Jesús hatehitʼa iwoye pʼante wichi toj iʼpe honhatna, toj kamaj neyahi honhatna hope pʼante espíritu toj ihi pele (Juan 8:23). Hate hope pʼante toj ichun toj Heowa yenlhi wet lham toj tachʼote pʼante toj yenwetha nilhokej iyhaj mʼayhay. Hop Biblia yome toj Dios Lhos hope elh toj weihalha, hop toj lhamtso tajlhamet Heowa toj lhenek pʼante (Juan 1:14). Hate nʼoyen lheya «Dios Lhämet», hop toj hope pʼante Lajcha silotwo. Yahyen Proverbios 8:22, 23, 30 wet Colosenses 1:15, 16.

Dios ichene pʼante Lhos Honhat. Hop toj tamenej toj ithatho pʼante María lekachowej, lhutsha toj judía toj kamaj lhakniyʼajaye hinʼu che hope. Hop toj tamenej toj Jesús newache lajcha toj hope pʼante hinʼu (Lucas 1:30-35). Lham nam pʼante honhatna hop toj is che ichufwenej wichi mʼak toj matche toj hope Dios, wet mʼayhay toj iwoye pʼante, ichufwen namejen toj is che nawoye Dios lenechʼethayaj tej toj lhawitʼayhyajay ihiche, wet hate toj is che iwom lewʼatshancheyaj toj newache pʼante mʼak toj niʼisa toj iyej hopkhilak naifwaythen. Yahyen Mateo 20:28.

Iche toj is che nʼowo lahaya hopkhilak tafway hinʼu che hope toj nʼowatlak nʼolan (Éxodo 21:29, 30). Dios lenechʼethayaj toj nechʼenyaya toj itiyej pʼante hinʼu hopkhitʼa pʼante toj is che yʼil wok hichʼut. Nahanej toja tsi Heowa ifwenho pʼante Adán, hinʼu toj ichun, toj che iwo lechʼisukyaja wok nitchʼahuyaye, yʼinhila tʼat. Toj malhyejtso, che niwoya pʼante lechʼisukyaja che yʼinhi pʼante (Génesis 2:16, 17; 5:5). Malhyej toj Biblia yome nʼotʼilek «ihi Honhat» hop toj Adán toj tamenej. Lhamtso inuhto pʼante leles hop nʼochʼisukyaj wet hop toj malhyejtso yʼinhen. Hop toj tamenej toj nawatlak nʼonaifwaythej lhatʼilek. Yahyen Romanos 5:12 wet 6:23.

 Mat, ¿atsi nʼoelh toj iwoye pʼantek lhaiwompe namel wet naifwaytej nʼotʼilek? Lewhay toj nayʼinhen, nawo lahaya lhachʼisukyajay. Toj nahopehen iyhaj toj lechʼisukyaj ihiche iwohiyetʼak nawo lahaya nʼoelh che hope lechʼisukyaj. Yahyen Salmo 49:7-9.

Hatehitʼa iwoye namel, Jesús newache pʼante mʼak che niʼisa toj ihi tʼisan wet ihanhiyejtʼak iwo lechʼisukyaja. Toj malhyejtso, yʼil pʼante hopkhilak iwo lahaya lhachʼisukyajay hopkhitʼa lechʼisukyajay che tamenej. Lewhay toj Heowa ichen pʼante Lhos toj is che yʼil natapehen, inʼalit toj lhayʼe lhip toj ihumin namel. Hate Jesús inʼalit toj ihumin namel lewhay toj tachʼahuye pʼante Lajcha wet toj iwom lewʼatshancheyaj hopkhilak naifwaytej lhachʼisukyaj wet lhatʼilek. Yahyen Juan 3:16 wet Romanos 5:18, 19.

Yahin video ¿Atsi m’ak toj tamenej toj Jesús y’il p’ante?

Lewhay toj Jesús ihonhatena, ichesthen pʼante wichi toj lhailathen, inuhatchepha nʼopʼitsekis wet tachʼote wichi toj pʼalitses. Inʼalit tʼat mʼak toj Dios iwohiyejela lakawos toj afwtintses (Mateo 15:30, 31; Juan 5:28). Lewhay toj Jesús yʼil pʼante, Dios ilayhthi pʼante wet yachajo toj ilayhi malhyej espíritu toj ihi pele (1 Pedro 3:18). Toj paj Jesús ihi toj Lajcha lefwomkat wet tataye che nʼowʼenho nʼonʼohyaj toj niyatej Honhat (Hebreos 10:12, 13). Ifwalasna, Jesús niyatej pele wet lechufwenkay iwo silota nʼosilotyajna toj is nilhokpe honhatna. Yahyen Daniel 7:13, 14 wet Mateo 24:14.

Niyatna toj takhajay atofwiyetʼa che ichumyenlhi lenʼohyaj toj Dios hiwʼenho hopkhilak inofwat wichi toj niʼisahen wet nʼotelaythayaj toj lhamel tamenej toj iche. Nilhokej wichi che inʼalit toj tʼekhaye Jesús wet tachʼahuye ilayhichehla wet lekajyaj ihichehla toj ihi Honhat, toj hopkhila Honhat toj wʼatshan wet isilataj. Yahyen Salmo 37:9-11.