NʼOCHUFWENYAJ 6
¿Ha iche leniwhayaj nʼopʼitseyhay?
1. ¿Atsi nʼoniwhayaj toj hiwʼen nʼopʼitseyhay?
Iche pʼante lewhay toj Jesús ihoye Betania, hupuy toj iwhaye Jerusalén, lhip toj lakalayʼi Lázaro lewʼet. Toj Jesús nam pʼante, Lázaro pajche pʼante cuatro ifwalas toj tafwaytshi toj yʼil. Jesús lhayʼe pʼante Lázaro lepunfwas Marta wet María ihoye nʼopʼitsekwʼet, wet toj paj wuj wichi toj lhaihute. ¡Matche toj lekajyaj ihiche pʼante Marta wet María toj hiwʼen toj Jesús ineyhatpha Lázaro! Yahyen Juan 11:21-24, 38-44.
Hop nʼosilotyaj toj isis toj ihi Biblia ifwel namhohen toj iche nʼoniwhayaj toj yome toj wichi yachajohla toj ilayhiche. Marta pajche pʼante ihanej toj Heowa pajche yome toj tʼuhlak ilayhthiche wichi toj yʼinhen hopkhilak yachajo toj ihi Honhat. Yahyen Isaías 26:19.
2. ¿Atsi mʼak toj iyej wichi toj yʼinhen?
Dios tahuyej pʼante Adán toj yok: «Ahonhat tʼat wet lewelanla honhata» (GÉNESIS 3:19).
Nilhokej wichi nahopehen «honhat» mok (Génesis 2:7; 3:19). Ihichetʼa espíritu che inamhiche, wet toj nayʼinhen ihichetʼa mʼak che yikchufwi che ilay. Hinʼu toj yʼil nemhi iche letichunhayaj, nilhok mʼayhay toj ihi tʼisan noj tʼat toj tachumlhi. Toj malhyejtso, nʼopʼitseyhay nemhit ilate mʼak che hope wok lelhakli ihi. Hop toj tamenej toj lewhay toj yachajo toj ilay pʼante Lázaro yomhiyetʼa pʼante mʼak toj iyej toj yʼil. Yahyen Salmo 146:4, Eclesiastés 9:5, 6, 10.
Iche wichi iyhaj toj imatitche toj iche itaj toj Dios ithatho lewhay toj yʼinhen hopkhilak ihi letelaythayaj, mat tajtso matichetʼa. Malhyej toj nawʼenne, nʼopʼitseyhay mʼak ihanhiyejtʼa. Toj malhyejtso, nʼochufwenyaj toj yome toj iche itaj matche toj kamatache wet tajtso ichʼoyhet Dios lhey, mat lham nʼayiho nʼotichunhayajtso. Yahyen Deuteronomio 12:31.
Yahin video ¿Atsi mʼak toj iyej wichi toj yʼinhen?
3. ¿Ha iwoyek nʼotahuyej nʼopʼitseyhay?
Nʼopʼitseyhay iwohiyetʼa che yamwetha wok ilatchehen honhat (Salmo 115:17). Mat, iche ángeles toj akantses toj iwoyek tahuyej wichi wet lhaitechʼaynej wichi toj yʼinhen pʼante (2 Pedro 2:4). Hop toj tamenej toj Heowa matche toj nʼayej namhomche che natʼuhlak natahuyej nʼopʼitseyhay. Yahyen Deuteronomio 18:10, 11.
4. ¿Atsihila wichi toj yachajo toj ilayhiche?
Millones wichi toj yʼinhen pʼante yachajohla toj ilayhiche wet ihihla Honhat. Hate yachajohla toj ilayhiche wichi toj nitafwelayej pʼante Heowa wet iwoye pʼante mʼayhay toj niʼisa. Yahyen Salmo 37:29 wet Apóstoles Lhenhay 24:15.
Wichi toj ilayhichehla iwohiyelak lhaichufwenej mʼak toj matche toj nʼoyomeje Dios, itiyej tʼekhahyaj Jesús wet inʼalit toj tachʼahuye (Apocalipsis 20:11-13). Che lhamel iwoye tajtso, yenla lekajyaja lewʼatshancheyaj toj laj lepesa toj ihi Honhat. Yahyen Juan 5:28, 29.
5. ¿Atsi mʼak toj ichufwen namejen toj hope Heowa che inuhtichephala wichi?
Nʼochufwenyaj toj yome toj nʼolayhthichehla wichi ipayen namehen Heowa lehumnhayaj wet lepʼaltsenyaj toj nitʼalhachʼoye laha. Naisej toj Dios ichen pʼante Lhos toj is che lhaiwom natapehen, lhaniwhayaj ihi. Wet am, ¿atsi elh toj lehuminchek yachajo toj lewʼen lewhay che nʼolayhthichehla wichi? Yahyen Juan 3:16 wet Romanos 6:23.
