Lewhay pʼante toj Satanás yome mʼak toj ichun toj kamatache, iwo tesa toj iche nʼofwitseyaj toj ihi Honhat. Hope pʼante ángel toj is wet newache pʼante mʼak toj niʼisa che iyej, mat «tatayhlä mʼak tä matche» (Juan 8:44). Ichiyhelit tʼat toj ihi letichunhayaj toj tʼuhlak nʼonʼokwiyej, mʼak toj tajlhamet Dios toj tʼuhawetej che nʼotiyej. Ifwechʼenlhi pʼante Eva, atsinha toj ichun, wet ikalhi toj tachʼahuhiyetʼa Dios wet tajlhamet lham toj nʼotchʼahuye. Adán hate iwoye pʼante mʼak toj lechʼefwa iwoye. Tajtso hop toj tamenej toj iche nʼotelaythayajay wet nʼotʼilek. Yahyen Génesis 3:1-6, 19.

Toj Satanás ikalhi toj Eva ileyej toj tachʼahuye Dios, iwo pʼante tesa toj iche iyhaj toj tatayhla Dios. Satanás yen wʼet mʼayeka Heowa lenʼohyaj toj niyatej nilhokej mʼayhay, Elh toj hope Nʼowujtaj. Toj wujpe wichi lhahipʼajtej Ahottaj, toj takawayhla Dios lenʼohyaj, Satanás nechʼe hope «honhat laka niyat». Yahyen Juan 14:30 wet 1 Juan 5:19.

Heowa lhenhay hope mʼayhay toj ische alhoho. Wichi toj ichun pʼante toj iche wet ángeles iwoye pʼantek tachʼahuye nilhokej mʼak toj Dios ifwenho (Deuteronomio 32:4, 5). Lham inuhitʼahla che natshupyene mʼak toj namel nawatlak nawoye, che natchuma mʼak toj is wok mʼak toj niʼisa. Tajtso, inuhitʼahla toj iwoyek natiyej lhahumnhayaj wet natchʼahuye Dios. Yahyen Santiago 1:13-15 wet 1 Juan 5:3.

Heowa inuhitʼa pʼantehla toj hiwʼen toj letayhfwas tatayhla lenʼohyaj toj niyatej nilhokej mʼayhay, mat pitajitʼa toj itelaytej tajtso. ¿Atsi mʼak toj tamenej toj iwoye tajtso? Hopkhilak inʼalit toj ihichetʼa niyat che hope toj niwʼena lechʼotyaj iwoyek  wichi isej (Eclesiastés 7:29; 8:9). Talhe lewhaytso pajtha nichate ifwalasna, inʼalit toj niyatey iwohiyetʼa che itayhat mʼayhay toj niʼisa alhoho, wichi toj iwitʼayen iyhaj, nʼokaʼtshayajay wet nʼotʼinhayajay. Yahyen Jeremías 10:23 wet Romanos 9:17.

Wichi toj tachumla toj Dios hope laka niyat, ikathiyeja mʼak toj isej (Isaías 48:17, 18). Atofwiyetʼa che Heowa itayhat nilhokej nʼoniyatyajay toj iʼpe Honhat. Tajlhamet wichi toj lhaithatche Dios Niyatyaj toj ilayhichehla toj ihi Honhat (Isaías 11:9). Yahyen Daniel 2:44.

Yahin video ¿Atsi mʼak toj tamenej toj Dios inuhitʼahla toj iche nʼotelaythayajay?

Satanás yome pʼante toj wichi tachumhoplhi Dios hop toj tajlhamet toj lhamel isej. Naisej toj Dios itelayit namejen, nilhokej namel iwoyek nanʼalit toj Ahottaj hope elh toj wʼetahuylhi wet nalethatche Dios leniyatyaj che lhakeyis isen, mat nalethathichetʼa hinʼu leniyatyaj. Yahyen Job 1:8-12 wet Proverbios 27:11.

Toj ichun, is che nahanej chi malhyej (ep hote) toj Dios tʼuhlak nanʼokwiyej wet toj nawo tesa toj nahanlhi religión toj matche, toj lechufwenyajay talho Biblia (Juan 4:23). Lhayʼe toj, che nahanlhi mʼak toj Jesús iwoye pʼante, malhyej toj lhayʼuythihotʼa mʼak toj niyatey iwoye wet nʼokaʼtshayajay, nanʼalit toj natekhawayhla Satanás niyatyaj. Yahyen Juan 17:14.

Satanás ichumyenlhi lakhajyhayaj hopkhilak wichi iwoye mʼayhay toj iwo lewitʼaya lhamel wet talhe nʼokainʼoyaj. Toj natakawayhla mʼayhaytso, lhakalayʼis wet lhawʼet lheley nailakwetha wok iti namhiche mʼak toj atha (1 Pedro 4:3, 4). Che malhyejtso, is che kalelhaj mʼak toj nawohiyela. ¿Ha natʼuhikwela wichi toj ihumin Dios? ¿Ha natchʼahuhiyela Dios laka leyes toj lehanyaj ihi? Che nawoye tajtso, nanʼalthila toj Satanás wʼetahuylhi pʼante toj yome toj ihichetʼala wichi che tachʼahuye Dios che ihi lewitʼayhyajay. Yahyen 1 Corintios 6:9, 10 wet 15:33.

Dios lehumnhayaj toj iti namejen ikalelhat namhohen toj itayhthila nʼotelaythayaj wet nʼofwitseyaj. Wichi toj ilayhichehla pajlaʼtha tiyajʼattsiy toj ihi Honhatna, hopehen wichi toj inʼalit tʼekhahyaj toj itiyej Dios wet lhaithatche. Yahyen Juan 3:16.