Dios lhenek pʼante laka wichi toj kalelhajcha toj talhe Abrahán leles wet hiwʼenho pʼante leyes. Lhamel is pʼante che tʼuye wet tʼamajej Dios lhomtes wet lenʼayij toj tʼuhawetej toj nʼonʼokwiyej (Salmo 147:19, 20). Toj malhyejtso wujpe wichi toj iʼpe honhat iwohiyelak isej. Yahyen Génesis 22:18.

Mʼak pʼante ihi Israel lhayis inʼalit toj che natchʼahuye Dios laka leyes iwoyek naisej (Deuteronomio 4:6). Dios itshupyene pʼante Israel lhayis hopkhilak lhamel hopehen lesilatwos. Isej lhamel iyhaj wichi iwoyek itafwelej Dios toj matche. Yahyen Isaías 43:10, 12.

Heowa tachuma pʼante lakawos toj ihanlhi Cristo, hop toj laka wichi Israel lhayis ileyej pʼante toj tachʼahuye (Mateo 21:43; 23:37, 38). Hop toj tamenej toj ifwalasna tajlhamet Cristo lakawos toj matchehen toj tachumhoplhi Heowa wet hopkhitʼa Israel lhayis. Yahyen Apóstoles Lhenhay 15:14, 17.

Jesús ihutwek pʼante lechufwenkay wet ichufwenej pʼante mʼak toj is che lhamel iwoye toj iwo lhometa hopkhilak iyhaj wichi toj iʼpe nilhok honhat lhayen Jesús lechufwenkaya (Mateo 10:7, 11; 24:14; 28:19, 20). Athana, toj ihi ifwalas toj lepes, nʼochumettso nʼal tʼat toj hatehitʼa iwoye lewhayis toj pajche. Ifwalasna, Heowa ihutwek millones wichi toj talhomche nilhok lhipey toj iʼpe honhatna hopkhilak lhamel lhahipʼajtej religión toj matche (Apocalipsis 7:9, 10). Wichi toj hopehen Dios laka wichi, Cristo lakawos toj matchehen iwoyek tachʼot lhamehen wet lhaikhajyenhen. Lhayʼe toj, nʼochufwenyajay toj talho Dios Lhomtes toj lhamel itetshan lewhay toj ihoye reunión malhyej tʼat iwoye mʼak toj iyhaj itetshan toj iʼpe nilhok Honhat. Yahyen Hebreos 10:24, 25.

Toj nekchom 1870, nitakwitʼa pʼante wichi toj lhaichufwenejen Dios Lhomtes toj tajpe mʼayhay toj matchehen toj ihi Nʼolhomethi, toj wujpe lewhayis toj pajche ihichetʼa pʼante wichi che hiwʼen. Lhamel ihanej pʼante toj Jesús pajche ihutwek lechufwenkay wet ichufwenej toj iwo lhometa, toj malhyejtso iwo pʼante tesa toj lhamel yen silotyaja Dios Niyatyaj nilhokpe honhatna. Toj nekchom 1931, lhamel lhaiwo lheya toj yok wichi toj yen lhometa Heowa. Yahyen Apóstoles Lhenhay 1:8; 2:1, 4, 11 wet 5:42.

Lewhay toj apóstoles iche, nilhokej congregaciones toj iʼpe honhatna isej pʼante toj lhamel hiwʼen iyhaj hinʼul toj Dios lakawos toj wujitʼaʼpe pʼante toj itetshan nilhokej congregaciones. Hinʼulna itafwnhatej pʼante toj Jesús hope Elh toj lakawos Lhetek (Apóstoles Lhenhay 16:4, 5). Malhyej iwoye, ifwalasna wichi toj yen lhometa Heowa isej Hinʼul toj wujitʼaʼpe toj Itetshan nilhokej congregaciones toj ihonhatena, hinʼulna toj pajche itafwelej mʼayhay, itetshan nilhokej Nʼowukwey Betel toj iʼpe nilhok honhat. Lhipeyna hate iche wichi toj iwo iyhaja nʼolhomtes, wet hiwʼenhomche wichi mʼayhayna toj talho Biblia toj inuʼpe ochocientos nʼolhomtes toj wʼenhahiche. Lhamel ichumyenlhi Biblia hopkhilak ikhajyen wet inuhyenkwehen lenʼayij inuʼpe 119.000 congregaciones, toj hate iche hinʼul toj ihanej mʼak toj is che iwoye hopkhilak inʼaltej lehumnhayaj toj tʼuye Dios lelay iyhaj. Yahyen 1 Pedro 5:2, 3.

Wichi toj yen lhometa Heowa kalelhajcha hopkhilak yen lhometa nʼosilotyaj toj isis toj talho Biblia wet ichufwenhen wichi hopkhilak lhayen Dios lechufwenkaya. Malhyej iwoye apóstoles, ilunche nilhokej wichi lewukwey toj iwo lhometa (Apóstoles Lhenhay 20:20). Hate lhamel ichufwenej wichi mʼayhay toj ihi Dios Lhomtes hop toj wichina ihumin mʼayhay toj matchehen. Mat, tsʼilakhitʼa toj lhamel iwek, hate lhaihumnhen malhyej iwoyek lhalewʼet lheley wet lekajyaj ihiche hop toj Heowa tʼuye (2 Tesalonicenses 1:3). Dios laka wichi toj matchehen, lhayʼe lhip toj lekajyaj ihiche inuʼpe wichi iyhaj toj iʼpe Honhatna hop toj lhaikhajyenhen hopkhilak tachʼote wichi wet toja ikajyenlhi Dios. Yahyen Salmo 33:12 wet Apóstoles Lhenhay 20:35.