Heowa toj hope «Dios toj lekajyaj ihi» hop toj nʼosilotyajay toj isis talhe. Lham ihuminchek wichi wet lewʼet lheley lekajyaj ihi (1 Timoteo 1:11, nwt). Toj nechʼenyaya, Dios yome pʼante mʼak toj wichi is che iwoye hopkhilak tawhayeyhen. Toj wichi tawhayeyhen malhyej toj ley yome, lhamel wet leles lekajyaj ihichehla wet lhaihumnhenla tʼat.

Dios letichunhayaj toj itiyej wichi toj tawhayeyhen, toj hope hinʼu lhayʼe atsinha is che lhahipʼajtitwek pajlaʼtha tiyajʼattsiy. Wichi toj tachʼahuye Dios is che iwoye Leyes toj talhe niyatey toj iʼpe honhat toj yome mʼak toj is che iwoye lewhay che tawhayeyhen (Lucas 2:1, 4, 5). Lham tʼuhlak nʼoelh toj lechʼefwa ihi is che tʼifwtiyej elh (Hebreos 13:4). Wet nʼayiho elh toj iwom lechʼefwa (Malaquías 2:16). Mat, tajlhamet che lechʼefwa «iwo lakainʼoyaja» Dios inuhitʼahla che hinʼu wok atsinha iwom lechʼefwa wet yachajo toj tawhayey (Mateo 19:9, nwt). Yahyen Mateo 19:3-6.

Heowa yenlhi pʼante hinʼu wet atsinha wet itiwek hopkhilak tachʼot lhamehen (Génesis 2:18). Hinʼu toj lechʼefwa ihi hope elh toj lewʼet lheley lhetek, hop toj tamenej toj is che lham toj ichun toj ilhakʼalchʼoye nʼolhak wet ichufwenej lhamel mʼak toj hope Dios. Toj ihumin lechʼefwa, is che ikalhi toj itiyej kanhi iyhaj mʼayhay. Wichi toj lechʼefwas ihi is che lhaihumnhen wet yenhitʼa wʼet mʼayeka elh. Mat toj lhamel lechʼisukyajay ihiche, is che lhaichufwenejen toj itayhat lhamejen letes hopkhilak lekajyaj ihiche. Yahyen Efesios 4:31, 32; 5:22-25, 33 wet 1 Pedro 3:7.

Che iche hinʼu wet atsinha toj iwek toj ihi lewitʼay, is che lhamel lhaikhajyenhen toj iti lhamejen lehumnhayaj  (1 Corintios 13:4, 5). Dios Lhomtes yomhiyetʼa che hinʼu wok atsinha is che iwom lechʼefwa hopkhilak inofwat lewitʼayhyajay toj iwek. Yahyen 1 Corintios 7:10-13.

Heowa tʼuhlak naʼtshas lekajyaj ihiche. Hop toj tamenej toj ichufwenej lenʼayij toj lhayʼe lhip toj is yamthilek yen lekajyaja toj kamaj mamse. Hate iwatlak lhamel isej lajcha wet lako lehanyaj wet mʼayhay toj lhamel ihi pʼante (Colosenses 3:20). Lhayʼe toj is che lhamel ilat lhamehen toj lekajyaj ihi toj iwoye mʼak toj Heowa wet Lhos tʼalheje. Yahyen Eclesiastés 11:9–12:1; Mateo 19:13-15 wet 21:15, 16.

Nʼojchalis wet nʼokolis is che matche toj lhaikhajyenhen toj hiwʼenho leles lhak, lewʼet wet lawʼuy (1 Timoteo 5:8). Mat tsʼilakhitʼa tajtso toj lhamel is che iwoye. Hate is che tachʼote leles toj itafwelej Dios wet hate toj ihumin (Efesios 6:4). Che lajchalis wet lakolis inʼaltej leles toj ihumin Dios, toja tamenhiyeja toj leles iwoye tajtso. Toj lajchalis wet lakolis ichufwenej mʼayhay toj talho Dios lhomtes leles, lhameltso inuhikwela lenʼayij toj is alhoho. Yahyen Deuteronomio 6:4-7 wet Proverbios 22:6.

Naʼtshas toj lakeyis isis iwatlak nʼokhajyenhen wet nʼoyen lekajyaja lakeyistso. Hate is che nʼojchalis wet nʼokolis ichepej lewhay che ifwone wet inityenej leles mʼayhay toj lhamel iwoye, hopkhilak newache mʼayhay che iwitʼayen (Proverbios 22:15). Mat lefwonyaj toj itiyej leles isitʼa che hitʼunhatche. Yahyen Colosenses 3:21.

Hop wichi toj yen lhometa Heowa yenwetha wujpe libros toj yiwte nʼojchalis, nʼokolis wet leles. Nilhokej mʼayhay toj ihi librostso talho Biblia. Yahyen Salmo 19:7, 11.