Olhamel opunfwas:

Lhahumnhayaj toj natiyej Dios wet wichi inityen namejen toj nahanlhi nʼofwonyajna toj yok: «Mäyay, hoyaye wichi tä ihiche nilhokej honhates, chufwenhen yämthilek lhayen ochufwenkaya. Bautisayn[hen]» (Mat. 28:19, 20; Mar. 12:28-31). Lewhay toj nanʼalit nʼohumnhayaj toj matche, nʼohumnhayajtso matche toj takhajay. Iwoyek tiyajo lehusey iyhaj toj tatshupiye nʼowʼatshancheyaj toj tʼun toj iwo tʼekhahyaja (Heb. 11:6).

Lewhay toj pajche natihi lhalhetek mʼak toj namhiyela wet toj nawʼenho wichi publicaciones. Athana is che lhayʼe lhip toj nahanej toj namhoplhi wichi. Nanʼaltej lhahumnhayaj wichi iyhaj lewhay toj name mʼak toj lhamel ihuminchek ilate. Tefwajpejni wichi wʼenha lhamej, hop toj tamenej toj is che nawakʼalhen hopkhilak che wichi yʼatshan namehen mʼak toj ihuminchek ilate wok ihanej mʼak toj yen lelhakliya pajche nahanej tajtso. ¡Nʼoyenlhi publicacionna hopkhilak tachʼot namehen toj nakalhi tajtso!

Librofwajna hiwʼen 12 nʼochufwenyajay toj inʼalit 12 nʼokeyis toj nilhokej namel nawatlak nawʼen hopkhilak nanʼalit nʼohumnhayaj wet nachufwenhen wichi. Toj ihi tefwajpejni nʼochufwenyaj inʼalit mʼak toj Jesús wok cristiano elh toj ihi pʼante siglo toj ichun toj ichumyenlhi nʼokeyna lewhay toj iwo lhometa. Mʼak toj athana natʼuhlak nakalhi hopkhitʼa toj natihi lhalhetek mʼak toj namhiyela, mat is che natʼukwe lenʼayhay iyhaj hopkhilak nanʼaltej lhahumnhayaj wichi. Tej toj nilhokej nʼokeyisna toj librofwajna yome hope toj is che nanʼalit lewhay toj nawo lhometa lewʼenla toj nʼokeyis iyhaj matche toj lahal ihi che lenʼalit lewhay toj letahuyej wichi, toj letʼisiyake wichi wok toj lechufwenej Biblia.

Lewhay toj alechufwenej tefwajpejni nʼochufwenyaj, en atichunhayaja atsi mʼak toj lewohiyela hopkhilak lechumyenlhi nʼokeyna lewhay toj letahuyej wichi toj ihi lhip toj am lhehi. Lhahumnhayaj toj natiyej Heowa wet toj natiyej wichi matche toj laha ihi inuʼpe mʼak at che hope toj nawoye. Hop toj tamenej toj alekhajyenej toj lechiyhelit nʼohumnhayajtso. Tajtso tachʼotla ame toj lekalhi mʼak toj letʼuhlak lewoye: lewo achufwenkaya.

Matche toj is toj nachʼot lhamehen toj nachumhoplhi Heowa (Sof. 3:9). ¡Is che Heowa ikopfwaye toj alekhajyenej toj lenʼaltej ahumnhayaj wichi toj lechufwenhen!