Toj alechufwenej mʼayhay toj ihi librona am lehanej wujpe mʼayhay toj talhe Heowa. Wet, isej tajtso, ahumnhayaj toj letiyej Dios lhayam tʼat wuj wet alhachaje lham wet alewo bautisaya. Che kamaj lewohiyetʼa, nʼalej toj letichunejlhi hopkhilak lewoye. Mat nʼotaye che tafwaytshi toj alewo bautisaya am letujlhache toj lechiyhelit atʼekhahyaj. Mat is che lepes ihihitʼa toj letujlhache toj aise Heowa. Natetshan chi malhyej (ep hote) toj iwoyek nawoye tajtso.

1. ¿Atsi mʼak toj tamenej toj is che letujlhache toj aise hop Heowa?

Is che nalekhajyenej toj natujlhache toj naise hop Heowa. ¿Atsi mʼak toj tamenej? «Häpkhilek tek yʼanistakej lhanʼäyij» wet natofwehla lham. (Hebreos 2:1). ¿Atsi mʼak toj tachʼotla namehen toj natujlhache toj natʼifwtiyej Heowa? Toj nalekhajyenej tʼat toj nawo lhometa wet natʼukwe lenʼayhay iyhaj hopkhilak natchumhoplhi Dios (yahyen Filipenses 3:16). ¡Ihichetʼa mʼak che iwoyek hiwʼen namhohen lhakajyaj toj nachumhoplhi Heowa! (Salmo 84:10).

2. ¿Atsi mʼak toj is che letujlhache toj lewoye?

Tej toj noj tʼat libro toj alechufwenej, mʼak toj lhehi toj lechumhoplhi Dios nechʼe toj iwo tesa. Biblia yome tefwajpejni cristianos wet yok: «En hawʼuya achowej elh tä nechʼayek» (Efesios 4:23, 24). Che letujlhache toj alechufwenej Dios lhomtes wet lefwute reuniones toj congregación yenlhi lhayʼehila lhip toj letafwelej mʼayhay toj talhe Heowa wet lakey. Ukwe mʼayhay toj inʼalit toj leten tʼat lakeyis. Yej leyej toj lewoye mʼayhay toj isis hopkhilak lekajyenlhi Heowa.

3. ¿Chi malhyej (Ep hote) toj Heowa tachʼotla ame toj letujlhache toj lechiyhelit atʼekhahyaj?

Biblia yok: «Dios hiʼisyenla alhoho hanʼäyij, wet inechʼaynhihila akhajyhayaj wet ayämla kalelhäjen» (1 Pedro 5:10). Nilhokej namel nʼoyelhte lhatʼekhahyaj, mat Heowa hiwʼen namhohen mʼak toj nawatla hopkhilak natumla (Salmo 139:23, 24). Hate lham ikalelhat amho toj hiwʼenla amho akhajyhayaj hopkhilak letʼifwtiyej toj lechumhoplhi (yahyen Filipenses 2:13).

 NATʼAYHETTSHI TOJ NALECHUFWENEJ

4. Yej leyej toj lechʼahuye wet lhomhoplhi akalayʼi

Toj alechufwenej Biblia wet toj lewopej tʼalhyaja tajtso tachʼot ame hopkhilak lhayʼe lhip toj ahope Heowa lakalayʼi. ¿Ha mʼayhaytso iwoyek tachʼot ame toj lhayʼe lhip toj lhawhaye lham? ¿Chi malhyej (Ep hote)?

Yahyen Salmo 62:8 wet ame mʼayhayna:

• Toj lhayʼe lhip toj lham isis atʼalhyajay tajtso tachʼotla ame toj aise hop Heowa. ¿Chi malhyej (Ep hote) toj iwoyek lekalhi tajtso?

Yahyen Salmo 1:2 wet ame mʼayhayna:

• Toj lhayʼe lhip toj lham is toj leyahyen Dios lhomtes tajtso tachʼotla ame toj aise hop Heowa. ¿Chi malhyej (Ep hote) toj iwoyek lekalhi tajtso?

¿Chi malhyej (Ep hote) toj iwoyek lhayʼe lhip toj lham is toj lhenlhi aka estudio personal? Hopkhilak nilhoke mʼayhay iyhaj, yahin VIDEO wet ame mʼayhayna:

• ¿Atsi mʼayhay toj ihi video toj iwoyek lechumyenlhi?

• ¿Atsi mʼayhay toj lehuminchek alechufwenej?

 MʼAYHAY TOJ LETSHANNE

Tujlhache toj aise Heowa wet toj lhen atichunhayaja mʼayhay toj iwoyek lekalhi toj lewoye toj espirituales. ¡Toj malhyejtso iwohiyelak lepes ihihitʼa toj lhen akajyaja mʼak toj lhehi!

Mʼayhay toj nalechufwenejne

• ¿Atsi mʼak toj iwoyek ikalelhat amho toj Heowa tachʼotla ame toj letʼifwtiyej toj lechumhoplhi lham?

• ¿Atsi mʼak toj is che lewoye hopkhilak lhayʼe lhip toj aise Heowa?

• ¿Atsi mʼak toj tamenej toj laha ihi toj is che letichunejlhi mʼak toj lewohiyela toj lekalhi hopkhilak ichiyhelit aka espiritualidad?