿Atsi mʼak toj iyej pʼante cristianos iyhaj toj ihi siglo toj ichun?

• ¿Atsi iyhaj toj Pablo, Bernabé wet cristianos ihoye hopkhilak yam is mʼayhaytso toj iyej lhamel?

Yahyen Apóstoles Lhenhay 15:12-18 wet 23-29 wet ame mʼayhayna:

• Toj kamaj tatshupiyetʼa mʼak toj is che iwoye, ¿atsi mʼak toj iwoye Hinʼul toj lhaitumtej nilhokej congregaciones toj ihi siglo toj ichun hopkhilak Dios inuhyenkwe lenʼayij? (Tetshan versículos 12, 15 wet 28).

Yahyen Apóstoles Lhenhay 15:30, 31 wet 16:4, 5 wet ame mʼayhayna:

• ¿Chi malhyej (Ep hote) toj cristianos toj ichun tachumla mʼak toj Hinʼul toj lhaitumtej nilhokej congregaciones ifwenho lhamel?

• ¿Chi malhyej (Ep hote) toj nahanej toj Heowa ikopfwaye hop lhamel toj chʼahunhas?

Yahyen 2 Timoteo 3:16 wet Santiago 1:5 wet ame mʼayhayna:

• Lewhay toj Hinʼul toj lhaitumtej nilhokej congregaciones iche ifwalasnas is che tatshupiye mʼayhay, ¿atsi mʼak toj iwoye toj tachumla nʼochʼotyaj hopkhilak nʼonuyenkwe lenʼayij?

 MʼAYHAY TOJ LETETSHANNE

Hop Hinʼul toj lhaitumtej nilhokej congregaciones hope tʼat «nʼokawo toj afwtintsaj wet lehusek ihi» toj Cristo tatshupiye. Nʼokawotso hiwʼenho instrucciones wet nʼolhak toj nʼotʼamajchet cristianos toj iʼpe honhatna.

Mʼayhay toj lechufwenejne

• ¿Atsi elh toj tatshupiye «nʼokawo toj afwtintsaj wet lehusek ihi»?

• ¿Chi malhyej (Ep hote) toj tʼu namehen Hinʼul toj lhaitumtej nilhokej congregaciones?

• ¿Ha lefwetaj toj Hinʼul toj lhaitumtej nilhokej congregaciones hope «nʼokawo toj afwtintsaj wet lehusek ihi»?