Tej toj am matche toj lehumin Heowa wet letekawayhla nilhokej mʼayhay toj lham ihuminhitʼa hopkhilak ifwitajayen lham, ichepej toj lewohiyela mʼak toj nitʼuhawetayej. Mat iche nʼochʼisukyajay toj inuʼpe iyhaj toj yamho (1 Corintios 6:9, 10). Che am lewoye nʼochʼisukyaj toj lhayʼe lhip toj niʼisa, is che lehusekchʼoye toj Heowa ilehiyejtʼa toj iti amej lehumnhayaj; lham ihuminchek itayhat ates wet tachʼot ame.

1. ¿Atsi mʼak toj is che nawoye hopkhilak Heowa itayhat lhates?

Nʼoelh toj ihumin Heowa toj ihanej toj iwo lechʼisukyaja ilat lhame toj tumho lehusek malhyej che ihi chowej. Mat Heowa ikhajyen nʼoelh toj ihane nʼolhomtesna toj ifwenho pʼante laka wichi: «Tej tä hachʼisukyajay wuj tä nʼäl, mat olejla, hätehlat iwoye fwiyʼet tä wuj tä ipelaj» (Isaías 1:18). Che natalhtho lhahusek toj naleche mʼak toj niʼisa toj nawoye Heowa itayhatla lhates. ¿Atsi mʼak toj hope toj naleche mʼak toj niʼisa toj nawoye? Hope toj matche toj nayʼulhanche mʼak toj niʼisa toj nawoye, toj naleche tajtso wet natʼalhe Heowa che itetshanhitʼa. Nʼoelh lhaikhajyenej hopkhilak itiyej kanhi letichunhayajay toj niʼisahen wok ileche mʼayhay toj iwoyek yachajo toj ichaje lechʼisukyaj, wet matche toj lhaikhajyenej toj iwoye Heowa laka leyes (yahyen Isaías 55:6, 7).

2. Che nawo chʼisukyaja, ¿atsi nʼochʼotyaj toj Heowa hiwʼen namhohen isej ancianos?

Nʼoelh toj iwo lechʼisukyaja, Heowa ifwone lhomtesna: «Is chik tʼäne Dios leles tä lhamenya» (yahyen Santiago 5:14, 15). Hinʼulna hopehen ancianos toj Heowa tatshupiye toj ihane laka espíritu santo toj ihumin lham wet lelay, wet lhamel wakʼalhen hopkhilak tachʼot namehen toj nachajo toj naise Dios (Gálatas 6:1).

Che nawo chʼisukyaja, ¿chi malhyej (ep hote) toj ancianos tachʼot namehen? Dos wok tres lhamel tachʼotla namehen toj natafwelche Heowa letichunhayaj, mʼak toj tamenej toj isitʼa mʼak toj nawoye. Hate hiwʼen namhohen nʼofwonyajay wet tachʼotla namehen hopkhilak ihichetʼa lewhay che yachajo toj nawo chʼisukyaja. Che iche nʼoelh toj iwo lechʼisukyaja wet ilehichetʼa lakey toj niʼisa, ancianos ichemphahla toj ihi congregación hopkhilak nʼotʼuye congregación.

 NATʼAYHETTSHI TOJ NALECHUFWENEJ

3. Toj nafwel mʼak toj isitʼa toj nawoye tachʼotla namehen toj yachajo toj naisen

Nʼochʼisukyaj at che nawoye yʼaje tʼat Heowa, hop tamenej toj is che nafwenho mʼak toj isitʼa toj nawoye. Yahyen Salmo 32:1-5 wet ame mʼayhayna:

• ¿Atsi mʼak toj tamenej toj lhayʼe lhip toj is che nafwenho Heowa lhachʼisukyajay inuʼpe che naskatho lham?

 4. Heowa itiyej lepʼaltsenyaj wichi toj iwo chʼisukyaja

Che iche nʼoelh toj yamho lechʼisukyaj wet iwathitʼahlak tachʼahuye Heowa laka leyes, nʼochemphahla toj ihi congregación wet nemhit nalhayʼajte lham. Yahyen 1 Corintios 5:​6, 11 wet ame mʼayhayna:

• Toj nahanej toj levadura yafwuto harina, ¿ha lefwetaj toj yʼajiyela congregación che nalhayʼajte elh toj iwo lechʼisukyaja toj yʼulhanhichetʼa mʼak toj iwoye? ¿Atsi mʼak toj tamenej?

Mʼak toj Heowa iwoyeje iyhaj toj iwo chʼisukyaja, ¿chi malhyej (ep hote) toj inʼalit toj is alhoho letichunhayaj, lehumnhayaj ihi wet lepʼaltsenyaj ihi?

 MʼAYHAY TOJ LETETSHANNE

Che nawoye nʼochʼisukyaj toj yamho mat matche toj nayʼulhanche wet nalekhajyenej toj nachahijotʼa toj nawoye, Heowa itayhatla lhates.

Mʼayhay toj nalechufwenejne

• ¿Atsi mʼak toj tamenej toj is, che nafwenho Heowa lhachʼisukyajay?

• ¿Atsi mʼak toj is che nawoye hopkhilak Heowa itayhat lhates?

• Che nawoye nʼochʼisukyaj toj yamho, ¿atsi mʼak toj tamenej toj is che natʼalhe ancianos lechʼotyaj?