XOOLAL ! Waa Israyil ñu ngi jéggi dexu Yurdan ! Waaye ana ndox mi nag ? Ñu ngi ci nawet. Taw bi bare na. Sànq rekk la dex bi feesoon dell. Waaye léegi amatul benn ndox ! Waa Israyil ñu ngiy jéggi dex bi ci suuf su wow, mel ni bi ñu doon jéggi géej gu Xonq gi. Fan la ndox mi dem ? Nañu seet loolu.

Fi mu nee nii, waa Israyil dañu war a jéggi dexu Yurdan. Yosuwe mu ngi leen di jottali li Yexowa wax. Mu ne leen : ‘ Saraxalekat yi ñoo war a jël gaalu kóllëre gi te jiitu ñu. Bu seeni tànk laalee ndoxu Yurdan rekk, ndox mi dina taxaw. ’

Saraxalekat yi daldi yëkkëti gaalu kóllëre gi, jiitu mbooloo mi, dox ba dugal seen tànk ci biir ndox mi, fekk dex bi dafa amoon doole te xóot. Waaye bi seen tànk laalee ndoxu dex bi rekk, ndox mi komaase di wàññeeku ! Loolu de, kéemaan la ! Yexowa dafa taxawal ndox mi bala muy agsi ci ñoom. Léegi amatul ndox fi ñu nekk !

Léegi saraxalekat yi yore gaalu kóllëre gi ñu ngi dem ci diggu dex bi, di dox ci suuf su wow. Ndax gis nga leen fii ? Mbooloo mi yépp daldi jéggi dex bi ci suuf su wow, fekk saraxalekat yi ñu ngi taxaw foofu ci diggu dex bi.

Bi ñu jàllee ba pare, Yexowa nee na Yosuwe mu tànn 12 góor yu am doole, te wax leen lii : ‘ Demleen fu saraxalekat yi taxaw ak gaalu kóllëre gi ci diggu dex bi. Jëlleen foofu 12 xeer. Bu ngeen àggee fi ngeen di fanaan tey, ngeen teglante leen foofu. Bu ëllëgee, bu leen seen doom laajee lu xeer yii tekki, nangeen leen wax ne xeer yooyu ñoo leen di fàttali kéemaan bi Yexowa def bi mu taxawalee ndox mi bi gaalu Yexowa gu kóllëre gi doon jéggi dexu Yurdan. ’ Yosuwe teg na itam 12 xeer fu saraxekat yi taxawoon ci diggu dex bi.

Bi ñu paree loolu yépp, Yosuwe wax na saraxalekat yi yore woon gaalu kóllëre gi ñu jóge fi ñu taxawoon ci Yurdan bi. Bi ñu ko defee rekk, ndox mi daldi ñówaat.