Jesús ichufwenej pʼante lechufwenkay weihalha religión toj matche. Itechʼaynej pʼante nʼayij toj ihane lewʼatshancheyaj toj tʼun wichi, mat nitakwitʼa wichi toj ilhokpe nʼayijtso (Mateo 7:14). Dios tajlhamet toj tachumla nʼonʼokhayaj toj talho mʼayhay toj matchehen toj ihi Lhomtes, hop Biblia. Wichi toj ihanlhi mʼayhaytso toj matchehen lhahipʼajtej weihalha nʼotʼekhahyaj. Yahyen Juan 4:23, 24; 14:6 wet Efesios 4:4, 5.

Yahin video ¿Ha Dios tachumla nilhokej religiones?

Jesús yome pʼante toj ihichela profetas toj kamatachehena toj hichʼoyhthila nʼotʼekhahyaj toj matche. Profetastso wet laka iglesias yome toj hopehen cristianos. Tej toj lhamel yome toj hiwʼen mʼak toj matche, kalelhaj toj ifwechʼenwetha wichi. Tsʼilak cristianos toj matchehen hiwʼen lakeyis toj isen wet mʼayhay toj iwoye inʼalit toj hopehen Cristo lechufwenkay toj matchehen. Yahyen Mateo 7:13-23.

Natetshan cinco mʼayhay toj wichi toj ihanlhi religión toj matche iwoye:

• Yenhitʼa wʼet mʼayeka hop Biblia, Dios lhomtes. Matche toj lhamel lhaikhajyenej toj ihanlhi mʼayhay toj matchehen toj ihi Biblia, malhnhiyejtʼa iwoye iyhaj religiones toj ihanlhi nʼochufwenyajay toj iʼpe honhatna (Mateo 15:7-9). Lhayʼe toj iwoye tʼat mʼayhay toj yen lhometa. Yahyen Juan 17:17 wet 2 Timoteo 3:16, 17.

•   Iwujyen Dios lhey, Heowa. Jesús iwoye pʼante toja lewhay toj itafwnhatej wichi Lajcha lhey. Ifwenho pʼante wichi chi malhyej (ep hote) Heowa wet ichufwenej pʼante mʼak toj is che yome toj iwo tʼalhyaja hopkhilak yen nʼotʼamajcheta nʼolheytso (Mateo 6:9). Lhip toj lhehi, ¿atsi religión toj itafwnhatej wichi «Heowa lhey»? (Romanos 10:13, 14, nwt).

• Yen lhometa Dios Niyatyaj. Jesús nʼochene pʼante Honhat hopkhilak yen lhometa nʼosilotyajay toj isis toj hope Dios Niyatyaj, toja hope wichi toj ihonhatena leniwhayaj toj weihalha. Wet iwoye pʼante tajtso pajtha nichate lewhay toj yʼil (Lucas 4:43; 8:1; 23:42, 43). Lhayʼe toj yome pʼante toj lechufwenkay yenla tʼat lhometa nʼoniyatyajtso. Toj malhyejtso che iche nʼoelh che nichate lhip toj lhehi wet ifwel amho mʼak toj hope Dios Niyatyaj, ¿atsi pʼiya religión toj ihi? Yahyen Mateo 24:14.

• Ihanhilhitʼa mʼayhay toj ihonhatena. Jesús lechufwenkay lhayʼuythihotʼa mʼayhay toj políticos iwoye wet nʼowitʼayhyajay toj iyej wichi toj tatayhla iyhaj (Juan 17:16; 18:36). Hate itenhitʼa mʼayhay toj iwoye wet wichi lakeyis toj niʼisahen. Yahyen Santiago 4:4.

• Lehumnhayaj toj iti lhamenej inuʼpe nʼohumnhayaj toj wichi iyhaj iti lhamejen. Dios Lhomtes ichufwenejen lhamel toj yenhitʼa wʼet mʼayeka iyhaj toj wʼenhahiche lhomtes. Religiones toj kamatachehena hiwʼenho lechʼotyaj wichi toj ihoye nʼokaʼtshayajay, mat wichi toj ihanlhi religión toj matche iwohiyetʼa tajtso (Miqueas 4:1-3). Tajlhamet toj lhamel nahiyejtʼa lakhajyhayaj, laka chinaj tʼoj wet itiyej kanhi iyhaj mʼayhay hopkhilak tachʼote wet ikhajyenhen iyhaj. Yahyen Juan 13:34, 35 wet 1 Juan 4:20.

¿Atsi religión toj lechufwenyajay talho tʼat Biblia, iwujyen Dios lhey wet yen lhometa Dios Niyatyaj toj ihi pele toj hope wichi leniwhayaj toj weihalha? ¿Atsi religión toj wichi toj ihi lhaihumnhen wet takawayhla nʼokaʼtshayaj? ¿Atsi toj atichunhayaj? Yahyen 1 Juan 3:10-12.